Yesu byo ajinga mu Yudea, wayile ku kijiilo kyanengezhezhe Mufaliseo umo. Kyamweka kyajinga kimye kya mute, kechi kyajinga kijiilo kya mabanga ne. (Luka 11:37, 38; Esakanyaiko Luka 14:12.) Bafaliseo saka bakyangye kutatula kuja, baowanga ku maboko kufika ne mu nkokola monka mwayijile kisho kyabo. Bino Yesu kechi byo byo aubile ne. (Mateo 15:1, 2) Kowa ku maboko kufika mu nkokola kechi kwazhilululanga mizhilo ya Lesa ne. Pano bino, kechi byo byakebelenga Lesa amba bobenga ne.

Yesu byo abujile kulondela kino kisho, uno Mufaliseo wakuminye bingi. Yesu wayukile kino kabiji waambile’mba: “Anweba Bafaliseo, movwa pangye ya katomeno ne nsanyi, bino mukachi kenu mwayula lwiso ne bubi. Anweba bilubi! Nanchi aye walengele pangye kechi walengele ne mukachi nenyi?”—Luka 11:39, 40.

Lukatazho kechi lwajinga lwa kowa ku maboko kuba’mba kutooke ne, bino bwajinga bujimbijimbi bwa bupopweshi. Bafaliseo baowanga ku maboko monka mwayijile kisho kyabo, bino bakankelwe kufumya bubi mu michima yabo. Onkao mambo, Yesu wibambijile’mba: “Panainga bya bupe bya lusa biji mu michima yenu ne bintu byonse bikekala byatoka kwi anweba.” (Luka 11:41) Kya kine, muchima wa butemwe ye wafwainwe kwibatundaika kupana, kechi kupana na mulanguluko wa kukeba’mba bantu bebatote pa kwibepekezha kwabo kwa koloka ne.

Yesu kechi waambilenga’mba bano banabalume kechi bapana ne. Bino waambile’mba: “Malwa enu anweba Bafaliseo, mambo mupana bya bujikumi bya minti ne anisi ne bishu bikwabo, bino bunchibamambo bwaoloka ne kutemwa Lesa, anweba mwibilengulula! Bemukambizhe kuba bino bintu, bino kechi kulengulula bololoke, lusa ne bukishinka ne.” (Luka 11:42) Mizhilo ya Lesa yaambile’mba bantu bafwainwe kupananga bya bujikumi bya kajo. (Mpitulukilo ya mu Mizhilo 14:22) Abino bintu byavwangilemo minti ne anisi ne bishu bikwabo bantu byo babikanga mu bya kuja kuba’mba binunkile bulongo. Bafaliseo bapananga bya bujikumi bya bino bishu, bino kechi baubanga bintu byanema byakebewanga bya mu Mizhilo, nabiji kuba byaoloka, kwikala wa kishinka, ne kwipelula ne.—Mika 6:8.

Yesu watwajijile kwamba’mba: “Malwa enu anweba Bafaliseo, mambo mwatemwa bingi kwikala pa bipona bya kulutwe mu mashinagoga kabiji mukeba bingi kwimwimuna mu bisankanyi! Malwa enu, mambo muji nobe bilende bibula kumweka, ne bantu bapitapo kwa kubula kuyuka!” (Luka 11:43, 44) Kya kine, bantu bakonsheshe kwituntula mu bino bilende ne kwikala babula kutooka. Yesu waingijishe kino kishinka pa kulumbulula kuba’mba kubula kutoka kwa Bafaliseo kechi kwakisolokele patoka ne.—Mateo 23:27.

Mwanamulume wayukile bingi Mizhilo ya Lesa wijizhañenye’mba: “Mufunjishi, pa kwamba bino bintu, mubena kwitunena mwenga ne atweba.” Pano bino, bano banabalume bafwainwe kuyuka kuba’mba kechi bakwashishenga bantu ne. Yesu wibambijile’mba: “Malwa enu ne anweba mwayuka Mizhilo, mambo mutwika bantu bisendwa byakatazha kusenda, bino anweba kechi mukwatako nangwa na munwe wenu umo ku bisendwa ne! Malwa enu, mambo mushimika bilende bya bangauzhi, bino bashakulu benu bo bebepayile!”—Luka 11:45-47.

Bisendwa Yesu byo aambilengapo byajinga bisho bya bantu ne jishinda Bafaliseo jo balumbulwilangamo Mizhilo. Bano banabalume bakatazhanga bantu na ino mizhilo yabo. Bakosangapotu kuba’mba bantu bonse balondelenga ino mizhilo yajinga nobe bisendwa byanema bingi. Bashakulu babo baipayile bangauzhi kutatwila pe Abela. Bino batendekele kumwesha nobe banemeka bangauzhi kupichila mu kushimika bilende bya bangauzhi, kulondela byaubanga bashakulu babo. Bakebelenga ne kwipaya ngauzhi wa Lesa wakila bangauzhi bonse. Yesu waambile’mba Lesa ukazhachisha kino kisemi. Kabiji kino kyamwekele byo papichile nobe myaka 38, mu 70 C.E.

Yesu watwajijile kwamba’mba: “Malwa enu  anweba mwayuka Mizhilo, mambo mwashinkila bantu bibelo bya kuyuka Lesa. Anwe bene kechi mwatwelelemo ne, kabiji mwibakanya ne bonse bakeba kutwelamo!” (Luka 11:52) Bano banabalume bafwainwe kufunjishanga Mambo a Lesa, bakankelwe kukwasha bantu kuyuka Mambo a Lesa ne kwiakwatakanya.

Bafaliseo ne banembeshi baubilepo byepi? Yesu byo alupukilemo mu nzubo, batatwile kumukatazha bingi ne kumushikisha mepuzho. Kechi bamwipwizhenga kuba’mba bafunde ne, bino, bakebelenga’mba Yesu ambe kintu kisakumulengela’mba bamukase.