Jesu umemiwa kwa lico ki Mufalisi inze asali mwa Judea. Mwendi ki lico za musihali isiñi za manzibwana. (Luka 11:37, 38; mubapanye Luka 14:12.) Pili basika ca kale, Bafalisi balatelela sizo sabona ka kutapa kwa mazoho kuisa mwa liñokolwa. Kono Jesu yena haezi cwalo. (Mateu 15:1, 2) Kutapa kwa mazoho ka nzila yecwalo haki kutula Mulao wa Mulimu, kono Mulimu hatokwi kuli batu baezange cwalo.

Mufalisi yo ukomokiswa ki taba ya kuli Jesu haalateleli sizo seo. Jesu ulemuha taba yeo mi uli: “Cwale mina Bafalisi, mukenisa komoki ni mukeke kwande, kono mwahali mutezi mukwañuli ni bumaswe. Mina babasina kutwisiso! Kana yanaaezize fande haki yena hape yanaaezize ni mwahali?”—Luka 11:39, 40.

Kutapa kwa mazoho pili mutu asika ca kale lico haki nto yemaswe, kono sesimaswe ki balapeli bao. Bafalisi ni babañwi babatapanga kwa mazoho ka kulatelela sizo, bapalelwa kukenisa lipilu zabona kwa bumaswe. Kabakaleo, Jesu ubaeleza kuli: “Mufe lika ze mwa lipilu zamina sina limpo za sishemo, mi hamubone! Lika zeñwi zamina kaufela likaba zekenile.” (Luka 11:41) Taba yeo ki ya niti! Kufana kuswanela kuzwelela kwa pilu, isiñi kufana ka mulelo wa kutabisa babañwi ka kuiponahalisa kuba yalukile.

Baana ba ni bona bafanga limpo. Jesu uli: “Mufa zabulishumi za minta ni peganoni ni miloho yemiñwi kaufela, kono mukeshebisa katulo yelukile ni lilato la Mulimu! Kufa sabulishumi nemulukela kufa, kono isiñi ka kukeshebisa zeñwi zeo.” (Luka 11:42) Mulao wa Mulimu neulaela kuli batu bafange sabulishumi kwa lico zebakutuzi. (Deuteronoma 14:22) Zeo likopanyeleza minta ni peganoni, ni matali a likota zeñwi anaalungiwangwa lico. Bafalisi nebafanga zabulishumi za matali ao, kono kana nebaezanga lika za butokwa ze mwa Mulao, zecwale ka kueza sesilukile ni kuikokobeza fapilaa Mulimu?—Mika 6:8.

Jesu uzwelapili, uli: “Munani bumai mina Bafalisi, kakuli mulata lipula za kwapili mwa masinagoge ni kulumeliswa ka likute mwa misika! Munani bumai, kakuli muswana sina mabita ani asalemusehi ka bunolo, kuli mane batu bazamaya fahalimwaa ona basazibi sesiñwi!” (Luka 11:43, 44) Ka niti, batu bakona kusitatala fa mabita acwalo ni kuba babasika kena ka sizo. Jesu uitusisa taba yeo kubonisa kuli kusakena kwa Bafalisi hakulemusehi.—Mateu 23:27.

Muuna yomuñwi yaziba hande Mulao wa Mulimu, ubilaela kuli: “Muluti, haubulela lika ze, walulwaha ni luna.” Kono batu babacwalo baswanela kulemuha kuli bapalelwa kutusa batu. Jesu uli: “Munani bumai ni mina babaziba Mulao, kakuli mukulekisa batu mitiyo yekataza kuishimba, kono mina hamuswali kwa mitiyo yeo nihaiba ka munwana wamina ulimuñwi! Munani bumai, kakuli muyaha mabita a bapolofita, kono bo kuku wamina ki bona bane bababulaile!”—Luka 11:45-47.

Mitiyo yatalusa Jesu ki lizo za Bafalisi ni mobataluseza Mulao. Baana ba, batatafaza bupilo bwa batu kakuli bapihelela kuli batu kaufela balatelele lizo zabona zeimeza. Bo kuku wabona babulaile bapolofita ba Mulimu, kukala ka Abele ni babañwi. Cwale bona bababonahala inge kuli bakuteka bapolofita ka kubayahela mabita, balikanyisa moya ni likezo za bo kuku wabona. Mane babata kubulaya Mupolofita wa butokwa hahulu wa Mulimu. Jesu ubulela kuli Mulimu ukafa lusika lo koto. Mi nekubile cwalo hamulaho wa lilimo ze 38 kuzwa fo, ili ka silimo sa 70 C.E.

 Jesu uzwelapili kubulela kuli: “Munani bumai mina babaziba Mulao, kakuli muungile sinotolo sa zibo. Mina nemusika kena mwahali, mi babalata kukena mwabapalelwisa!” (Luka 11:52) Baana ba, babaswanela kuluta batu Linzwi la Mulimu, habaezi cwalo, kono babapalwelisa kuliziba ni kuliutwisisa.

Bafalisi ni bañoli baeza cwañi habautwa cwalo? Jesu hafunduka, bakalisa kumulwanisa ka bunyemi ni kumubuzaka lipuzo. Habamubuzi ka mulelo wakuli baitute. Kono babata kuli Jesu abulele nto yefosahalile ilikuli bafumane libaka la kumutama ka lona.