A o iai Iesu i Iutaia, ua ia taliaina se valaaulia e faiʻaiga faatasi ma se Faresaio. E foliga mai o se taimi o le aoauli lea ua valaaulia ai o ia mo le taumafataga. (Luka 11:37, 38) A o leʻi faia le taumafataga, ua faia e le ʻau Faresaio la latou tū masani, o le fafano lea o o latou lima e oo i o latou tulilima. Ae e lē o faia faapea e Iesu. (Mataio 15:1, 2) O le mea moni, e lē solia le Tulafono a le Atua pe afai e fafano lima e oo i tulilima. Peitaʻi, o lenei tū masani e lē o se faiga e manaʻomia e le Atua.

Ua faateʻia le ʻau Faresaio i le vaai atu e lē o faia e Iesu lenei tū masani. Ua silafia e Iesu o latou manatunatuga, ma ua ia fetalai atu: “O outou le ʻau Faresaio, ua outou faamamā tua o le ipu ma le tanoa, a o totonu o outou ua tumu i mea ua faoa ma le amioleaga. O outou tagata vālea e! Tou te lē iloa ea, o lē na faia le tua o le ipu, na ia faia foʻi ma totonu?”—Luka 11:39, 40.

E lē faapea o le lē fufuluina o lima a o leʻi aai le faafitauli, ae o uiga faafiaamiotonu o le ʻau Faresaio ma isi tagata. E ui lava ua fai ma a latou masani le faia o lenei tū faalelotu o le fufulu o o latou lima, ae e lē o mafai ona faamamā o latou loto mai i mea leaga. O lea ua fautua atu ai Iesu iā i latou: “Ia foaʻi atu mea e fai ma meaalofa mai i o outou loto, ona mamā ai lea o isi mea uma ua iā te outou.” (Luka 11:41) Maʻeu le moni o nei upu! E tatau ona faia foaʻi ma se loto alofa, ae e lē faia ona o se faanaunauga e faaofo ai isi e ala i le faafoliga atu e amiotonu.

E lē faapea e lē o faia e nei tane ni foaʻi. Ua faailoa atu e Iesu: “Ua outou avatu mea e sefuluaʻi o le mili, ma le pekano, ma isi fualaau ʻaina uma, peitaʻi ua outou manatu māmā i le amiotonu ma le alofa i le Atua! O mea nei, na tatau ona outou faia, ae aua foʻi le tuua isi mea.” (Luka 11:42) I le Tulafono a le Atua, sa manaʻomia ona totogi atu le sefuluaʻi (po o le sefulu pasene) o fua o le laueleele. (Teuteronome 14:22) E aofia ai i na mea le mili ma le pekano ma isi fualaau ʻaina uma, lea e faamanogi ai meaʻai. Sa faamaoni le ʻau Faresaio i le totogiina atu o le sefuluaʻi mo nei fualaau ʻaina. Ae faapefea isi mea e sili atu ona tāua o loo taʻua i le Tulafono, e pei o le faia o le mea tonu ma savavali ma le Atua ma le faamaulalo?—Mika 6:8.

Ua fetalai atili atu Iesu: “Oi talofa iā te outou le ʻau Faresaio, auā ua outou fiafia i nofoa pito i luma i sunako ma faafeiloaʻiga a tagata i nofoaga faitele! Oi talofa iā te outou, auā ua pei outou o tuugamau ua lē iloa, ua savavali ai tagata ae latou te lē iloa!” (Luka 11:43, 44) Ioe, e mafai ona savavali tagata i luga o nei tuugamau e aunoa ma lo latou iloaina, ma lē mamā ai i latou e tusa ai ma le Tulafono. Ua faaaogā e Iesu lenei mea moni, e faamatilatila ai le faigatā ona iloa o le lē mamā o le ʻau Faresaio.—Mataio 23:27.

Ua faitio atu se tasi o i latou e atamai i le Tulafono a le Atua e faapea: “Le Aʻoaʻo e, ua e faatigā iā i matou i au upu.” Peitaʻi e tatau i nei tane ona iloa, e latou te lē o taulau i le avatuina o se fesoasoani i tagata. Ua faapea atu Iesu iā i latou: “Oi talofa iā te outou o ē e atamamai i le Tulafono, auā ua outou faaee atu avega mamafa i tagata, ae e tou te lē mananaʻo e sii i na avega i o outou tamatamaʻilima! Oi talofa iā te outou, auā ua outou fausia tuugamau o perofeta, ae na fasiotia i latou e o outou augātamā!”—Luka 11:45-47.

O avega o loo taʻua e Iesu, e faasino atu i uputuu ma le auala e faauiga ai e le ʻau Faresaio le Tulafono. E latou te faamalosia tagata ina ia tausisia nei mea uma, ma ua avea ai ma avega mamafa. O le faia faapea, ua faafaigatā ai e le ʻau Faresaio olaga o tagata. Ua latou faafoliga atu e pei o loo latou faamamaluina perofeta, e ala i le fausia o tuugamau mo i latou. Peitaʻi o le mea moni, ua latou faataʻitaʻi i uiga ma amioga a o latou augātamā, lea na fasiotia perofeta a le Atua e amata mai lava iā Apelu. Ua latou saʻilia foʻi se avanoa ina ia fasiotia ai le Perofeta sili a le Atua. Ua fetalai Iesu, o le a tali atu lenei tupulaga i le Atua ona o toto o nei perofeta. O le mea lenā na tupu pe tusa o le 38 tausaga mulimuli ane i le 70 T.A.

Ua faaauau le fetalaiga a Iesu: “Oi talofa iā te outou o ē e atamamai i le Tulafono, auā ua outou aveesea le ki o le malamalama; auā tou te lē ulu atu lava i ai, ua outou taofia foʻi i latou o le a ulu atu i ai!” (Luka 11:52) E tatau ona aʻoaʻoina atu e nei tane le uiga moni o le Afioga a le Atua, nai lo o lea, ua latou aveesea mai i tagata le avanoa e iloa ma malamalama ai e faatatau i lenei mea.

O le ā le auala ua tali atu ai le ʻau Faresaio ma le ʻautusiupu? A o maliu ese atu Iesu, ua amata ona latou tetee atu ma tuʻifesili o ia. E latou te lē o fesili atu ona o le fia malamalama. Peitaʻi, ua latou lamalama iā Iesu ina ia fetalai ane i se upu e mafai ona latou puʻea ai o ia.