Kinde ma Yesu ubino nicamu i ot pa Jafarisayo, dhanu elfu swa gicokiri i lela, gibekure. Kinde m’ebino i Galilaya de dhanu ugam upong’ kumeca. (Marko 1:33; 2:2; 3:9) Kawoni i Yahudi keni, dhanu dupa gibemito ninene man niwinje, gitie ku nen maber m’ukoc ku mi Jufarisayo ma gitie ku Yesu i dhu cam.

Lembe ma kwong’a ma Yesu uyero, ubino ku thelembe masegi ni julubne. Ewacu kumae: “Wukuru ni thobi mi Jufarisayo, ma en ambili.” Yesu ular umio cimowang’ maeni iwang’e, ento lembe m’eneno saa m’etie i dhu cam ubenyutho nia juk maeni pire tie tek. (Luka 12:1; Marko 8:15) Ubenen nia Jufarisayo gimito gium wi racu migi kara junen nia gitimo bero, ento racu migine copo umere ngo. Yesu uyero kumae: ‘Gin moko mbe ma umbre, ma binyuthre ngo; man ma kandre ma bing’eire ngo.’​—Luka 12:2.

Ecicopere nia udul dhanu m’ucokiri pi niwinjo Yesu gitie dhanu mi Yahudi ma gibino mbe kinde m’ebino niponjo i Galilaya. Pieno edok kendo iwi lembe ma pigi tek m’elar eponjo i wang’e. Eketho cwiny dhanu ceke m’ubewinje kumae: “Kud wulwor ju ma nego kum, ma yo kung’eye gin moko mbe ma gicopo timo.” (Luka 12:4) Calu m’elar eyero i wang’e, eketho cwiny julubne nia gibed ku genogen nia Mungu bigwokogi. Gicikiri ning’eyo bende Wod dhanu, man nibedo ku genogen nia Mungu bikonyogi.​—Matayo 10:19, 20, 26-33; 12:31, 32.

E ng’atu moko m’ikind udul dhanu ubino i bang’e ku lembe pare m’emito jukonye ko, ewacu kumae: “Japonji, wac ni umira nia epok camupacu wakude.” (Luka 12:13) Cik pa Mungu uwacu nia nyathin ma kayu lagu giralaga wang’ ario nisagu awiya mange, eno ketho teliri bedo mbe i kindgi. (Poi mi Cik 21:17) Re ubenen nia ng’atu maeni ubemito elag piny lee nisagu mukero. Ku rieko, Yesu ukwero niroyo tiende i lem pare. Epenje kumae: “Ng’atu e, ng’a m’uketha ni japok lembe kadi japok piny i wiwu?”​—Luka 12:14.

Ing’eye ecimo wang’ dhanu ceke kumae: “Wubed ku weng’wu, man wukuru giwu ni gin ceke mi kethocwiny hai kum piny: kum kwo pa dhanu mbe i gin m’esagre kudo.” (Luka 12:15) Kadok nwang’u ng’atini utie ku lonyo rukani, nyo lonyone copo cere ku tho, man nyo lonyone bidong’ ungo? Yesu utio ku lapor m’ulubo e pi ninyutho nia pire tie tek akeca nibedo ku nying’ maber i wang’ Mungu:

“Podho pa jalonyo moko cego cam hai: man eporo lembe i ie gire, ewacu kumae, Abitimo ang’o, kum kamoko mbe ira m’aketh ie cam para? Ewacu kumae, Abitimo mae: Abimugo dero para, man abigoyo mange ma dit ma sagu; e abiketho cam para ceke ku piny para de keca. Abiwacu ni kwo para kumae, kwo, ibedo ku piny dit m’akana mi rundi dupa; yom, cam, madhi, anyong’a negi de. Ento Mungu wacu ire kumae, In i jakasegu, diewor maeni jubilwong’o kwoni i beng’i; man gin m’iyiko, bidong’ ni ng’a?’ Kum ng’atu m’ukanu piny m’akana ire gire bedo kumeni, m’elony ungo de ku ba Mungu.”​—Luka 12:16-21.

Julub pa Yesu ku dhanu mange ma gibino niwinje ceke gicopo nipodho i uwic mi sayu lonyo, kunoke adieng’a mi kwo romo nicerogi nitimo ni Yehova. Pieno Yesu udok kendo iwi juk m’elar emio oro acel ku nusu i wang’e kinde m’ebino niponjo dhanu iwi got. Ewacu kumae:

“Cwinyu kud uring’ pi kwo mu, pi gin ma wubicamu; kadi pi kumwu, pi gin ma wubikendo. . . . Iwu pid pi ngoro nia gicoyo ngo, gikayu de ngo; ma odkancam migi ku dero de mbe;  ento Mungu mio igi cam: piwu sagu pi winyo dit apila! . . . Iwu pid pi thiuboko, ma ram gidongo ko: gimuli ku tic ungo, gicwio de ngo; ento awacu iwu kumae, cil Suleman i dwong’ pare ceke eronjre ngo calkud acel ma kind maeni. . . . Kud wuyeny gin ma wubicamu, ku gin ma wubimadhu, kadok pidoic mu de kud ubed jiji. . . . Wegwu ng’eyo nia can gin maeni ceke ni ikumwu. . . . Wuyeny ker pa Mungu, e giki maeni bimedre iwu.”​—Luka 12:22-31; Matayo 6:25-33.

Jukani ma bisayu Ker pa Mungu? Yesu unyutho nia wel ma nok, niwacu “udul ma nyanok” ma gigwoko bedoleng’ migi re ma bisayu Kerne. Ing’eye wel dhanune udok unyuthere, nia gitie 144000. Lembang’o m’ukethere i wang’gi? Yesu unyutho igi kumae: “Enyayu mutoro i Wegwu nimio iwu Ker.” Eno nyutho nia gibicoko ngo lonyo iwi ng’om, ka ma jukwo romo nikwalu i ie. Ento adundegi bibedo iwi “piny m’akana ma thum ungo i polo.” Kaka ma gibibimo i ie karacelo ku Kristu.​—Luka 12:32-34.