Le tiaʼan Jesús Judeaoʼ invitartaʼab janal tumen juntúul fariseo (Lucas 11:37, 38). Táanil tiʼ u janal le fariseoʼoboʼ suukaʼan u pʼoʼik u kʼaboʼob tak tu kúukoʼob. Baʼaleʼ Jesuseʼ maʼ tu beetaj beyoʼ (Mateo 15:1, 2). Leloʼ maʼatech u bin tu contra baʼax ku yaʼalik u Ley Dios, tumen maʼatech u yaʼalik ka beetaʼak.

Le fariseooʼ jaʼakʼ u yóol ka tu yilaj maʼ tu beetaj Jesús beyoʼ. Letiʼeʼ u yojel baʼax ku tuklik, le oʼolal tu yaʼalajtiʼ: «Teʼex fariseoʼexeʼ ka pʼoʼikeʼex u paach le copa yéetel le platooʼ, baʼaleʼ ichileʼexeʼ chuupeʼex yéetel baʼaloʼob kʼaastak bey xan yéetel u tsʼíibolalil u yantalteʼex yaʼab baʼaloʼob. ¡J-maʼ naʼateʼex! ¿Maʼ wa le máax beet le baʼax yaan paachiloʼ letiʼ beet xan le baʼax yaan ichiloʼ?» (Lucas 11:39, 40).

U pʼoʼik u kʼaab máak táanil tiʼ u janaleʼ maʼ kʼaasiʼ, u kʼaasileʼ maʼ u adorartik máak Dios jeʼex unajeʼ. Le fariseoʼob yéetel uláakʼ máakoʼoboʼ ku pʼoʼik u kʼaboʼob, baʼaleʼ maʼatech u limpiartik u puksiʼikʼaloʼob. Le oʼolal Jesuseʼ tu yaʼalajtiʼob: «Utiaʼal a weʼeskeʼex chʼaʼ óotsilileʼ tsʼáaʼex le baʼaloʼob maʼalobtak yaan ichil a puksiʼikʼaleʼex tiʼ le máaxoʼob óotsiloʼoboʼ; bey túunoʼ tuláakal le u maasil baʼaloʼoboʼ yaan u pʼáatal limpioil a tiaʼaleʼex» (Lucas 11:41). Le baʼax tu yaʼaloʼ jach jaaj. Tumen tu puksiʼikʼal máak unaj u síijil u tsʼáaik wa baʼax, maʼ chéen utiaʼal ka ilaʼak jach maʼalob baʼax ku beetkiʼ.

Baʼaleʼ maʼ tumen wa maʼatech u tsʼáaik le fariseoʼob wa baʼaxoʼ. Jesuseʼ tu yaʼalaj: «[¡]Ka tsʼáaikeʼex u diezmoil le hierbabuenaoʼ, le rudaoʼ yéetel le uláakʼ janalbeʼen xíiwoʼoboʼ, baʼaleʼ ka tsʼáaikeʼex juntséelil u justicia yéetel u yaabilaj Dios! Kʼaʼabéet kaʼach a tsʼáaikeʼex le diezmooʼ, baʼaleʼ maʼ unaj kaʼach u xuʼulul a beetkeʼex le uláakʼ baʼaloʼobaʼ» (Lucas 11:42). U Ley Dioseʼ ku yaʼalik ka tsʼaʼabak u diezmoil tuláakal janalbeʼen neekʼoʼob (Deuteronomio 14:22). Ichileʼ tiaʼan le hierbabuena yéetel le ruda ku meyaj utiaʼal u xaʼakʼ le janaloʼ. Le fariseoʼoboʼ jach ku yilik kaʼach u tsʼáaikoʼob u diezmoil le janalbeʼen xíiwoʼoboʼ, baʼaleʼ le baʼax maas kʼaʼanaʼan ku yaʼalik le Ley ka beetaʼak, jeʼex u yeʼesik máak justicia yéetel u yeʼesik kabal óolaloʼ, maʼatech u beetkoʼob (Miqueas 6:8).

