We ku Yudeya, Yesu wangudanika kuti wakaryi chakurya kunyumba ya Mfarisi. Watenere kuti wangudanika kuti wakaryi chakurya cha msana. (Luka 11:37, 38; yeruzgiyani ndi Luka 14:12.) Ŵechendaryi chakurya, Afarisi asambanga mumanja kufika mukasukusuku mwakukoliyana ndi mudawuku wawu. Kweni Yesu wachitanga cha mudawuku wenuwu. (Mateyu 15:1, 2) Asani munthu waleka kusamba mumanja kufika mukasukusuku waswanga Dangu laku Chiuta cha. Kweniso Chiuta wanguŵalamulapu cha ŵanthu kuti achitengi venivi.

Mfarisi yo wangudana Yesu wanguzizwa ukongwa kuwona kuti Yesu wangulondo cha mudawuku wenuwu. Yesu wanguziŵa vo iyu waŵanaŵananga ndipu wangukamba kuti: “Sonu yimwi Afarisi musuka kubwalu kwa kapu ndi mbali kweni mukati mwinu mwazaza mbunu ndi vinthu viheni. Ŵanthu ambula zeru yimwi! Asi yo wakupanga kubwalu ndiyu wakupanga so mukati?”—Luka 11:39, 40.

Kuleka kusamba mumanja mwakukoliyana ndi mudawuku wawu yenga nkhani yikulu cha, kweni chinyengu cho alongozgi avisopa ŵenga nachu. Afarisi kweniso ŵanthu anyaki wo asambanga mumanja mwakulondo mudawuku wawu, atondekanga kutoweska mitima yawu mwakuleka kuchita vinthu viheni. Ndichu chifukwa chaki Yesu wanguŵapaska ulongozgi wakuti: “Vinthu vakutuliya mukati ndivu muperekengi nge mphasu zalisungu ndipu awonani! chechosi chakukwaskana ndi yimwi chazamukuŵa chakutowa.” (Luka 11:41) Venivi venga vauneneska chifukwa munthu wakhumbika kupereka mphasu kwa munyaki chifukwa chakuti watimuyanja. Iyu watenere cha kupaska munyaki mphasu chifukwa chakukhumba kukondwesa ŵanthu kweniso kujiwonesa kuti ndi murunji.

Yesu wang’anamuwanga kuti ŵanthu ŵenaŵa ŵengavi mtima wakupaska cha. Kweni wangukamba fundu yo wang’anamuwanga kuti: “Mupereka vatchumi va minti ndi luwe kweniso va mbewu zosi zakumadimba. Kweni muleke dala kuchita urunji kweniso kwanja Chiuta! Mwakhumbikanga nadi kuchita vinthu ivi, kweni mwakhumbikanga cha kuleka vinthu vinyaki ivi.” (Luka 11:42) Dangu laku Chiuta lakambanga kuti munthu weyosi waperekengi chatchumi cha vinthu vo iyu wakolola. (Marangu 14:22) Chatchumi chenichi chasazgangapu minti ndi luwe pamwenga vakume vo vinunkhirisa dendi. Afarisi ayesesanga kupereka chatchumi cha vinthu vosi venivi. Kweni atondekanga kuchita vinthu mwa urunji kweniso kuja akujiyuyuwa pa masu paku Chiuta. Mijalidu yeniyi yenga yakukhumbika ukongwa mu Dangu laku Chiuta.—Mika 6:8.

Yesu wangulutirizga kukamba kuti: “Soka Afarisi, chifukwa mutanja mipandu yakunthazi mumasinagogi kweniso kuti ŵanthu akutawuzgeningi mwaulemu mumisika! Soka kwaku yimwi, chifukwa mwe nge miwunda yambula kuwoneka yo ŵanthu atendapu ŵaka kwambula kuziŵa kuti pe miwunda!” (Luka 11:43, 44) Asani munthu wajumpha pa miwunda yaviyo, watingi waguŵengi vo vatingi vimuchitiskengi kuti waje wakufipiskika mwakukoliyana ndi mudawuku wa Ayuda. Yesu wangukamba fundu yeniyi kuti walongo kuti Afarisi ŵenga akufipiskika chinanga kuti awonekiyanga pa masu pa ŵanthu cha.—Mateyu 23:27.

Munthu munyaki yo waliziŵanga umampha Dangu laku Chiuta wangukambiya Yesu kuti: “Msambizi, vo mukamba po, munyoza so isi.” Munthu mwenuyu wakhumbikanga kuziŵa kuti Afarisi atondekanga kuwovya ŵanthu. Yesu wangukamba kuti: “Soka namwi so akuziŵa Dangu, chifukwa muzitiska ŵaka ŵanthu ndi katundu muzitu, kweni yimwi mwaŵeni mutimukwaska cha ndi chikumbu chinu. Soka kwaku yimwi, chifukwa muzenga miwunda ya achimi kweni apapi ŵinu akali ndiwu anguŵabaya!”—Luka 11:45-47.

Pakukamba kuti katundu muzitu, Yesu wang’anamuwanga midawuku kweniso vinthu vinyaki vo Afarisi akambanga pakukonkhoska Dangu laku Mozesi. Afarisi ŵenaŵa achitiskanga kuti ŵanthu apanikizikengi ukongwa. Kweni aŵachichizganga mbwenu kuti alondongi marangu ngo yiwu angujalikiska. Apapi ŵa Afarisi ŵenaŵa, angubaya achimi aku Chiuta kwambiya mu nyengu yaku Abelu. Chinanga kuti Afarisi ŵenaŵa awonekanga nge kuti atumbika achimi mwakuŵazenge miwunda, yiwu achitanga vinthu kweniso aŵanaŵananga mwakuyanana ndi apapi ŵawu. Pa nyengu iyi, akhumbanga kubaya Mchimi mura waku Chiuta. Yesu wangukamba kuti Chiuta wazakuŵalanga chifukwa cha vo achitanga. Ndipu Chiuta wanguŵalanga nadi mu chaka cha 70 C.E. pati pajumpha vyaka 38.

 Yesu wangulutirizga kukamba kuti: “Soka yimwi akuziŵa Dangu, chifukwa muphanga ŵanthu ki wakuziŵiya vinthu. Yimwi mwaŵeneku museremu cha, ndipu wo akhumba kuseremu nawu mutiŵakaniza!” (Luka 11:52) Afarisi ŵenaŵa wo ŵenga ndi udindu wakusambiza ŵanthu vo Mazu ngaku Chiuta ngang’anamuwa, atondekeskanga ŵanthu kuziŵa ndipuso kuvwisa vo Mazu ngaku Chiuta ngakamba.

Kumbi Afarisi ndi alembi anguchita wuli ŵati ŵavwa vo Yesu wangukamba? Pa nyengu yo Yesu wakhumbanga kusoka kuti wakengi, yiwu angukwiya ukongwa ndipu angwamba kumususka kweniso kumupanikizga ndi mafumbu. Yiwu amufumbanga mafumbu ngenanga kuti asambirepu kanthu cha. Kweni akhumbanga kuti Yesu wamuki mazu ngo ngatingi ngachitiskengi kuti amusaniyi ndi mulandu kuti amumangi.