Akxni Jesús wijku kJudea, chatum fariseo wani pi kaʼalh tawayan kxchik, max kakuwaniku (Lucas 11:37, 38; katamalakxtumi Lucas 14:12). Akxni nina wayankgo, fariseos makgachakgankgo asta kxmakglhtsankan, pero Jesús ni chuna tlawa (Mateo 15:1, 2). Maski uma ni lakatsala xLimapakgsin Dios, na ni xlakaskinka natlawakan.

Fariseo kaks lilakawan akxni akxilha pi Jesús nichuna tlawa, pero Jesús katsi chu wani: «Wixin, fariseos, kamaskulunkiyatit xmaknikan copa chu pulatu, pero kminakujkan lu lhuwa tuku kgalhiputunatit chu tlawayatit tuku lixkajni. ¡Lu xalaktonto wixin! ¿Ni katsiyatit pi tiku tlawalh xmakni na tlawalh xpulakni?» (Lucas 11:39, 40).

Tuku xlakaskinka akxni wayankan ni wa pi namakgachakgankan o ni, wata wa pi xpulalinanin takanajla lakgaputiyunankgo. Fariseos chu amakgapitsi tiku chuna makgachakgankgo ni maskulunkimakgo xnakujkan. Wa xlakata Jesús kamaxki uma tastakyaw: «Tuku wi kminakujkan kakamatlawin pi natlawaputunatit tuku tlan xpalakata tiku limaxkgenin. Komo chuna natlawayatit mimputuminikakan xaskulunku nawanatit» (Lucas 11:41). ¡Lu xlikana tuku wan! Akxni namastayaw tamaskiwin, xliputum kinakujkan kilimastatkan, ni kaj xlakata kaks nakamalakawaniyaw amakgapitsin o xlakata naʼakxilhkan pi tlan likatsiyaw.

Uma ni wamputun pi umakgolh latamanin nitu mastakgo, xlakata Jesús kawani: «Mastayatit diezmo xla hierbabuena chu xla ruda chu atanu tuwan nema wakan, pero ni paxkinanatit chuna la Dios chu ni tlawayatit tuku xaʼakgstitum». Chu kawanipara: «Xlakaskinka xwanit namastayatit diezmo, pero chuntiya xmakgantaxtitit umakgolh amakgapitsin» (Lucas 11:42). Anta kxLimapakgsin Dios kskin pi xlitamastat diezmo (xlipulakkaw) tuku xmakgalakgo kxkapukuxtunkan (Deuteronomio 14:22). Na anta xmakgtanu menta, ruda chu amakgapitsi tuwan nema xtamaklakaskin xlakata xmakgamika liwat. Fariseos mastakgo xlipulakkaw xla putum tuwan, pero ¿la xlilakaskinka akxilhkgo tuku skin Limapakgsin, la xaʼakgstitum chu ni laktlankajwa nalikatsikan? (Miqueas 6:8).

Jesús kawanipara: «¡Kgoxotanin wixin, fariseos, xlakata lu lakgatiyatit tlakg xapulana laktawilh nema wilakgolh ksinagogas chu lakgatiyatit pi kakamaxkikantit kakni akxni katachuwinankanatit kplaza niku stanankan! ¡Kgoxotanin wixin, xlakata litaxtuyatit chuna la putaknun nema ni liwana tasiyakgo, wa xlakata latamanin akgspuntlawankgo chu ni katsikgo!» (Lucas 11:43, 44). Chuna, latamanin tlan xʼakgspuntlawankgo umakgolh putaknun xlakata ni xtasiyakgo chu xaxkajwa xwankgolh. Jesús maklakaskin uma xlakata nalimasiya pi tuku nitlan kgalhikgo xnakujkan fariseos ni tasiya (Mateo 23:27).

Chatum tiku liwana lakgapasa Limapakgsin wan: «Makgalhtawakgena, akxni lichuwinanti umakgolh na lixkajni kinkawani akinin». Pero uma lakchixkuwin xlikatsitkan pi ni kamakgtayamakgo latamanin. Jesús kgalhti: «¡Na kgoxotanin wixin, tiku liwana lakgapasatit Limapakgsin, xlakata wiliyatit kxpakgxtunin latamanin laktsinka takuka, pero wixin ni limatsuwiputunkgoyatit takuka maski kaj kgantum mimakankan! ¡Kgoxotanin wixin, xlakata kaxtlawaparayatit xputaknunkan palakachuwinanin, pero xalakgmakgan minatlatnikan kamakgnikgolh!» (Lucas 11:45-47).

Laktsinka takuka nema lichuwinama Jesús, wa talismanin chu tuku fariseos wankgo pero ni tatsokgnit kLimapakgsin. Uma lakchixkuwin ni kamakgtayamakgo latamanin, wata wankgo pi xlimakgantaxtitkan tastakyaw nema xtachuna laktsinka takuka. Xamakgan xnatlatnikan kamakgnikgolh xpalakachuwinanin Dios, xapulana tiku makgnikgolh wa Abel. La uku, xlakan limasiyaputunkgo pi kamaxkikgo kakni palakachuwinanin akxni kalakkaxtlawanikgo xputaknunkan, pero tlawamakgo chuna la xamakgan xnatlatnikan, chu watiya tapuwan kgalhikgo. Asta lakputsamakgo la  namakgnikgo tlakg xlakaskinka palakachuwina. Wa xlakata, Jesús wan pi Dios nakamalakgaxokge uma latamanin. Xtachuwin nakgantaxtu puxamakutsayan kata alistalh, kkata 70.

Jesús wampara: «¡Kgoxotanin wixin tiku lu lakgapasatit Limapakgsin, xlakata mapanuyatit llave xla takatsin. Wixin ni tanutit chu ni mastayatit talakaskin natanukgo tiku tanuputunkgo!» (Lucas 11:52). Xlakan kalakgchan nakawanikgo latamanin tuku wamputun xTachuwin Dios, pero ni kamakgtayakgo nalakgapaskgo chu naʼakgatekgskgo.

¿Tuku tlawakgo lakgtsokgkinanin chu fariseos? Akxni Jesús taxtu, lu sitsikgo chu tsukukgo tlawanikgo lhuwa takgalhskinin. Pero nixlikana katsiputunkgo, wata tlawaputunkgo pi kawa tuku ni xlilat xlakata tlan nachipakgo.