Laga nuuruʼ Jesús Judea, biʼniʼ invitar ti fariseu laabe chitobe ra lidxi, zándaca ridxíʼ ne cadi huaxhinni (Lucas 11:37, 38; bichaaga ni né Lucas 14:12). Qué riná ca fariseu gocaʼ pa qué quibinacaʼ dede lu codo, peru Jesús qué ñuni ni (Mateo 15:1, 2). Neca cadi cucheenécabe Ley stiʼ Dios pa quibinácabe dede lu codo, peru cadi naquiiñeʼ guni obligárcabe binni guni ni.

Guizáʼ bidxagayaa fariseu que purtiʼ qué rinanda Jesús tradición ca, ne bidii Jesús cuenta, ngue runi gudxi laabe: «Laatu, ca fariseu, riguiibitu ladi copa ne bladuʼ, peru ndaaniʼ ladxidoʼto dxaʼ guiráʼ ni ricá ique binni gapa ne guiráʼ cosa malu. ¡Binni huati caʼ! ¿Cadi dxandíʼ ni bizáʼ ni fuera ngaca bizáʼ ni dentru la?» (Lucas 11:39, 40).

Cadi cucheecabe pa quibinácabe o pa coʼ, ni malu nga qué rinándacabe ni rusiidicabe. Ca fariseu ne xcaadxi binni ni rinanda tradición riʼ cadi cusiacaʼ ladxidoʼcaʼ de cosa malu. Ngue runi bidii Jesús laacabe conseju riʼ: «Lagudii ca cosa ni riree ndaaniʼ ladxidoʼto para gacanetu ca pobre, ne guidubi nácatu zaca nayá» (Lucas 11:41). ¡Dxandíʼ ni guníʼ Jesús! Ora gudiʼnu xiixa regalu, cadi gudiʼnu ni para si guʼyaʼ binni laanu ninca para guluinu nácanu binni nachaʼhuiʼ, sínuque gudiʼnu ni de guidubi ladxidoʼno né guendarannaxhii.

Qué riníʼ nga qué rudii ca hombre que gastiʼ de ni nápacaʼ, purtiʼ Jesús peʼ guníʼ: «¡Pobre si de laatu, fariseu caʼ, purtiʼ rudiitu décima parte stiʼ menta, stiʼ ruda ne guiráʼ clase guixihuiiniʼ, peru qué rulábitu justicia stiʼ Dios ne guendarannaxhii stiʼ!». Ne guniʼruʼ: «Naquiiñeʼ gúnitu ca cosa ni biete primé ca, peru sin gusaana de gúnitu xcaadxi cosa riʼ» (Lucas 11:42). Rinabaʼ Ley stiʼ Dios gudiicabe diezmu (décima parte) ni biasa lu layú stícabe (Deuteronomio 14:22). Casi menta, ruda, ne guiráʼ clase guixihuiiniʼ ne yagahuiiniʼ ni riquiiñeʼ para gudii sabor guendaró. Siempre riguixe ca fariseu diezmu stiʼ ca guixihuiiniʼ riʼ, peru ¿ñee rusisácacabe ca cosa ni jma risaca zeeda lu Ley, casi gúnicabe ni jneza ne gácacabe humilde nezalú Dios la? (Miqueas 6:8).

Guniʼruʼ Jesús: «¡Pobre si de laatu, fariseu caʼ, purtiʼ riuuláʼdxitu cuitu lu ca banguʼ nuu delante ndaaniʼ ca sinagoga ne ugapadiuxi binni laatu ra plaza stiʼ luguiaa! ¡Pobre si de laatu, purtiʼ zeeda gácatu casi baʼ ni qué rihuinni: ridiʼdiʼ binni lúcani sin ganna!» (Lucas 11:43, 44). Zacá ni, zanda tidiʼ binni lu ca baʼ que sin gudii cuenta ne gácacaʼ nabiidiʼ casi ná Ley. Guníʼ Jesús ndiʼ para gusiene qué rihuinni pabiáʼ nabiidiʼ nuu ca fariseu que (Mateo 23:27).

Óraque bicabi tobi de ca maestru de Ley que: «Maestru, ora riniʼluʼ zacá, laaca cucaaluʼ ni laadu». Peru ni dxandíʼ nga naquiiñeʼ gudii ca hombre riʼ cuenta cadi cayúnicaʼ gastiʼ para gacanecaʼ binni. Para bicabi Jesús laabe: «¡Pobre si de laatu, ca maestru de Ley, purtiʼ ruguaʼtu binni carga ni guirutiʼ zanda guáʼ, peru laapetu qué rigáʼnatu ni né ti bicuininatu! ¡Pobre si de laatu, rucuitu baʼ stiʼ ca profeta, peru ca bixhozebiidatu biiti laacaʼ!» (Lucas 11:45-47).

Ca carga ni caníʼ Jesús nga ca tradición ni riníʼ ca fariseu naquiiñeʼ gaca ne modo riénecaʼ Ley. Nabé nagana ca cosa ni rinábacabe guni binni, nuucabe chinanda binni ca regla ni riguíxhecabe, pur nga beeda gácacani ti carga nanaa para ca binni que. Biiti ca bixhozebiidacabe ca profeta stiʼ Dios, casi Abel. Yanna nuu ca fariseu que guluiʼcaʼ rusisácacaʼ ca profeta que ra gucuicaʼ baʼ stícabe, peru ni dxandíʼ nga cayúnicabe ca cosa ni biʼniʼ ca bixhozebiidacabe, ne qué rúnicabe ni de guidubi ladxidóʼcabe. Dede cuyúbicabe modo guuticabe profeta jma risaca. Ngue runi guníʼ Jesús zuquixe Dios ni cayuni generación que. Zaca cumplir ca diidxaʼ guníʼ Jesús treinta y ocho iza despué, lu iza 70.

Ne guniʼruʼ Jesús:  «¡Pobre si de laatu, ca maestru de Ley, purtiʼ gúxhatu binni llave para guiziidiʼ de Dios! ¡Qué ñuutu ne cucueezatu ca ni nuu guiuu!» (Lucas 11:52). Laacabe nga naquiiñeʼ nusiénecabe ni ná Stiidxaʼ Dios, peru lugar de ñúnicabe ni laga cayáxhacabe binni oportunidad de gunibiáʼ ni ne guiene ni.

¿Xi biʼniʼ ca escriba ne ca fariseu ora binadiágacaʼ ndiʼ yaʼ? Ora biree Jesús de raqué, guizáʼ bidxiichicabe ne bizulú bíʼnicabe laa stale pregunta. Peru cadi dxandíʼ nuucabe guiziidicabe, ni racaláʼdxicabe nga guinaazecabe Jesús pur xiixa ni guiníʼ.