Ilyo Yesu alelya mu ng’anda ya muFarise, abantu abengi balilongene pa nse balemulolela. Ifi fyalicitike na mu Galili. (Marko 1:33; 2:2; 3:9) Abena Yudea abali pa nse, tabali nga abaFarise abalelya na Yesu mu ng’anda, pantu ico bena balonganiine pa nse ni co balefwaya ukumumona no kukutika ku fyo alelanda.

Amashiwi ayo Yesu abalilepo ukulanda yalicindeme sana ku basambi bakwe. Atile: “Cenjeleni ku citutumushi ca baFarise, e mu kuti ubumbimunda bwabo.” Nangu ca kuti Yesu alisokelepo abasambi pa citutumushi ca baFarise, ifyacitike ilyo balelya fyalengele abasoke na kabili. (Luka 12:1; Marko 8:15) AbaFarise balefisa ububifi bwabo, e ico abantu balebamona kwati balitemenwe sana Lesa. Lelo abantu baalingile ukwishiba ukuti bali babifi. Yesu alondolwele ukuti: “Takuli icafiswa icishakasokoloke, nangu ica mu bumfisolo icishakeshibikwe.”—Luka 12:2.

Nalimo abantu abengi abalongene pa nse bali bena Yudea abashaliko ilyo Yesu alesambilisha mu Galili. E ico Yesu alibwekeshepo ukulanda pali fimo ifyacindama ifyo alandilepo pa kubalilapo. Aebele bonse abalongene ati: “Mwilatiina abepaya umubili kabili pa numa ya ico abashingacita nangu cimo.” (Luka 12:4) Na pali iyi ine inshita ico alandilepo sana ca kuti, abasambi bakwe balingile ukucetekela ukuti Lesa takabalekeleshe. Baalingile ukucetekela no Mwana wa muntu no kulaibukisha ukuti Lesa kuti abaafwa.—Mateo 10:19, 20, 26-33; 12:31, 32.

Lyena umwaume umo uwali mwi bumba aebele Yesu icamusakamike ati: “Mwe Kasambilisha, ebeni munyinane ukuti anjakanyeko ifyuma fya bupyani.” (Luka 12:13) Tapaali umulandu wa kupusaninapo pantu Amafunde yatile, ibeli lyalingile ukusenda ifiputulwa fibili ifya bupyani. (Amalango 21:17) Lelo ulya mwaume alefwaya bamwakanye ifingi ukucila pa fyo alingile ukukwata. Yesu alikeene ukuitumpa muli uyu mulandu. Atile: “We muntu we, nga nani wansonta ukuba kapingula nelyo uwa kwakanya ifintu fyenu?”—Luka 12:14.

Lyena Yesu aebele bonse ati: “Cenjeleni no kutaluka ku musango onse uwa lunkumbwa, pantu umuntu nangu akwate shani ifingi, ubumi bwakwe tabwaba mu fintu akwata.” (Luka 12:15) Nangu umuntu engakwata ifyuma ifingi sana, bushiku bumo akafwa no kufisha akafisha. Pa kwafwa abantu ukwishiba umulandu cacindamina ukukwata ishina lisuma na Lesa, Yesu alandile icilangililo ico tushingalaba.

Atile: “Ibala lya mukankaala umo lyalitwalishe. Awe alatontonkanya mu mutima ati, ‘Ndecita shani, apo nomba nshikwete umwa kututila ifisabo fyandi?’ E pa kusosa ati, ‘Nkacita ifi: Nkakuululula amatala yandi no kukuula ayakulileko, kabili e mo nkabika ingano shandi shonse ne fintu fyandi fyonse ifisuma; e lyo nkayeba nati: “We mweo wandi, naukwata ifintu ifisuma ifingi ifya kulya pa myaka iingi ileisa; nomba uletuusha fye no kulya no kunwa no kuipakisha.”’ Lelo Lesa atile kuli ena, ‘We ciwelewele we, lelo ubushiku balakwipaya. Nga kanshi ifyo wabika fikaba fya kwa nani?’ E fyo caba ku muntu uibikila ifyuma lelo uushaba uwacindama kuli Lesa.”—Luka 12:16-21.

Abasambi ba kwa Yesu na bantu bambi abalongene nalimo baletunkwa ukukwata ifyuma ifingi, nelyo ifyo balekabila fyalelenga balefilwa ukubombela bwino Yehova. E ico Yesu alibwekeshepo ukulanda pa fintu ifyo abasambilishepo umwaka umo na hafu ku numa mu Lyashi lya pa Lupili.

 Atile: “Mwilasakamikwa pa bumi bwenu ifyo mukalya nangu mibili yenu ifyo mukafwala. . . . Lolekesheni bamwankole, tabatanda imbuto nangu kuseepa, kabili tabakwata umwa kusungila ifya kulya nangu butala, lelo Lesa alabaliisha. Bushe imwe tamwacindama ukucila ifyuni? . . . Lolekesheni ifyo amaluba yakula; tayacucutika nangu kupikula insalu sha kufwala; lelo ndemweba, nati, nangu fye ni Solomone mu bucindami bwakwe bonse tafwelepo nge luba limo pali aya. . . . E ico, mwilasakamikwa ifyo mukalya ne fyo mukanwa. Mwilasakamikwa iyo . . . Shinwe alishiba ukuti mulakabila ifi fintu. . . . Mulefwaya Ubufumu bwakwe, na fyonse ifi akamupeela.”—Luka 12:22-31; Mateo 6:25-33.

Ni bani Yesu aebele ukuti mulefwaya Ubufumu bwa kwa Lesa? Yesu atile bantu abanono aba cishinka abetwa ukuti, “umukuni unono.” Pa numa calishibikwe ukuti baba 144,000. Mapaalo nshi bakapokelela? Yesu abebele ukuti: “Shinwe afwaya ukumupeela Ubufumu.” Aba tababika amano ku kukwata ifyuma pe sonde ifyo abapuupu bengeba. Lelo bafwaisha “icuma icishingapwa ica mu muulu,” umo bakayaba ishamfumu pamo na Kristu.—Luka 12:32-34.