Idi adda ni Jesus idiay Judea, maysa a Fariseo ti nangawis kenkuana iti pannangan. Mabalin a pangngaldaw dayta, saan a pangrabii. (Lucas 11:​37, 38; idilig ti Lucas 14:12.) Sakbay a nangan ti Fariseo, binugguanna ti imana agingga iti sikona a gagangay nga ar-aramidenda. Ngem saan a kasta ti inaramid ni Jesus. (Mateo 15:​1, 2) Saan a maisalungasing iti Linteg ti Dios ti panagbuggo agingga iti siko ngem saan met a kalkalikaguman ti Dios dayta.

Nasdaaw ti Fariseo ta saan a sinurot ni Jesus dayta a kaugalian. Nadlaw ni Jesus dayta ket kinunana: “Dakayo a Fariseo, dalusanyo ti ruar ti kopa ken pinggan, ngem iti unegyo, napno iti kinaagum ken kinadakes. Minamaag! Saan aya a ti nangaramid iti makinruar ti nangaramid met laeng iti makin-uneg?”​—Lucas 11:​39, 40.

Saan a ti panagbuggo iti ima sakbay ti pannangan ti problema, no di ket ti panaginsisingpetda. Dagiti Fariseo ken ti dadduma a gagangay a mangbuggo kadagiti imada saanda nga ikkaten iti pusoda ti kinadakes. Gapuna, binalakadan ida ni Jesus: “Mangtedkayo iti sagut kadagiti napanglaw a nagtaud iti kaunggan ti pusoyo, ket nadaluskayto iti amin a bambanag.” (Lucas 11:41) Pudno dayta! Ti panangted ket agtaud iti naayat a puso, saan a tapno padayawandaka ti dadduma babaen ti panagpammarang a nalinteg.

Imbaga ni Jesus daytoy saan a gapu ta naimut dagitoy. Imbes ketdi, kinunana: “Itedyo ti apagkapullo ti yerbabuena, ruda, ken dadduma a mulmula, ngem diyo met ipakpakita ti kinahustisia ken ti ayat iti Dios! Dagitoy ti rumbeng nga aramidenyo ngem saanyo met a baybay-an ti dadduma a banag.” (Lucas 11:42) Ibilin ti Linteg ti Dios ti panangited iti apagkapullo dagiti apit. (Deuteronomio 14:22) Ramanen dayta ti yerbabuena ken ti ruda, mulmula a mangnayon iti raman ti taraon. Kanayon a bayadan dagiti Fariseo ti apagkapullo dagitoy a mulmula. Ngem dagiti ngay napatpateg nga ibilin ti Linteg, kas ti panangipakita iti kinahustisia ken ti panagbalin a naemma iti imatang ti Dios?​—Mikias 6:8.

Kinuna pay ni Jesus: “Kaasikayo pay, dakayo a Fariseo, ta kaykayatyo dagiti makinsango a tugaw kadagiti sinagoga ken ti makablaawan kadagiti publiko a lugar! Kaasikayo pay, ta kaslakayo kadagiti tanem a narigat a mailasin, a pagnapagnaan dagiti tattao ta dida ammo a dayta ket tanem!” (Lucas 11:​43, 44) Wen, mabalin a maitibkol dagiti tattao kadagita a tanem ket agbalinda a narugit. Inusar ni Jesus dagita tapno ipaganetgetna a saan a madmadlaw ti kinarugit dagiti Fariseo.​—Mateo 23:27.

Kinuna ti maysa a lalaki nga eksperto iti Linteg ti Dios: “Mannursuro, in-insultuennakami met kadagita nga ibagbagam.” Ngem masapul a bigbigen dagitoy a saanda a tultulongan dagiti tattao. Kinuna ni Jesus: “Kaasikayo met nga eksperto iti Linteg, ta pagawitenyo dagiti tattao iti nadagsen, ngem diyo met kayat nga awiten dagita uray maysa la koma a ramayyo! Kaasikayo pay, ta iyar-aramidanyo iti tanem dagiti propeta a pinatay dagidi ammayo!”​—Lucas 11:​45-47.

Dagiti tradision ken ti ipaalagad dagiti Fariseo iti Linteg ti tuktukoyen ni Jesus nga awit. Padpadagsenanda dagiti tattao. Ipapilitda a sumurot dagiti tattao kadagiti mangpadagsen kadakuada. Pinapatay dagidi ammada dagiti propeta ti Dios, manipud ken Abel agingga iti panawenda. Ita, tultuladenda ti kababalin dagiti ammada, a pagparparangenda a padpadayawanda dagiti propeta babaen ti panangaramidda kadagiti tanemda. Kayatda pay a papatayen ti kangrunaan a Propeta ti Dios. Imbaga ni Jesus a manungsungbatto iti Dios daytoy a henerasion. Pimmayso dayta kalpasan ti agarup 38 a tawen, idi 70 C.E.

 Intuloy ni Jesus: “Kaasikayo pay, dakayo nga eksperto iti Linteg, ta inikkatyo ti tulbek ti pannakaammo. Diyo la ngaruden kayat ti sumrek, laplapdanyo pay dagiti sumsumrek!” (Lucas 11:52) Dagitoy a tattao, a mangilawlawag koma iti kaipapanan ti Sao ti Dios, ik-ikkatenda ti gundaway dagiti tattao a mangammo ken mangtarus iti dayta.

Ania ti reaksion dagiti Fariseo ken eskriba? Idi pumanawen ni Jesus, sipupungtot a binusorda ken agsasarunon ti insaludsodda. Saanda nga agsalsaludsod tapno makasursuroda no di ket kayatda laeng a sumungbat ni Jesus tapno adda maibagana a panggapuanda a mangaresto kenkuana.