Taem Jesus stap long Judea, hem go for kaikai long haos bilong wanfala Pharisee. (Luke 11:37, 38) Bifor olketa kaikai, olketa Pharisee followim kastom for wasim hand bilong olketa go kasem bigfala join midol long hand. Bat Jesus no duim datwan. (Matthew 15:1, 2) Law no stopem man for duim datwan bat hem no samting wea God sei man mas duim.

Datfala Pharisee barava sapraes taem Jesus no followim datfala kastom. Jesus luksavve long datwan and sei: “Iufala olketa Pharisee ia, iufala wasim nomoa aotsaed long kap and dish, bat insaed iufala greedy and barava nogud tumas. Iufala nating garem stretfala tingting! Man wea wakem aotsaed hem wakem insaed tu, iaman?”—Luke 11:39, 40.

Jesus no story abaotem wei for wasim hand bat hem story abaotem olketa bigman bilong religion wea act holy bat olketa laea nomoa. Olketa Pharisee and olketa narawan strict tumas for wasim hand, bat olketa nating aotem olketa nogud samting from heart bilong olketa. So Jesus sei long olketa: “Duim gud samting from heart bilong iufala for pipol wea poor. Sapos iufala duim datwan, bae iufala barava klin.” (Luke 11:41) Man shud givim samting from hem lovem narawan, no from hem laekem nara pipol for tinghae long hem nomoa.

Diswan no minim olketa man hia no givim samfala samting. Jesus sei: “Iufala givim smol haf long mint and rue and olketa nara vegetable, bat iufala nating showimaot love bilong God or followim wei bilong hem for duim samting wea stret! Olketa important samting hia nao iufala mas duim, bat iufala mas no forget for duim olketa nara samting tu.” (Luke 11:42) Law bilong God sei sapos man harvestim tenfala basket kaikai long garden bilong hem, hem mas givim wanfala long God. (Deuteronomy 14:22) Olketa mas givim tu mint and rue, wea hem olketa smol plant wea pipol iusim for mekem kaikai teist naes. Olketa Pharisee no miss for givim olketa samting hia, bat waswe long olketa samting wea Law sei hem moa important, olsem wei for duim samting wea stret and for hambol?—Micah 6:8.

Jesus sei moa: “Barava nogud samting nao bae kasem iufala olketa Pharisee, bikos taem iufala go insaed sinagog iufala laek for sidaon long olketa chair long front, and iufala laekem pipol long market for mekhae long iufala tu! Barava nogud samting nao bae kasem iufala bikos iufala olsem olketa grev wea man no savve lukim. Pipol wakabaot antap olketa grev hia and no savve nomoa!” (Luke 11:43, 44) Sapos pipol seknomoa step antap long olketa grev olsem, datwan bae mekem olketa no klin. Jesus talem datwan for showimaot nomata olketa Pharisee luk klin, olketa nating klin nomoa.—Matthew 23:27.

Wanfala man wea savve tumas long Law bilong God komplen and sei: “Teacher, taem iu tok olsem, iu barava tok spoelem mifala tu ia.” Bat olketa man olsem mas luksavve olketa no helpem pipol, so Jesus sei: “Barava nogud samting nao bae kasem iufala wea savve tumas long Law tu, bikos iufala putim long shoulder bilong olketa man samting wea hevi tumas for karem, batawea, iufala nating willing for iusim nomata wanfala finger nomoa for liftim datwan! Barava nogud samting nao bae kasem iufala bikos iufala wakem grev bilong olketa profet, bat olketa grani bilong iufala nao killim olketa dae!”—Luke 11:45-47.

Olketa samting wea hevi tumas wea Jesus storyim hem olketa kastom and wei wea olketa Pharisee ova tumas long hao olketa minim Law. Olketa no mekem laef isi for pipol bat olketa sei evriwan mas followim olketa kastom and law hia wea gogo hem barava hevi long olketa. Olketa grani bilong olketa killim dae olketa profet bilong God start kam long Abel. Distaem, olketa Pharisee act olsem olketa mekhae long olketa profet long wei for wakem grev bilong olketa, bat olketa garem sem tingting and duim sem samting wea grani bilong olketa duim. Olketa trae for killim dae tu nambawan Profet bilong God. Jesus sei God bae panisim olketa hia,  and datwan hem happen samting olsem 38 year bihaen, long 70 C.E.

Jesus sei moa: “Barava nogud samting nao bae kasem iufala wea savve tumas long Law, bikos iufala aotem key wea openem door for savve abaotem God. Iufala no go insaed datfala door and iufala trae for stopem olketa narawan wea laek go insaed tu!” (Luke 11:52) Olketa man hia shud teachim pipol for minim olketa Holy Raeting, bat olketa stopem pipol for no minim datwan.

Wanem nao olketa man wea teachim law and olketa Pharisee duim taem Jesus tok olsem? Taem Jesus start for go, olketa kros fogud and gohed askem hem enikaen kwestin. Olketa no ask from olketa laek lanem samting, bat olketa laek trikim Jesus for talem samting wea no stret mekem olketa savve holem hem.