Jesuseʼ seguernaj u yaʼaliktiʼob: «¡Óotsileʼex fariseoʼex, tumen uts ta tʼaan a kutaleʼex teʼ kúuchiloʼob maas maʼalobtak teʼ sinagogaʼoboʼ bey xan a tsiʼikileʼex teʼ kʼíiwikoʼoboʼ! ¡Óotsileʼex, tumen beyeʼex jeʼex le muknaloʼob maʼ chíikaʼan u yilaʼaloʼoboʼ, le oʼolaleʼ le máakoʼoboʼ ku máanoʼob tu yóokʼoloʼob, baʼaleʼ maʼ tu tsʼáaikoʼob cuenta!» (Lucas 11:43, 44). Jach beyoʼ, wa ka lúubuk le máakoʼob ichiloʼ jeʼel tak u pʼáatloʼob sucioil tu táan Dioseʼ. Bey úuchik u yeʼesik Jesús maʼ chíikaʼan u yilaʼal wa sucio yanil le fariseoʼob tu táan Diosoʼ (Mateo 23:27).

Juntúul máak jach u kʼaj óol u Ley Dioseʼ tu yaʼalajtiʼ: «J-Kaʼansaj, ken a waʼal le baʼaloʼobaʼ tak toʼon ka pochʼkoʼon». Letiʼobeʼ unaj u naʼatkoʼob maʼ táan u yáantkoʼob le máakoʼoboʼ. Jesuseʼ tu yaʼalaj: «¡Óotsileʼex teʼex máaxeʼex jach a xokmeʼex baʼax ku yaʼalik le Leyoʼ, tumen ka tsʼáaikeʼex kuuchoʼob istikyaj u bisaʼal tumen le máakoʼoboʼ, baʼaleʼ teʼexeʼ maʼ a kʼáat mix a macheʼex yéetel junpʼéel u yaal a kʼabeʼexiʼ! ¡Óotsileʼex, tumen ka beetkeʼex u muknal le profetaʼoboʼ, baʼaleʼ a úuchben láakʼtsileʼex kíimsoʼob!» (Lucas 11:45-47).

Le kuuchoʼob tu yaʼalaj Jesusoʼ letiʼe baʼaxoʼob suukaʼan u beetaʼaloʼ yéetel letiʼe bix u yaʼalaʼal tumen le fariseoʼob ka beetaʼak le baʼax ku yaʼalik le Leyoʼ. Letiʼobeʼ ku talamkúuntkoʼob u kuxtal le israelitaʼoboʼ. Ku yaʼalikoʼob jach baʼax unaj u beetaʼal, lelaʼ ku aalkúuntik u kuuch le máakoʼoboʼ. U úuchben chʼiʼibaloʼobeʼ tu kíimsoʼob u profetaʼob Dios, le yáaxoʼ Abel. Beoraaʼ letiʼobeʼ ku tuklikoʼobeʼ táan u yeʼeskoʼob tsiikil tiʼ le profetaʼob ikil u beetkoʼob u muknaloʼoboʼ, baʼaleʼ chéen táan u beetkoʼob le baʼaloʼob u beetmaj u yúuchben chʼiʼibaloʼoboʼ.  Letiʼobeʼ táan u yilkoʼob u kíimskoʼob xan u profeta Dios. Jesuseʼ tu yaʼaleʼ Dioseʼ yaan u kʼáatik cuenta tiʼ letiʼob. Lelaʼ béeychaj tu jaʼabil 70, óoliʼ 38 jaʼaboʼob aʼalaʼaktiʼob tumen Jesús.

Jesuseʼ seguernaj u yaʼalik: «¡Óotsileʼex teʼex máaxeʼex jach a kʼaj óoleʼex baʼax ku yaʼalik le Leyoʼ, tumen ta luʼseʼex le llave jeʼik u joonajil le kʼaj óolaliloʼ; teʼexeʼ maʼ ookeʼexiʼ, yéetel maʼ ta chaʼajeʼex xan u yokol le máakoʼob táan kaʼach u yookloʼoboʼ!» (Lucas 11:52). Letiʼobeʼ unaj u yáantkoʼob u maasil máakoʼob u naʼatoʼob baʼax ku yaʼalik u Tʼaan Dios, baʼaleʼ ku luʼskoʼob u páajtalil u kankoʼob yéetel u naʼatkoʼob baʼax ku yaʼalik.

¿Baʼax túun tu beetaj le fariseoʼoboʼ? Le táan u lukʼul Jesús yiknaloʼoboʼ pʼuʼujoʼob tu contra, ka joʼopʼ u beetkoʼob yaʼab kʼáatchiʼob tiʼ. Baʼaleʼ maʼ tumen wa taak u maas kaanbaloʼobiʼ. Baʼaxeʼ chéen utiaʼal u yilkoʼob baʼax jeʼel u yaʼalik utiaʼal u líikʼloʼob tu contraeʼ.