I te taimi koi nofo atu ei i Iuta, ne talia ne Iesu a te ‵kamiga ki se ‵kaiga mai i se Falesaio. Kāti ki se ‵kaiga i te ao, kae e se ko te afiafi. (Luka 11:37, 38; fakatusa ki te Luka 14:12.) A koi tuai o ‵kai, ne fai ne te kau Falesaio te faiga masani o te ‵fuluga o olotou lima, ke oko eiloa ki olotou tulilima. Kae ne seki fai penā a Iesu. (Mataio 15:1, 2) E se taia i te Tulafono a te Atua a te tuu tenā, kae e sē se mea e manako ki ei te Atua ke fai ne tatou.

Ne ofo te Falesaio me ne seki tautali atu a Iesu ki te tuu tenā, kae ne iloa ‵lei ne Iesu a te mea tenei kae fai atu: “A koutou e Falesaio, e ‵fulu ne koutou te tua o te ipu mo te tifa, kae i loto i a koutou e ‵fonu i te kaimanako mo mea ma‵sei. Tino va‵lea! A te tino telā ne faite ne ia te tua o te ipu ne faite foki ne ia te koga i loto, e tonu au?”—Luka 11:39, 40.

A te ‵fuluga o lima ke ‵ma a koi tuai o kai e se ko te fakalavelave, kae ko te amio fakaloi‵loi i mea fakalotu. Ne ‵fulu fua ne te kau Falesaio mo nisi tino olotou lima kae fakata‵mala ke ‵fulu olotou loto mai i amioga ma‵sei. Ne fakatonutonu ne Iesu a latou: “Tuku atu a mea i otou loto mo fai otou meaalofa, kae kiloke! ka ‵ma foki a mea katoa e uiga ki a koutou.” (Luka 11:41) Ko oko eiloa i te ‵tonu o te manatu tenā! A te tukuatuga o meaalofa e ‵tau o māfua mai i te loto alofa, kae e se ko te fia fai ke ōfo a nisi tino i te amiotonu fakaloiloi.

E se fakauiga i ei me e se tuku atu ne tāgata konei a mea. Ne fai ‵tonu atu a Iesu: “Kae kalofa eiloa i a koutou e Falesaio, me e tuku atu ne koutou te tasi-vae-sefulu o fuaga o te mili mo te pekano mo laulakau kaina katoa i te fatoaga, kae e manatu ma‵ma koutou ki te amiotonu mo te alofa o te Atua! A mea konei e ‵tau eiloa o fai ne koutou, kae ke mo a foki ma manatu ma‵ma koutou ki nisi mea konā.” (Luka 11:42) I te Tulafono a te Atua, ne ‵tau o ‵togi atu te tasi vae sefulu o fuataga. (Teutelonome 14:22) Ne aofia i te mea tenā a tamā fuaga, ko te mili mo pekano, mea fakama‵nogi io me ko lakau, kolā e fakaaoga mo fakamanogi gali a mea‵kai. Ne ‵togi katoatoa ne te kau Falesaio a te tasi vae sefulu o vaegā fuaga fo‵liki kae sē taulia konā, kae e a mea kolā e sili atu i te tāua i te Tulafono, e pelā mo te fakaasi atu o te fakamaoni mo te loto maulalo i mua o te Atua?—Mika 6:8.

Ne toe fai atu a Iesu: “Kalofa eiloa i a koutou e Falesaio, me e fia saga‵saga koutou i nofoga tafa ki mua i sunako kae ke fakatalofa atu a tino ki a koutou i fale maketi! Kalofa eiloa i a koutou, me i a koutou e ‵pau eiloa mo tānuga kolā e se mafai o lavea faka‵lei, e sa‵sale a tino i luga i ei e aunoa mo te iloa ne latou.” (Luka 11:43, 44) Ao, ne mafai o ‵siga a tino i luga i vaegā tānuga penā kae e fai latou ke se ‵ma. Ne fakaaoga ne Iesu te manatu tenā ke fakaasi atu ei a te laveagofie o te sē ‵ma o te kau Falesaio.—Mataio 23:27.

Ne fameo atu se tagata telā ne iloa ‵lei ne ia te Tulafono a te Atua: “Te Faiakoga, ko fakalogo‵mae foki ne koe matou i au pati konā.” Kae ne ‵tau o iloa ne tāgata penā me ne fakata‵mala latou o fesoasoani atu ki tino. Ne fai atu a Iesu: “Kalofa foki eiloa i a koutou kolā e ‵poto i te Tulafono, me e fakaeke ne koutou ki luga i tino a amoga kolā e faigata o amo, kae e se fakapatele atu eiloa se matikao e tasi o koutou ki amoga konā! Kalofa eiloa i a koutou, me e faite ne koutou a tanuga o pelofeta, kolā ne tamate ne otou tupuga.”—Luka 11:45-47.

A amoga kolā ne fakasino a Iesu ki ei, ko tuu kolā ne taku mai ne latou kae ne fai ne Falesaio mo fai ne Tulafono. Ne seki fakafaigofie ne tāgata konei a olaga o tino. I lō te fai penā, ne kinau atu eiloa latou me e ‵tau o tausi ne latou a mea kolā ne fai mo fai ne amoga ‵mafa. Ne tamate ne olotou tupuga a pelofeta a te Atua mai i a Apelu o vau ki mua. Nei la, ko fakafoliga mai ne latou me e āva latou ki pelofeta, mai te faitega o tanuga mō latou, kae ko fakaakoako eiloa latou ki uiga mo faifaiga o olotou tupuga. Ne taumafai eiloa latou o tamate a te ‵toe Pelofeta sili a te Atua. Ne fai mai a Iesu me ka fakasala eiloa ne te Atua a te kautama tenei. Kae ne taunu eiloa te mea tenā i te 38 tausaga mai tua ifo i ei, i te 70 T.A.

Ne toe fai atu a Iesu: “Kalofa eiloa i a koutou kolā e ‵poto i te Tulafono, me ne ave keatea ne koutou te  kī o te malamalama. E se ulu atu koutou ki loto, kae e taofi foki ne koutou a latou kolā e ulu ki loto i ei!” (Luka 11:52) A tāgata konei, kolā ne ‵tau o fakamatala atu ne latou te Muna a te Atua, ko ave keatea ne latou a te avanoaga ke iloa ne tino kae malamalama i ei.

Ne a lagonaga o te kau Falesaio mo failautusi ki ei? I te taimi ne fano keatea ei a Iesu, ne kamata o ‵teke malosi atu latou ki a ia mo te kaitaua kae fai atu ne latou a fesili e uke ki a ia. Ne seki fesili atu ona ko te fia malamalama. I lō te fai penā, ne ma‵nako latou o fakatogafiti a Iesu ke fai atu ne ia se mea telā e mafai ei o puke fakapagota ne latou a ia.