Pavua Yezu mu Yudaya, wakitaba dibikila dia kuya kudia kua Mufalese kampanda. Pamuapa bivua biakudia bia mu munya. (Luka 11:37, 38; fuanyikija ne Luka 14:12) Kumpala kua kudia, Bafalese bavua buowa mâyi kumbukila ku bianza too ne ku nkengibua bilondeshile tshilele tshiabu. Kadi Yezu kavua muenze nanku to. (Matayi 15:1, 2) Kuowa mâyi mushindu au kakuvua kushipa mukenji wa Nzambi to, kadi ki mbualu buvua Nzambi mulombe bua kuenza to.

Mufalese mukuabu wakakema bua muvua Yezu kayi mulonde tshilele atshi. Yezu wakamona bualu ebu e kuambaye ne: “Nunku nuenu Bafalese, nudi nusukula pambidi pa dikopo ne pa dilongo, kadi munda muenu nudi buwule tente ne lukuka ne malu mabi. Nuenu bantu badi kabayi ne meji! Uvua muenze pambidi nyeye uvua muenze kabidi munda, ki mmuomu anyi?”​—Luka 11:39, 40.

Kuowa mâyi ku bianza kumpala kua kudia ki nkuvua ne bualu to, kadi lubombo luvua nalu bamfumu ba bitendelelu ke luvua ne bualu. Bafalese ne bantu bakuabu bavua buowa mâyi ku bianza bilondeshile tshilele tshiabu kabavua basukula mioyo yabu ku malu mabi to. Nunku Yezu wakababela ne: “Kadi bintu bidi munda muenu, nubifile bu mapa a luse, ne monayi! bintu bienu bikuabu bionso nebikale bikezuke.” (Luka 11:41) Bushuwa mêyi aa avua malelela! Dinanga didi mu muoyo wetu ke didi ne bua kutusaka bua kufila, kadi ki ndijinga dia kudileja bua bantu bakuabu batumone bu bakane to.

Kabivua ne: bantu aba kabavua bafila bintu to. Yezu wakaleja ne: “Nudi nufila tshia dikumi tshia tshisonsa tshia mante ne tshisonsa tshia ruta, ne tshia bisonsa bikuabu bionso bia mu budimi, kadi nudi nulengulula kulumbuluisha kuakane ne dinanga bia Nzambi! Malu aa ke anuvua ne bua kuenza, kadi kanuyi nulengulula malu makuabu au.” (Luka 11:42) Mikenji ya Nzambi ivua ilomba bua kufuta tshia dikumi tshia bia pa madimi. (Dutelonome 14:22) Bintu ebi bivua bikonga tshisonsa tshia mante ne tshia ruta, bikunyibua anyi mitshi bivuabu balengeja nabi biakudia. Bafalese bavua bafuta too ne mu katoba tshia dikumi tshia bisonsa ebi, kadi netuambe tshinyi bua malu a mushinga mukole avua Mikenji ilomba bu mudi kuikala ne bululame ne kuikala bena bupuekele kumpala kua Nzambi?​—Mika 6:8.

Yezu udi utungunuka wamba ne: “Diakabi dienu nuenu Bafalese, bualu nudi banange nkuasa ya kumpala mu nsunagoga ne basue bua bantu banuele mioyo mu bisalu! Diakabi dienu, bualu nudi bu nkita idi kayiyi imueneka bimpe, bantu bendelapu kabayi bamanye.” (Luka 11:43, 44) Eyowa, bantu bavua mua kudituta ku nkita eyi ne kulua bakoya bilondeshile mikenji. Yezu wakenza mudimu ne bualu ebu bua kuleja ne: bukoya bua Bafalese kabuvua bumueneka ku mêsu to.​—Matayi 23:27.

Muntu kampanda uvua mumanye Mikenji ya Nzambi bikole wakanyingalala wamba ne: “Mulongeshi, paudi wamba malu aa, udi utupenda petu.” Kadi bantu ba nunku bavua ne bua kumanya ne: bavua bapangile bua kuambuluisha bantu. Ke Yezu kuamba ne: “Diakabi dienu nuenu penu bamanyi ba Mikenji, bualu nudi nuambika bantu majitu makole bua kuambula, kadi nuenu bine kanuena nulenga majitu aa ne munu wenu nansha umue! Diakabi dienu, bualu nudi nuibaka nkita ya baprofete, pabi bankambua benu ke bavua babashipe!”​—Luka 11:45-47.

Majitu avua Yezu wakuila mmalu avua Bafalese balondelangana mukana ne mushindu uvuabu bumvuija Mikenji. Bantu aba bavua banemesha nsombelu wa bantu bakuabu bujitu. Bualu bavua batamba kuamba ne: bantu bonso bavua ne bua kutumikila malu avua malue bu majitu makole. Bankambua babu bavua bashipe baprofete ba Nzambi kumbukila ku Abele too ne bavua balonda panyima. Nunku, anu bobu bavua benze bu bavua bapesha baprofete ba Nzambi bunême pa kubibakila nkita ke bavua balonda lungenyi ne bienzedi bia bankambua babu. Bavua mene bakeba kushipa Muprofete mutambe bunene wa Nzambi. Yezu wakamba ne: Nzambi neabadile bena tshipungi etshi bubi abu. Bualu ebu buakakumbana bidimu bitue ku 38 pashishe mu 70 B.B.

 Yezu udi utungunuka wamba ne: “Diakabi dienu nuenu bamanyi ba Mikenji, bualu nudi bumbushe nsapi wa dimanya. Nuenu bine kanuvua babuele, ne nudi nupangisha badi babuela!” (Luka 11:52) Bantu bavua ne bua kulongesha Dîyi dia Nzambi aba bavua bobu bapangisha bantu mpunga wa kudimanya ne kudiumvua.

Bafalese ne bafundi ba mikenji bakenza tshinyi? Pavua Yezu mumbuke, bakatuadija kumuela mpata ne tshiji ne kumutondesha ne nkonko. Kabavua bela nkonko bua kumanya to. Kadi bavua bateta Yezu bua ambe tshintu tshia bobu kumukuatshila.