Ge Jesu a le Judea, Mofarisei o mo laletša dijong. Go ka direga gore ke dijong tša mosegare, e sego tša go lalela. (Luka 11:37, 38; bapiša le Luka 14:12.) Pele ga ge ba eja, Bafarisei ba latela tlwaelo ya go hlapa diatla tša bona go fihla ditšung. Eupša Jesu ga a dire seo. (Mateo 15:1, 2) Go hlapa go fihla bokgoleng bjoo go ka se robe Molao wa Modimo, lega go le bjalo ga se seo Modimo a se letetšego.

Mofarisei yo o makatšwa ke gore Jesu ga a latele tlwaelo yeo. Jesu o lemoga se gomme o re: “Bjale lena Bafarisei, le hlwekiša bokantle bja senwelo le sebjana, eupša dipelong tša lena go tletše megabaru le bokgopo. Lena batho ba hlokago tlhaologanyo! Na yo a dirilego bokantle ga se a dira le bokagare?”—Luka 11:39, 40.

Bothata ga se go hlapa diatla pele motho a eja, eupša bothata ke boikaketši bja bodumedi. Bafarisei le ba bangwe bao ba hlapago diatla ka tlwaelo ba palelwa ke go hlwekiša bokgopo dipelong tša bona. Ka gona Jesu o a ba eletša o re: “Neang dilo tše di lego ka gare e le dimpho tša kgaugelo gomme tsebang gore dilo tše dingwe ka moka e tla ba tše di hlwekilego mabapi le lena.” (Luka 11:41) Ruri seo ke therešo! Go nea go swanetše go tšwa pelong e ratago, e sego kganyogong ya go nyaka go kgahliša ba bangwe ka go leka go itira ba ba lokilego.

Ga se gore banna ba ga ba nee. Jesu o re: “Le ntšha sa lesome sa dimela tše di bitšwago minti le ruwe le sa merogo e mengwe ka moka, eupša le hlokomologa toka le lerato la Modimo! Dilo tše le be le tlamegile go di dira, eupša le sa hlokomologe go dira dilo tšeo tše dingwe.” (Luka 11:42) Molao wa Modimo o be o nyaka gore go ntšhwe karolo ya lesome ya puno. (Doiteronomio 14:22) Seo se be se akaretša minti le ruwe, e lego merogo goba dimela tšeo di dirišetšwago go natefiša dijo. Bafarisei ba be ba ntšha karolo ya lesome ya merogo ye ka šedi, eupša go thwe’ng ka dinyakwa tše bohlokwa kudu tša Molao, tše bjalo ka go bontšha toka le go ba le boipoetšo pele ga Modimo?—Mika 6:8.

Jesu o tšwela pele ka gore: “Go madimabe lena Bafarisei, gobane le rata ditulo tša ka pele disinagogeng le go dumedišwa ka tlhompho borekišetšong! Go madimabe lena, gobane le etša mabitla ao a sa bonagalego gabotse ao batho ba sepelago godimo ga ona ba sa tsebe!” (Luka 11:43, 44) Ee, batho ba ka sepela godimo ga mabitla ao ba sa tsebe gomme ya ba ba sa hlwekago. Jesu o diriša ntlha yeo go gatelela gore go se hlweke ga Bafarisei ga go bonagale.—Mateo 23:27.

Motho yo mongwe yo a tsebago Molao wa Modimo o a belaela o re: “Morutiši, ge o bolela dilo tše o roga le rena.” Lega go le bjalo banna ba bjalo ba swanetše go lemoga gore ba palelwa ke go thuša batho. Jesu o re: “Go madimabe le lena bao le tsebago Molao, gobane melao ya lena e etšago merwalo, le e rweša batho le ge go le thata go e rwala, eupša lena ka noši ga le e kgwathe le ka o tee wa menwana ya lena! ‘Go madimabe lena, gobane le aga mabitla a baporofeta, mola ba bolailwe ke borakgolokhukhu ba lena!’”—Luka 11:45-47.

Merwalo yeo Jesu a bolelago ka yona ke ditlwaelo tše di fetišetšwago ka molomo feela le tlhathollo ya Bafarisei ya Molao. Banna ba ga ba nolofaletše batho bophelo. Go e na le moo, ba gapeletša gore batho ka moka ba swanetše go latela seo e bago merwalo e boima. Borakgolokhukhu ba bona ba bolaile baporofeta ba Modimo, go tloga ka Abele go ya pele. Bjale bona, bao ba itirago eka ba hlompha baporofeta ka go ba agela mabitla, ba ekiša mokgwa le ditiro tša borakgolokhukhu ba bona. Ba bile ba nyaka go bolaya Moporofeta yo mogolo wa Modimo. Jesu o bolela gore Modimo o tla bea moloko wo molato. Le gona seo se ile sa direga e le ka kgonthe mo e ka bago ka morago ga nywaga e 38, ka 70 C.E.

Jesu o tšwela pele o re: “Go madimabe lena bao le tsebago Molao, gobane le tšere senotlelo sa tsebo; lena ka noši ga se la tsena gomme bao ba tsenago le lekile go ba thibela!” (Luka 11:52) Banna ba, bao ba swanetšego go ba ba ruta seo Lentšu la Modimo le se bolelago, go e na le go dira seo ba tima batho sebaka sa go le tseba le go le kwešiša.

Bafarisei le bamangwalo ba arabela bjang? Ge Jesu a sepela, ba thoma go mo ganetša ba galefile le go mo hlasela ka dipotšišo. Ga ba botšiše e le ge ba kganyoga go ithuta. Go e na le moo, ba nyaka go mo tanya gore a bolele selo se sengwe seo ba ka dirago gore a golegwe ka sona.