Nacili mu Judaya, Jesu wazumina kwiitwa kucakulya kumu Farisi. Kulangilwa kuti eeci ncakulya camasyikati ikutali cilalilo pe. (Luka 11:37, 38; amweezyanisye a Luka 14:12.) Kabatanatalika kulya, ba Farisi balasamba kumaanza mane kusika kutukokola kweelana acilengwa cabo. Pele Jesu tanaacita oobo pe. (Matayo 15:1, 2) Inga tiikwaba kutyola Mulawo wa Leza kusamba munzila eeyi, pele Leza tabikkide mulawo wakuti eeci ceelede kucitwa.

Mu Farisi wagambwa kuti Jesu tanaatobela cilengwa eeci. Jesu wabona kuti mu Farisi wagambwa, eelyo waamba kuti: “Lino nywebo noba Farisi, musanzya buyo kunze aankapu amutiba pele mumyoyo yanu muzwide buyo busyaacivwulemwangu abubi. Nywebo nobafwubafwuba! Sena ooyo wakapanga anze tali ngonguwe wakapanga amukati?”—Luka 11:39, 40.

Ikaambo kaliko aawa takuli kusamba kumaanza muntu katanalya pe, pele kajatikizya kuupaupa ameso mumakani aabukombi. Ba Farisi alimwi abambi ibasamba kumaanza kweelana acilengwa cabo balaalilwa kusalazya myoyo yabo kububi buli mulinjiyo. Aboobo Jesu wabapa lulayo lwakuti: “Amupe zintu zili mumyoyo yanu kazili zipego zyaluse, eelyo zintu zyanu zyoonse ziyoosalala.” (Luka 11:41) Eelo kaka nkamasimpe kaambo aaka! Muntu weelede kupa akaambo kaluyando iluli mumoyo wakwe ikutali akaambo kakuyanda kwaambwa kuti mwaabi naa kubonwa aabantu kuti mululami.

Takuli kuti bantu aaba mbaunyu pe. Jesu waamba kuti: “Mulapa cakkumi cazisyu zyaluyuni azisyu zimwi zyoonse, pele tamubikkili maano kubululami aluyando lwa Leza! Eezyi zintu mwakaleelede kuzicita, pele eezyo zintu zimwi tiimwakeelede kuzisotoka azyalo.” (Luka 11:42) Mulawo wa Leza wakali kwaamba kujatikizya kupa zyakkumi (cipaanzi cakkumi) zyazisyango zyoonse. (Deuteronomo 14:22) Eeco cakali kubikkilizya zisyu zyaluyuni azisyu zimwi zyoonse izyakali kubelesyegwa kunozya cakulya. Ba Farisi bakali kubikkila maano kapati kupa cakkumi cazisyu eezyi, pele ino mbuti kujatikizya zintu izyakali kuyandika kapati eezyo Mulawo nzyowakali kwaamba kuti kazicitwa, mbuli kucita bululami alimwi akweenda cakulibombya kumbele lya Leza?—Mika 6:8.

Jesu wazumanana kwaamba kuti: “Maawe kulindinywe noba Farisi, nkaambo muyanda zyuuno zyakumbele muzikombelo akwaanzyigwa mumisika! Maawe kulindinywe, nkaambo muli mbuli zyuumbwe eezyo zitalibonyi cakuti bantu baleenda alinzizyo kabatazyi!” (Luka 11:43, 44) Ncobeni, bantu balakonzya kulijana aazyuumbwe eezyi cakutayeeyela akusofwaala mumakani aabukombi. Jesu wabelesya kaambo aaka kutondezya kuti busofwaazi bwaba Farisi tabulibonyi.—Matayo 23:27.

Muntu umwi uuzyi kapati Mulawo wa Leza watongooka ategwa: “Omwiiyi, mukwaamba boobo nkokuti watutukila andiswe.” Pele bantu bali boobo beelede kuzyiba kuti cabaalila kugwasya bantu. Jesu waamba kuti: “Maawe akulindinywe nomuzyi Mulawo nkaambo mutukka bantu mikuli iiminya kunyamuna, kakuli nywebo nobeni tamusoli kwiiguma mikuli eeyo nokuba akanwe buyo! Maawe kulindinywe nkaambo muyaka zyuumbwe zyabasinsimi kakuli bamauso mbabakabajaya!”—Luka 11:45-47.

Mikuli njaamba Jesu ntunsiyansiya twabantu alimwi abupanduluzi mbobapa ba Farisi kujatikizya Mulawo. Baalumi aaba bayumizyila bantu buumi muciindi cakubalemununa. Bazumanana kwaamba kuti bantu boonse beelede kutobela milawo iili mbuli mikuli iiminya. Basikale babo bakajaya basinsimi ba Leza, kuzwa kuli Abelo kuyakumbele. Lino aaba mbamunya ibacita mbuli kuti balemeka basinsimi aabo kwiinda mukuyaka zyuumbwe zyabo, batobela mizeezo alimwi amicito yabamausyi. Mane bayanda kujaya Musinsimi wa Leza mupati kwiinda boonse. Jesu waamba kuti Leza uyoolipa mulandu zyalani eeli. Alimwi eeci cakacitika ncobeni nokwakainda myaka iisika ku 38, mu 70 C.E.

 Jesu wazumanana kuti: “Maawe kulindinywe nomuzyi Mulawo, nkaambo mwakanyanga bantu kkii yaluzyibo. Nywebo nobeni tiimwakanjila alimwi aabo bayanda kunjila mulabalesya!” (Luka 11:52) Baalumi aaba ibeelede kukkiinuda bantu naa kubayiisya cini ncolyaamba Jwi lya Leza, mubwini banyanga bantu coolwe cakulizyiba akulimvwisya.

Ino ba Farisi abalembi bacita buti nobamvwa boobo? Jesu naanyamuka kuti aunke, batalika kumukazya cabukali akumubuzya mibuzyo minji. Tababuzyili kuti kuli ncobayanda kwiiya pe. Muciindi caboobo, balimuteyede Jesu, bayanda kuti aambe cintu cimwi ncobakonzya kumwaangila mpawo.