Pabadi mu Yudeya, Yesu badi mukumiine lwitamino lwa kudya pamune na Mufadisee. Abimweneka shi bibadi kaanya, kushii kidiibwa kya ku kyolwa. (Luka 11:37, 38; pwandjikisha na Luka 14:12) Kumpala kwa kudya, Bafadisee abadi na kipikwa kya kwitumpa meema mpa na ku makongongo. Kadi Yesu tabakitshine byabya nya. (Mateo 15:1, 2) Tabibadya kwikala shi bayipayile Mwiya w’Efile Mukulu pa kupela kukita byabya, mwanda taubadi mwanda wabadi batekye kwi Efile Mukulu.

Bafadisee abakaanyine pa kumona shi Yesu taalondo kyakya kipikwa. Yesu badi mutundule byabya aye nkwamba shi: “Anwe Bafadisee, anusuulaa paasha pa kipulu naa pa kibaa; anka munda mwenu mmuwule na bungifi, na bukyelo. Bapatanakane’yi! Yawa mupangye paasha tammupangye na munda’nyi?”—Luka 11:39, 40.

Kusuula ku maasa kumpala kwa kudya takubadi mwanda nya, anka mwanda ubadi wa kwikala balangwidi bansesa. Bafadisee na bangi bantu abalondanga kipikwa kya kwiosha meema ku maasa abakutshile kutoosha mashimba aabo ku myanda iibubi. Nyi bwakinyi Yesu ebalanga shi: “Byaabya panaayi kya-buntu kya byaabya byooso bii munda, paapa bintu byoso aabikala bitooshiibwe kwanudi.” (Luka 11:41) Ubadi mwanda wa binyibinyi! Kupa muntu kantu kubadi na kya kutuukila mwishimba dya kifulo, kushii bwa kukaanyisha bangi bwabadya kwitumona bu balulame.

T’abilesha shi baba bantu tababadi abapa muntu kantu nya. Nyi bwakinyi Yesu aakula shi: ‘Anutuusha kyekumi kya lwenyi, kya byeenyeenyi na bintu byooso abimenaa mu lupango, aku anusumbusheena bululame na kifulo ky’Efile Mukulu. Kino nkibadi naa kya kukitshiibwa, kushii kupunganya yaaya imo myanda.’ (Luka 11:42) Mwiya w’Efile Mukulu ubatekanga shi muntu e kutuusha ky’ekumi kya bikunwanga byaaye. (Miiya Ikituulwe 14:22) Mu kyakya ky’ekumi mubadi na lwenyi na kyeenyeenyi, mapuupwa sunga mitshi ibabadi abeele mu byakudya bwa kwelesha eshiko. Bafadisee abadi abatuusha ky’ekumi kya ino mitshi, kadi twi kwamba naminyi pabitale Mwiya ukile bukata, bu wa kwikala na kululama na mwikeelo wibuwa kumpala kw’Efile Mukulu?—Mika 6:8.

Yesu atungunuka na kwakula shi: “Nwi ba-malwa, anwe Bafadisee, anwe bafule kushaala mu nkwasa ya-kumpala mu mashibo a nteko, na kusemiibwa mu bifumankeeno bya bantu booso. Nwi ba-malwa, anwe bee bu mashaama abashii batundule ku kintu su nkimune aabatambukila paanundu kwi bantu kushii kuwuka.” (Luka 11:43, 44) Eyendo, bantu abadi na kya kukokola aa mashaama na kufika bebutete muyile kipikwa. Nyi bwakinyi Yesu bafubiishe kino kileshesho bwa kuleesha shi, butete bwa Bafadisee tabubadi abamweneka nya.—Mateo 23:27.

Ungi muntu badi mwipaane mu Mwiya w’Efile Mukulu badi mwidile shi: “Mulambukishi, pa kwakula byaabya, bwetukaa n’atwe naamu.” Sunga mbyabya, baba bantu abadya kushinguula shi tababadi abakwasha bantu nya. Yesu nkwakula shi: “Anwe naamu bapatuudi ba bishila, nwi ba-mwalwa, mwanda anutenteka bantu biita bii bushito, byanushyaa bakumiina kukuma’nwe banabeene sunga na umune wa ku minwe yeenu. Nwi ba-malwa, anwe abayibaka mashaama a batemuki kutala ba masheenu nyi babadi beebayipee.”—Luka 11:45-47.

Biita bibadi abyakula Yesu bibadi bipikwa bya kukanwa na mpatulwilo a Miiya a Bafadisee. Bano bantu tababadi abeekasha bantu bulungantu nya. Anka, abadi abeebalongyesha miiya ikile bushito. Bankambwa babo abadi bepee batemuki b’Efile Mukulu kubanga ku Abele. Binobino, sunga mbibabadi abeebakila batemuki mashaama bwa kuleesha shi abadi abebaneemeka, bakwete kwambula bikitshinao na mwikeelo wa bankambwa babo. Bakwete mpa na kukimba bya kwipaa Mutemuki mukile bukata a Efile Mukulu. Yesu nkwamba shi bano bantu abakayimuka kumpala kw’Efile Mukulu. Uno mwanda ubalombene  kunyima kwa bipwa peepi 38, mu kipwa kya 70 B.B.

Yesu atungunuka shi: “Nwi ba-malwa, anwe bapatuudi ba bishila, anwe babadi baate lufungula lwa ku nshibo ya kyuukilo: Tanwi beemutwele anwe banabeene, kutala baba babatunganga kwimutwela nubadi bebakutshishe.” (Luka 11:52) Baba bantu abadi balombene kulongyesha Eyi dy’Efile Mukulu, bakwete nka penda kukutshishwa bantu mushindo wa kwidishinguula na kwidipatuula kalolo.

Bafadisee na bafundji ba mikanda abakitshine naminyi? Nsaa ibadi Yesu mubangye lwendo, ababangile kumushikwa na nsungu yooso na kumwela nkonko ibungi. Tababadi abamwipusha bwa kushinguula nya. Abadi abakimbi nka penda bya shi aakule mwanda umune wa shi bamona bya kumukwata.