I te taimi ne kai ei a Iesu i te fale o te Falesaio, ne mumu atu a te fia afe o tino mai tua o te fale tenā o faka‵tali ki a ia. Ne tai penā foki loa a faifaiga a te vaitino i Kalilaia ki a ia. (Maleko 1:33; 2:2; 3:9) I konei i Iuta, ne ma‵nako a tino e tokouke ke ‵kilo kae fakalogo‵logo atu ki a ia, telā ne tai ‵kese te lotou kilokiloga mai i te kau Falesaio kolā ne ‵nofo atu i te ‵kaiga.

Ne tāua ‵ki eiloa a te uiga o pati muamua ne fai atu ne Iesu ki ana soko: “Fakaeteete koutou i te mea faka‵fete a Falesaio, telā ko te fia amiotonu.” Ko oti ne fakailoa atu muamua ne Iesu a te mea tenei, kae ko te mea ne lavea ne ia i te ‵kaiga tenā, e fakaasi mai i ei a te tāua o te manatu fakatonutonu tenei. (Luka 12:1; Maleko 8:15) Kāti ne taumafai a te kau Falesaio o ‵funa aka olotou amioga ma‵sei ki olotou faifaiga fia amio‵tonu i mea tau lotu, kae ko ‵tau eiloa o fakaasi faka‵sau atu te lotou tulaga fakamataku. Ne fakamatala mai a Iesu: “Me e seai se mea e ufi faka‵lei ka se fakaasi mai kae e seai foki se tala ‵funa ka se iloa.”—Luka 12:2.

Kāti a tino e tokouke kolā ne mumu atu i tafa o Iesu, ko tino Iutaia kolā ne seki lagona aka eiloa ne latou a te auala ne akoako atu ei a ia i Kalilaia. Tela la, ne toe taku atu ne ia a manatu tāua kolā ne taku atu muamua ne ia. Ne fakamalosi atu a ia ki tino kolā ne fakalogo‵logo atu: “Sa ma‵taku ki a latou kolā e tamate ne latou te foitino kae oti aka ko se mafai ei ne latou o fai se isi mea.” (Luka 12:4) E pelā eiloa mo ana mea ne fai muamua, ne faka‵mafa atu ne ia me e ‵tau o tali‵tonu ana soko me ka tausi latou ne te Atua. E ‵tau o talia ne latou te Tama a te tagata kae iloa foki me e mafai o fesoasoani atu te Atua ki a latou.—Mataio 10:19, 20, 26-33; 12:31, 32.

Kae ne fakasae aka ne se tagata mai i te vaitino a te mea ne manavase a ia ki ei: “Te Faiakoga, fai aka ki toku taina ke ‵vae aka te mā tofi.” (Luka 12:13) Ne fakatonu atu te Tulafono me e ‵tau o maua ne te toekimua a vaega e lua o te ‵tofi, tela la, ne seki ‵tau o isi se kinauga e uiga ki ei. (Teutelonome 21:17) Kae e foliga mai, me ne manako te tagata tenei ke lasi atu tena vaega i lō mea kolā ne fakatonu mai i te tulafono. Se mea poto me ne ita a Iesu ma kau atu ki se feitu. “Toku tagata, ko oi ne ‵tofi ne ia au mo fai te famasino io me se tino ke ‵vae ne au a mea i te va o koulua?” ne fesili atu tou tagata.—Luka 12:14.

