Kiki Yésu a yé je ndap Farisai yada, dikôô di bôt di nkôdi i mbégdé, di mbem nye. Nlélém jam i ma pémél nye i Galiléa. (Markô 1:33; 2:2; 3:9) Hana i Yudéa, ngandak i gwé ngôñ tehe nye ni i emble nye. Libak jap li yé maselna ni Farisai i i nje ni Yésu.

Jam li bisu Yésu a nkal, li ntihba téntén banigil bé. Yésu a nkal le: “Yoña yihe ni séñha i Farisai, yon i yé bihéñba.” Yésu a ma béhe bo hala, ndi i jam a ntehe kiki ba bak ba nje li ñunda le maéba mana ma nlôôha ba nseñ. (Lukas 12:1; Markô 8:15) Bebek Farisai i nyéñ sôô bibéba gwap ni njel bibégés bi bihéñba, ndi i yé loñge le béba i i sôli mu maboñok map i yeelana. Yésu a ntoñol le: “Yom yo ki yo i sôli y’a yégle bé le ba yelel bé yo, to yom yo ki yo ba nsôô y’a yégle bé le i yiba bé.”​—Lukas 12:2.

Bebek ngandak ikété bôt ba nkéña Yésu ba yé bôt ba Yudéa ba ba bi bana bé pôla i nok likalô jé i Galiléa. Inyu hala nyen, a ntiimba kal balôm ba mam a bi niiga bisu bi ngéda. A nkal ba ba ñemble nye le: “I bôt ba nla nol nyuu ndi ba nla bé boñ jam lipe jo ki jo, ni kon bañ bo woñi.” (Lukas 12:4) A nyigye ki le hala a yé nseñ le banigil bé ba ba nkwoog nkaa le Djob a ga tééda bo. Hala a yé ki nseñ le ba neebe Man mut ni i yi le Djob a nla hôla bo.​—Matéô 10:19, 20, 26-33; 12:31, 32.

Ha ngéda i nyen mut wada ikété limut a nsébél Yésu inyu kal nye ndutu yé: “A Lét, kal mankéé le a kapna bum lôñni me.” (Lukas 12:13) Inoñnaga ni Mbén, mbôkgwéé a nlama kôs ngaba i bum iba, jon nkaa wo ki wo u nlama bé ba. (Ndiimba Mbén 21:17) Ndi, i nene le mut nunu a ngwés kôhna iloo kiki a nlama bana. Ni pék, Yésu a ntjél jôp mu nkaa u, a nkal le: “A mut, njee a ntéé me nkéés tole nkapbum ipôla bé bo iba?”​—Lukas 12:14.

I mbus, Yésu a nti mabéhna mana: “Yoña yihe, ni tadak ki bébomede inyu mintén mi hép nwominsôna, inyule yak ngéda mut a gwé ngandak lingwañ, niñ yé i nlôl bé i mam a gwé.” (Lukas 12:15) To di yé ngwañ tole di yé liyep, bés bobasôna di nsôk di wo di yék gwom gwobisôna di gwé. Inyu yigye hala, Yésu a ngwélél hihéga hi mbuma ñañ hi hi ñunda mahee ma yé i bana jôl lilam bisu bi Djob:

“Hisi hi ngwañ mut wada hi bi ti bijek ngandak. Jon a bi bôdôl hek pék ikété ñem wé, a kalak le: ‘Kii me nlama boñ nano kiki me gwé bé homa to wada inyu tééda bijek gwem?’ Ha nyen a bi kal le: ‘Haana nyen m’a boñ: M’a bôk mandugi mem, me oñ mandugi makeñi, mu nyen m’a tééda bijek gwem gwobisôna ni gwom gwem gwobisôna, ndi m’a kal memede le: “U gwé ngandak mam malam ntéédaga inyu ngandak nwii; u tumbba ha bañ, jek, nyok, tuguk niñ.”’ Ndi Nyambe a kal nye le: ‘A jôñ mut, i u unu, ba yé i bat niñ yoñ. Njee ni a’ bana mam u ntééda?’ Hala nyen i yé inyu mut nu a ntééda nkus inyu yé nyemede, ndi a ta bé ngwañ i bisu bi Nyambe.”​—Lukas 12:16-21.

Banigil ba Yésu ni bôt bape ba ba yé emble nye ba nla kwo mu hiandi i yéñ bana ngandak nkus. Tole nduña inyu mam ma niñ i nla kéñ bo njel i gwélél Yéhôva. Jon Yésu a ntiimba ti bo maéba a bi bôk a ti hala a yé nwii wada ni pes mu Nkwel wé ngii hikôa:

“Ni waa tôñ inyu biniñ binan, inyu yom n’a je; tole inyu yom n’a nyo, to inyu manyuu manan le kii n’a haba. . . . Béñgnana biboboñ: Bi  nwes bé mbôô to bumbul; bi gwé bé litéédana li bijek to ndugi; ndi Nyambe a njés gwo. Baa ni gwé bé mahee iloo dinuni? . . . Béñgnana lelaa mbônji i bikai i nañ: I ntumbba bé ni nson, i mbañ bé to bôñgô; ndi me nkal bé le: To Salômô ikété lipém jé jolisôna, a bi haba bé loñge kiki mbônji yada mu. . . . Jon, ni waa yéñ yom n’a je ni yom n’a nyo; ni waa ki tôñ iloo hihéga . . . Isoñ nan a nyi le ni gwé ngôñ ni mam mana. . . . Kena ni bisu i yéñ Ane yé, ha nyen b’a kônde bé mam mana.”​—Lukas 12:22-31; Matéô 6:25-33.

Bonjee b’a nyéñ Ane Djob? Yésu a nyelel le ndék bôt i maliga, “bémba ntitigi” yon i ga boñ hala. I mbus, di ga yi le nsoñgi wap u yé 144 000. Kii i mbem bo? Yésu a nkal bo le: “I nlémél Isoñ nan i ti bé Ane.” Ba ga toñ bé njel i tééda nkus hana isi, het bôt ba wip ba yé. Ndi miñem nwap mi ga ba mi tiñi ni “nkus u u mal bé nyoo i ngii,” i het ba ga Ane ni Kristô.​—Lukas 12:32-34.