Iudea ai, Farisea tauna ta ese Iesu ia boiria ia ida ia aniani totona. Toana be unai be dina ai. (Luka 11:37, 38; Luka 14:12 hahegeregerea.) Idia do aniani lasi neganai, Farisea taudia be vaia edia imana amo ela bona edia diuna idia huria guna. To Iesu be unai ia karaia lasi. (Mataio 15:1, 2) Unai dala ai imana huria karana ese Dirava ena Taravatu ia utua lasi, to unai be Dirava ena ura lasi.

Iesu ese unai kara ia badinaia lasi neganai, Farisea tauna ia hoa. Iesu be unai ia itaia bona ia gwau: “Umui Farisea taudia be emui kapusi bona disi edia murimuri kahana umui hagoevaia, to emui lalona be mataganigani bona kara dika amo idia honu. Kavakava taudia! Iseda tauanina ena murimuri kahana ia karaia tauna ese iseda lalona ia karaia danu, ani?”​—Luka 11:39, 40.

Mai imana goeva ida aniani karana be gau badana lasi, to koikoi tomadiho karadia amo ita naria namonamo be gau badana. Aniani totona Farisea taudia bona ma haida be edia imana idia huria, to edia kudouna be idia hagoevaia lasi. Unai dainai Iesu ese ia sisiba henidia: “Mai emui lalona ibounai ida ogogami taudia dekenai harihari gaudia umui henia, bena gau ibounai dekenai do umui goeva.” (Luka 11:41) Unai be momokani! Henia karana be kudouna amo ia mai be namo, namo lasi ia kara maoromaoro koikoi, taunimanima ese idia hanamoa totona.

Unai tatau be hariharibada taudia. To Iesu ia gwau: “Umui ese minti, ru bona uma aniani ma haida edia kahana 10 amo kahana ta umui henia, to Dirava ena hahemaoro goeva bona lalokau umui laloa bada lasi! Unai gaudia umui henia be emui maduna, to gau ma haida umui badinaia danu be namo.” (Luka 11:42) Dirava ena Taravatu ia gwau uma aniani ena kahana 10 amo kahana ta be Dirava dekenai do idia henia. (Deuteronomi 14:22) Anina be minti, ru, bona aniani mamina hanamoa totona idia gaukaralaia uma aniani ma haida do idia henia. Farisea taudia ese unai aniani edia kahana 10 amo kahana ta idia henia, to Taravatu ese ia gwauraia mai anina bada karadia, hegeregere kara maoromaoro bona manau be edena bamona?​—Mika 6:8.

Iesu ma ia gwau: “Farisea taudia e, dika do umui davaria, badina umui ura bada sinagoga lalodiai vaira kahanai umui helai bona taunimanima momo gabudiai taunimanima ese umui idia hanamoa! Dika do umui davaria, badina umui be idia hedinarai namonamo lasi mase guridia bamona, taunimanima be idia diba lasi bona latanai idia raka!” (Luka 11:43, 44) Oibe, taunimanima be unai bamona guria gabudia idia bampaia bona moru diba bona Taravatu hegeregerena do idia miro. Unai haheitalai amo Iesu ia ura hahedinaraia Farisea taudia be taravatu idia badinaia lasi, to taunimanima be unai idia itaia lasi.​—Mataio 23:27.

Dirava ena Taravatu ia diba momo tauna ia maumau, ia gwau: “Hadibaia Tauna e, oi herevalaia gaudia amo, ai oi hadikaia danu.” To namona be idia laloparara idia be taunimanima idia durua lasi. Iesu ia gwau: “Taravatu diba momo taudia e, dika do umui davaria danu, badina umui ese taunimanima latanai metau gaudia umui atoa, bona idia huaia be auka. To emui ima kwakikwaki tamona amo unai metau gaudia umui abia isi lasi! Dika do umui davaria, badina umui ese peroveta taudia totona gara gabudia umui haginia, to emui sene taudia ese idia aladia mase!”​—Luka 11:45-47.

Iesu ese ia herevalaia metau gaudia be sene taravatudia bona Farisea taudia edia lalohadai  taravatu totona. Idia ese taunimanima edia mauri idia hametaua. Badina taunimanima idia doria sene taravatudia idia badinaia totona. Abela ena nega amo, edia tubudia ese Dirava ena peroveta taudia idia hamasea. Farisea taudia ese peroveta taudia edia guria gabudia idia haginia, toana be idia matauraidia, to momokani edia lalohadai bona kara amo edia tubudia idia tohotohoa. Idia ura Dirava ena Peroveta tauna badana idia hamasea. Iesu ia gwau Dirava ese inai uru do ia kota henia. Bona lagani 38 murinai, lagani 70 C.E. ai, unai ia guguru.

Iesu ma ia gwau: “Taravatu diba momo taudia e, dika do umui davaria, badina umui ese taunimanima amo diba ena ki umui kokia. Umui vareai lasi bona idia ura vareai taudia edia dala umui koua!” (Luka 11:52) Unai tatau ese Dirava ena Hereva ena anina idia hadibaia be namo, to lasi, idia ese taunimanima idia koua Dirava ena Hereva idia diba bona laloparara totona.

Farisea bona Taravatu hadibaia taudia be dahaka idia karaia? Iesu ia lao gwauraia neganai, mai badu ida henanadai momo idia henia. Diba abia totona idia henanadai lasi. To idia ura Iesu idia koia, unai amo ia gwauraia herevana amo ia idia samania diba.