Ciindi Jesu nali mukulya kuŋanda yamu Farisi, zyuulu-zyuulu zyabantu babungana aanze balamulindila. Akwalo ku Galilaya makamu aabantu akacita mbubonya oobu. (Marko 1:33; 2:2; 3:9) Okuno ku Judaya, bantu banji bayanda kumubona akumumvwa, eelyo batondezya kuti mizeezo yabo iliindene kapati ayaba Farisi mbali limwi kucakulya.

Ncaasaanguna kwaamba Jesu cilaabupanduluzi bupati kuli basikwiiya bakwe, wati: “Amucenjele abumena bwaba Farisi, nkokuti kuupaupa ameso.” Kuli ciindi acimbi Jesu naakacenjezyede boobu, pele ncaabona kucakulya citondezya kuti lulayo oolu lulayandika cakufwambaana. (Luka 12:1; Marko 8:15) Ba Farisi ambweni basola kusisa bubi bwabo kwiinda mukulipa kaleza-leza, pele bubi bwabo oobo bulakonzya kuleta mapenzi, aboobo bweelede kuletwa aantangalala. Jesu wapandulula kuti: “Kunyina cintu cisisidwe kabotu-kabotu citakayubununwi, alimwi kunyina cintu camaseseke citakazyibwi.”—Luka 12:2.

Ambweni bunji bwabantu bamubumbide Jesu mbana Judaya ibatakaliko alimwi ibatakamumvwa ciindi naakali kuyiisya ku Galilaya. Aboobo, wainduluka kwaamba twaambo tupati-pati ntwaakaambide musyule. Wakulwaizya boonse aabo baswiilide kuti: “Mutabayoowi aabo bajaya mubili pele kuzwa waawo taakwe cimbi ncobakonzya kucita.” (Luka 12:4) Mbubonya mbwaakacitide musyule, wakankaizya kuti basikumutobela bayandika kumusyoma Leza kuti unoobalanganya. Alimwi bayandika kumuzumina Mwanaamuntu alimwi akuzyiba kuti Leza ulakonzya kubagwasya.—Matayo 10:19, 20, 26-33; 12:31, 32.

Mpoonya muntu umwi munkamu waleta kaambo kamwi kali kumoyo, ulaamba: “O Mwiiyi, komwaambila mukwesu kuti andaabile cibeela calukono.” (Luka 12:13) Mulawo waamba kuti mwana musankwa mutaanzi kuzyalwa nguupegwa zibeela zyobilo zyalukono, aboobo aawa taaku makani aayelede kubapa kuzwangana pe. (Deuteronomo 21:17) Pele kuboneka kuti muntu ooyu uyanda zinji kunze lyacaabilo ncayelede kupegwa kweelana amulawo. Cabusongo Jesu wakaka kwaanjila makani aaya. Wamubuzya kuti: “Yebo muntu, ino nguni wakandisala kuti ndibe mubetesi naa sikukosola makani akati kanu nywebo nyobilo?”—Luka 12:14.

Mpoonya Jesu wapa lulayo oolu kuli boonse: “Amucenjele akulikasya kubusyaacivwulemwangu buli boonse, nkaambo nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.” (Luka 12:15) Noluvwula buti lubono ndwajisi muntu, sena buzuba bumwi takafwi akulusiya lubono oolo loonse? Jesu wakankaizya kaambo aaka kwiinda mukupa cikozyanyo citakalubwi eeco alimwi icitondezya mbociyandika kuba azina libotu kuli Leza, wati:

“Umwi muntu muvwubi wakatebula zilyo zinji kapati mumyuunda yakwe. Aboobo wakatalika kulibuzya ulaamba, ‘Ino ndilacita buti mbwaanga lino ndinyina kwakuyobweda zilyo zyangu?’ Mpoonya wakati, ‘Mboobu mbondilaacite: Ndilamwaya matala aangu akuyaka mapati, eelyo oomo monditiiyobwede maila aangu oonse azintu zyangu zyoonse, mpoonya ndilalyaambila kuti: “Wayobola zintu zinji zibotu zinooliko kwamyaka minji; koliiba, kolya, konywa, alimwi kosekelela.”’ Pele Leza wakamwaambila kuti, ‘Yebo ootayeeyi kabotu, masiku ngoonya aaya balabuyanda buumi bwako. Aboobo ino zilaba zyani zintu eezyi nzyoyobwede?’ Mbocibede oobo kumuntu uuliyobweda lubono pele katali muvwubi kuli Leza.”—Luka 12:16-21.

Boonse buyo, basikwiiya ba Jesu alimwi abantu bambi bamuswiilide balakonzya kucegwa mukakole kakuyandaula naa kuliyobweda lubono. Kunze lyaboobo, kulibilika akaambo kazintu zyamubuumi kulakonzya kubanyonganya nobabelekela Jehova. Aboobo, Jesu wainduluka lulayo lubotu ndwaakapa musyule oomu imwaka omwe acisela wainda mu Mulumbe Waacilundu, wati:

“Amuleke kulibilika kujatikizya buumi bwanu kuti  muyoolya nzi naa kujatikizya mibili yanu kuti muyoosama nzi. . . . Amuyeeye bacikwangala: Tabasyangi mbuto naa kutebula; tabajisi butala naa ciyobwedo, nokuba boobo, Leza ulabasanina. Sena nywebo tamuyandiki kapati kwiinda bayuni? . . . Amulange maluba-luba mbwaakomena: Taabeleki naa kusuma; pele ndimwaambila kuti naba Solomoni mubulemu bwakwe boonse kunyina naakasamide mbuli limwi lyayaaya. . . . Aboobo, amuleke kuyandaulisya nzyomuyakulya anzyomuyakunywa alimwi amuleke kulibilika lyoonse; . . . Uso ulizyi kuti muyandika zintu eezyi. . . . Amuzumanane kuyandaula Bwami bwakwe, eelyo zintu eezyi ziyooyungizyigwa kulindinywe.”—Luka 12:22-31; Matayo 6:25-33.

Mbaani banikuyandaula Bwami bwa Leza? Jesu wayubununa kuti mweelwe musyoonto buyo, nkokuti “katanga kaniini” kabantu basyomeka mbabanikucita oobo. Kumbele kuyakuyubununwa kuti mweelwe wabantu aaba unooli buyo 144,000. Ino babambilidwe nzi? Jesu ubasyomezya kuti: “Uso wasala kumupa Bwami.” Aaba kunyina nobanikubikkila maano kukuyandaula lubono lwaanyika, oolo babbi ndobakonzya kubba. Muciindi caboobo, myoyo yabo inooli ‘kulubono lutamani kujulu,’ ooko nkobayakulela antoomwe a Kristo.—Luka 12:32-34.