Legan ya midudungo si Jesus ed abung na Fariseo, nilibon totoo so manaalagar ed sikato diad paway. Agawa la ’tan ed sikato diad Galilea. (Marcos 1:33; 2:2; 3:9) Balet dia ed Judea, dakel met so malabay ya makanengneng tan ondengel ed sikato, duma so ugali rad saray Fariseon akidungoan to.

Say inmunan imbaga nen Jesus et parad saray disipulo to: “Manalwar kayod lebadura na saray Fariseo, a satan et pansimpisimpitan.” Imbaga la ya nen Jesus ed sikara nensaman, balet anengneng tod impidungo to ya talagan kakkaukolan iyan simbawa. (Lucas 12:1; Marcos 8:15) Kunkunwarin masansanto iray Fariseo pian agnahalata so kaugsan da. Balet kaukolan ya ipaamtad totoo ya makapuy so impluensya ra. Impaliwawa nen Jesus: “Anggapoy bengatlan maalwar a sinakoban ya agniparungtal, tan anggapoy sekreton agnaamtaan.”​—Lucas 12:2.

Lapud tagad Judea so dakel ed saray totoon dinmadagod si Jesus, nayarin agda ni arengel so imbangat to diad Galilea. Kanian, inulit to iray importantin punto ya imbaga to la. Binilin to ray amin ya ondedengel: “Agyo tatakotan iramay mamatey na laman tan kayari na saya et anggapo lay arum a nayarian dan gawaen.” (Lucas 12:4) Singa dati lan ginawa to, impurek ton kaukolan ya manmatalek iray papatumbok to ya asikasoen ira na Dios. Kaukolan da met ya bidbiren so Anak na too tan namorian sarag iran tulongan na Dios.​—Mateo 10:19, 20, 26-33; 12:31, 32.

Insan, biglan walay lakin patutulongan ed problema to: “Managbangat, ibagam pad agik ya iyapag to ak na tawir.” (Lucas 12:13) Base ed Ganggan, doble so natawir na panguloan, kanian anggapo la komoy nepeg ya pankolkolan. (Deuteronomio 21:17) Balet singa labay na laki ya naaruman so apag to ed tawir. Marundunong si Jesus ta anggapoy pinilaan to. “Siopay anuro ed siak bilang ukom odino manamegley ed sikayo?” so kuan to.​—Lucas 12:14.

Insan binilin toy amin: “Manbantay kayo tan manalwar kayo ed amin a klase na inkaagum, ta anggano dakdakel so kayarian na sakey a too, ag-iratan makapangiter ed sikato na bilay.” (Lucas 12:15) Anggan panon karakel so kayamanan na sakey, agta ompatey lanlamang tan natilak toy amin a walad sikato? Indanet itan nen Jesus panamegley na agnalinglingwanan ya ilustrasyon, a mangipapanengneng ya importante so maong a reputasyon ed Dios:

“Say dalin na sakey a mayaman a too et nambunga na dakerakel. Kanian inkatunongan tod sarili to, ‘Anto kasi gawaen ko, ta anggapo lay napantiponan kod saray naanik?’ Insan inkuan to, ‘Oniay gawaen ko: Igebak irayay kamalir ko tan mangipaalagey ak na mas angkabaleg, tan ditan so pantiponan kod amin ya ilik tan kayarian ko, tan ikuan kod sarilik: “Dakel la iray maong a bengatlan atipon mo parad dakel a taon, kanian manpainawa ka, mangan ka, oninum ka, manliket ka.”’ Balet inkuan na Dios ed sikato: ‘Makulangkulang kan too, diad sayan labi et alaen day bilay mo. Siopa natan so mangayarian ed saray atipon mo?’ Ontan so nagawa ed toon mantitipon na kayamanan parad sarili to balet aliwan mayaman ed pakanengneng na Dios.”​—Lucas 12:16-21.

Saray disipulo nen Jesus anggan saray arum nin ondedengel et nayarin napatitan na pananap odino pantipon na kayamanan. Odino nayarin agla ra akapokus ed panaglingkor dad si Jehova lapud saray panaaburidoan da. Kanian inulit nen Jesus so balibalin simbawa ya imbaga to manga sakey tan kapalduan taon lay apalabas diad Sermon tod Palandey:

“Agkayo la mapagpaga ed bilay yo no antoy kanen yo, odino ed laman yo no antoy ikawes yo. . . . Imano yo iray wawak: Ag-ira mantatanem na bukel odino manaani; anggapoy kamarin odino  kamalir da; ingen ta papakanen ira na Dios. Agta mas mabli kayo ni nen saray manok? . . . Imano yo no panon so ibabaleg na saray lirio: Ag-ira mansasagpot odino manggagaway kawes da; balet ibagak ed sikayo ya anggan si Solomon, a sankayamanan lan too, et ag-akapankawes na singa sakey ed saraya. . . . Kanian agyo la pampapagaan no antoy kanen yo tan inumen yo, tan agkayo la alablabas a manaaburido . . . Amta na Ama yo a nakaukolan yo iraya. Itultuloy yo sirin ya anapen so Panarian to, tan sarayan bengatla et niarum ed sikayo.”​—Lucas 12:22-31; Mateo 6:25-33.

Siopa ray mananap ed Panarian na Dios? Impaamta nen Jesus ya daiset labat so manggawa ed saya, “melag a pulok” na matoor a totoo. Nasabi panaon, nipaamta ya say bilang da et 144,000 labat. Antoy bendisyon ya naawat da? Impasegurod sikara nen Jesus: “Inabobonan la na Ama yo so pangiter ed sikayo na Panarian.” Ag-ira manpokus ed pantipon na kayamanan ed dalin, ya nayarin natakew. Imbes, say puso da et walad “agbalot naupot a kayamanan ed tawen,” ya ditan ira manuley kaibay Kristo.​—Lucas 12:32-34.