Ne tuku atu ne Iesu a te fakamalosiga tenei ki tino katoa: “Ke matapula‵pula koutou kae fakaeteete i vaega katoa o te kaimanako, me faitalia te uke o mea a se tino kae e se maua mai i ei ne ia a te ola.” (Luka 12:15) Faitalia me e pefea te uke o koloa a te tino, e a, ka se mate eiloa a ia i se taimi kae tiakina ana mea katoa? Ne faka‵mafa mai ne Iesu a te manatu tenā e auala i se tala fakatusa telā e fakaasi mai foki i ei a te tāua ke maua se igoa ‵lei i mua o te Atua:

“Ne fua ‵lei te manafa o te tagata maumea e tokotasi. Ne mafaufau ifo tou tagata, ‘Ne a nei aku mea ka fai me ko seai se koga mo tuku aku fuaga lakau?’ Ne fai aka ei a ia, ‘Ka fai ne au te mea tenei: Ka lepe ne au ki lalo oku fale koloa kae ka faka‵tu ne au a fale e ‵lasi atu. Ka fakaputu ne au i ei aku fuaga lakau mo aku mea ‵lei katoa, kae ka fai ifo au ki a au eiloa: “Ko uke a mea ‵lei ne fakaputu aka ne koe mō tausaga e uke; faifai malie la au mea, kai, inu, kae fiafia.”’ Kae ne fai atu te Atua ki a ia, ‘Te tagata valea, ko te po eiloa tenei ka ave keatea ei ne latou tou ola mai i a koe. Ko oi la ka puke ma ia a mea kolā ne fakaputu ne koe?’ Tenā eiloa te mea ka tupu ki te tino telā e fakaputu koloa mō ia eiloa kae e se maumea i mua o te Atua.”—Luka 12:16-21.

Ne mafai eiloa o ‵lave i te malei a soko o Iesu mo nisi tino māfai e taumafai io me e fakaputu aka ne latou a koloa. Io me ko te tausi atu ki te olaga e mafai ei o fai latou ke se ‵saga tonu atu ki te taviniga ki a Ieova. Tela la, ne toe fai atu ne Iesu a pati fakatonutonu kolā ko oti ne tuku atu ne ia i se tausaga mo te āfa ko ‵teka i te Lāuga i luga i te Mauga:

“Ko lava te manava‵se ki otou ola ki mea ka ‵kai ei koutou io me ki otou foitino ki gatu ka ‵pei ei koutou. . . . Ke mafaufau ki leveni: E se ‵toki fuaga io me e  tau fuaga, e seai foki ne olotou fale koloa; kae e fagai eiloa latou ne te Atua. E a, e se sili atu la te tāua o koutou i lō manu eva? . . . Ke mafaufau ki te auala e ola ei a lili o te vao: E se ga‵lue io me e ‵laga gatu; kae e fai atu au ki a koutou ke oko foki eiloa ki a Solomona i tena ‵malu katoatoa ne seki pei eiloa ki se gatu gali e penei mo se pulalakau e tasi i pulalakau konei. . . . Tela la, ko lava te ‵sala ki mea ka ‵kai ei koutou mo mea ka inu ei koutou, kae ko lava te sona manava‵se; . . . e iloa ne te otou Tamana me ma‵nako koutou ki mea konei. . . . Ke tumau i te ‵sala ki tena Malo, kae ka fakaopoopo atu a mea konei ki a koutou.”—Luka 12:22-31; Mataio 6:25-33.

Ko oi ka ‵sala atu ki te Malo o te Atua? Ne fakaasi mai ne Iesu me e isi se tamā aofaki o tino fakamaoni, te “lafu mamoe foliki,” ka ‵sala atu ki ei. Fakamuli ifo, ne fakaasi mai me i te lotou aofaki ko te 144,000. Ne a mea e faka‵tali mai mō latou? Ne fakatalitonu atu penei a Iesu ki a latou: “Ko oti ne talia ne te otou Tamana ke tuku atu ki a koutou a te Malo.” Ka se ‵saga atu a latou konei o fakaputu a koloa i te lalolagi, me e mafai o kaisoa ne tino kai‵soa. I lō te fai penā, ka ‵saga tonu atu olotou loto ki “te koloa tāua o te lagi telā e se mafai o pala,” ko te koga telā ka pule fakatasi ei latou mo Keliso.—Luka 12:32-34.