Omu Yesu apwile muYuleya etavile kuya nakulya vyakulya kuzuvo yakaFwaliseu. Chasoloka nge chapwile kulya chamusana keshi chachingoloshiko. (Luka 11:37, 38; esekesenuko Luka 14:12.) Shimbu kanda vaFwaliseu vaputuke kulya, vasanyinenga kumavoko kuheta nakuminguza kweseka nachisemwa chavo. Oloze Yesu kalingilenga ngochoko. (Mateu 15:1, 2) Kusana kuhetesa kuminguza kachapwile hikuhokola Jishimbi jaKalungako, kaha Kalunga nawa kalwezele vatu valingenga ngochoko.

Uze kaFwaliseu alikomokelele hakuwana nge Yesu kakavangijilenga chisemwa kanako. Yesu atachikijile chuma kana, kaha ambile ngwenyi: “Jino enu vaFwaliseu, enu mweji kutomesanga kuweluka walupasa nalilonga, oloze mujitulo jenu munazale chipululu navilinga vyakuhuka. Enu vatu vakuhona mangana! Ou atengele kuweluka keshi ikiye atengele namutuloko nyi?”—Luka 11:39, 40.

Kulya vyakulya chakuzeneka kusana kumavoko kachapwile chihande chachineneko, oloze vaFwaliseu vakulyonga vachimwene kupwa chihande nahacho. VaFwaliseu navatu veka vaze vakavangijilenga chisemwa chakusana kuhetesa kuminguza vahonene kutomesa michima yavo mangana valihende kuvilinga vyakuhuka. Ngocho Yesu avahuhumwine ngwenyi: “Hanenu vyuma vize vili mutulo kupwa mawana akutetela, kaha vyuma vyosena navipwa vitoma kutalisa kuli enu.” (Luka 11:41) Vyuma kana vyamuchano. Kuhana chatela kufuma kumuchima, keshi mwomwo yakufwila kwivwisa vatu kuwaha hakusaka kulimona kupwa vakwolokako.

Kachalumbununa nge ava malunga kavazangile kuhanako. Yesu ambile ngwenyi: “Mweji kuhananga chakusokesa mulikumi chalwenyi, napenganone, navisakwola vyeka vinuka vyosena, oloze mweji kuleununanga chiyulo chakwoloka nazangi yaKalunga! Vyuma kanevi mwatela kuvilinga vene, oloze navyevi vikwavo nawa kamwatela kuvileununako.” (Luka 11:42) Jishimbi jaKalunga jetavishile vatu kuhananga vyakusokesa mulikumi. (Lushimbi lwamuchivali 14:22) Vahanyinenga nalwenyi napenganone vize vyapwile visakwola vyalivumba lyamwaza vize vahakilenga kuvyakulya. VaFwaliseu vahanyinenga vyakusokesa mulikumi vyavyevi visakwola, oloze valeunwine vyuma vyavilemu vyamuJishimbi vyakufwana nge kulinga mwaya chiyulo chakwoloka nakulinyisa hakutambuka naKalunga.—Mika 6:8.

Yesu atwalileho ngwenyi: “Lamba kuli enu vaFwaliseu, mwomwo mwazanga vitwamo vyakulutwe mujisunangonga, nakumimenejeka kuvilanjilo! Lamba kuli enu, mwomwo mwapwa nge muvimbumbe vize kavyeshi nakusolokako, ngocho vatu navahitaho chakuhona kutachikiza.” (Luka 11:43, 44) Eyo, vatu vahukanyinenga havimbumbe kana nakuvalingisa jino vahone kupwa vatoma. Yesu azachishile chakutalilaho kana mangana asolole nge kupihya chavaFwaliseu kachasolokele hatomako.—Mateu 23:27.

Lunga umwe uze atachikijile chikuma Jishimbi jaKalunga ambile ngwenyi: “Ove Muka-kunangula, hakuhanjika vyuma kanevi uli nakutusawila kumwe nayetu nawa.” Oloze vatu kana vatelele kutachikiza ngwavo vahonene kukafwa vatu. Yesu ambile ngwenyi: “Lamba nakuli enu nawa mwatachikiza chikuma Jishimbi, mwomwo mweji kutwikanga vatu viteli vyavilemu, oloze enu vavene kamweshi kukwata kuviteli kana numba namunwe wenu umweko! Lamba kuli enu, mwomwo mweji kutunganga vimbumbe vyavapolofweto, oloze vakakuluka jenu vakiko vavajihile!”—Luka 11:45-47.

Viteli vize avulukile Yesu vyatalikishile kuvisemwa vyavaFwaliseu namujila valumbunwine Jishimbi. Ngocho, vatu kana vakaluwishile chiyoyelo chavatu. Vasakilenga ngwavo vatu vosena valamenga viteli vize vyapwilenga vyavilemu. Vakakuluka javo vanajihinga vapolofweto jaKalunga putu vene kuli Avele. Kaha vaFwaliseu valisolwelenga nge vavumbikilenga vapolofweto hakuvatungilanga vimbumbe, kumananyi makulyavo, vapwile nakulondezeza muchima navilinga vyavakakuluka javo. Vapwile nakusaka nakujiha Kapolofweto wamunene waKalunga. Ngocho Yesu ambile ngwenyi Kalunga  mwakazangamisa chisemunwino kana. Kahomu mukiko chapwile mu 70 C.E. omu mwahichile myaka 38.

Yesu atwalileho ngwenyi: “Lamba kuli enu mwatachikiza chikuma Jishimbi, mwomwo mwafumishileko sapi yachinyingi. Enu vavene kamwengililemoko, kaha nawa vaze vasakile kwingilamo mwavajikililile.” (Luka 11:52) Ava malunga vatelele kunangulanga vatu mwalumbunukila Mazu aKalunga, oloze vahoneselenga vatu kutachikiza awa Mazu aKalunga nakumonomu alumbunukila.

Uno vaFwaliseu navaka-kusoneka vevwile ngachilihi? Omu Yesu asakile kufuma kuze, vapihililile chikuma nakuputuka kumuhulisa vihula vyavivulu. Kavapwile nakumuhulisa mangana valinanguleko, oloze vasakile kuwanyina Yesu kanyinyilo mangana ahanjike vyuma vize navilingisa vamukwate.