Jesu nĩ ataarĩria atĩ no “karũũru kanini” tu gakaaheo mweke Ũthamaki-inĩ wa igũrũ. (Luka 12:32) Ĩndĩ kũheo kĩheo kĩu kĩa magegania ti ũndũ wa kuoywo na njĩra hũthũ. O na agathiĩ na mbere gũtĩtĩrithia bata wa mũndũ gũkorũo na mwerekera ũrĩa wagĩrĩire nĩguo aingĩre Ũthamaki-inĩ ũcio.

Nĩ ũndũ ũcio Jesu akahinyĩrĩria arutwo ake maikare mehaarĩirie nĩ ũndũ wa rĩrĩa agaacoka. Akameera: “Ikaragai mwĩhumbĩte na mwĩhaarĩirie na mũgwatĩtie matawa manyu, mwagĩrĩirũo gũkorũo mũtariĩ ta arũme metereire mwathi wao acoke kuuma ũhiki-inĩ, nĩguo rĩrĩa arĩũka na aringaringe, mamũhingũrĩre o rĩo. Gũkena nĩ ngombo icio rĩrĩa mwathi wacio arĩcoka acikore ciĩiguĩte!”​—Luka 12:​35-37.

Arutwo no mataũkĩrũo na ihenya mwerekera ũrĩa Jesu araria ũhoro waguo. Ngombo icio agweta nĩ ciĩhaarĩirie, cietereire mwathi wacio acoke. Jesu agataarĩria ũũ: “Na [mwathi] angĩũka ũtukũ gatagatĩ kana o na thaa kenda, na acikore ciĩhaarĩirie, gũkena nĩcio!”​—Luka 12:38.

Ũtaaro ũcio ndũronania o bata wa mũndũ gũkorũo arĩ ngombo ya mũciĩ ĩrĩ kĩyo. Ũndũ ũcio nĩ ũroneka wega nĩ ũrĩa Jesu, o we Mũrũ wa mũndũ, aracoka kwĩgweta thĩinĩ wa ngerekano ĩyo. Akeera arutwo ake ũũ: “O na inyuĩ ikarai mwĩhaarĩirie, nĩ gũkorũo ithaa rĩrĩa mũtarecirĩria-rĩ, nĩrĩo Mũrũ wa mũndũ egũka.” (Luka 12:40) Kwoguo nĩ harĩ hĩndĩ Jesu agooka. Arenda arũmĩrĩri ake, makĩria arĩa a “karũũru kanini” maikare mehaarĩirie.

Petero arenda gũtaũkĩrũo wega nĩ ũrĩa Jesu aroiga, kwoguo akoria: “Mwathani, hihi ngerekano ĩno nĩ ithuĩ ũrera kana nĩ nginya andũ othe?” Jesu handũ ha gũcokeria Petero ĩmwe kwa ĩmwe, akaheana ngerekano ĩkonainie na ũndũ ũcio akoiga: “Nũ kũna mũramati ũrĩa mwĩhokeku na mũũgĩ, ũrĩa mwathi wake akaamũra arũgamĩrĩre ndungata ciake nĩguo aciheage rwĩga rwacio rwa irio rwa gũciigana ihinda rĩrĩa rĩagĩrĩire? Gũkena nĩ ngombo ĩyo mwathi wayo angĩgoka amĩkore ĩgĩka ũguo! Ngũmwĩra atĩrĩ na ma, nĩ akaamĩamũra ĩrũgamĩrĩre indo ciake ciothe.”​—Luka 12:​41-44.

Hatarĩ nganja, ngerekano-inĩ ĩrĩa ekwambĩte kũheana, “mwathi” nĩ Jesu, o we Mũrũ wa mũndũ. Kwoguo, “mũramati ũrĩa mwĩhokeku” nĩ arũme amwe a “karũũru kanini” karĩa gakaaheo Ũthamaki. (Luka 12:32) Jesu arenda kuuga atĩ andũ amwe a gĩkundi kĩu nĩ mangĩkaheaga “ndungata ciake rwĩga rwacio rwa irio rwa gũciigana ihinda rĩrĩa rĩagĩrĩire.” Nĩ ũndũ ũcio Petero na arutwo arĩa angĩ mararutwo nĩ Jesu o akĩmaheaga irio cia kĩĩroho no mone atĩ nĩ kũrĩ hĩndĩ Mũrũ wa mũndũ agooka ihinda rĩrĩa rĩũkĩte. Na hĩndĩ ĩyo, nĩ gũgaakorũo na mũbango mwega wa kũhe arũmĩrĩri a Jesu, nĩo “ndungata” ciake, irio cia kĩĩroho.

Jesu agacoka agatĩtĩrithia na njĩra ĩngĩ bata wa arutwo ake gũikara mehaarĩirie na gwĩciria ũhoro wĩgiĩ mwerekera wao. Gĩtũmi nĩ tondũ mũndũ angĩaga kwĩmenyerera, no akinyĩrĩrũo nĩ nginya gũkararia aarĩ na ariũ a Ithe. Jesu akoiga ũũ: “No ngombo ĩyo ĩngĩkeĩra na ngoro atĩrĩ, ‘Mwathi wakwa ndaroka narua,’ na yambĩrĩrie kũhũũra ndungata cia arũme na cia atumia na kũrĩa na kũnyua na kũrĩwo, mwathi wa ngombo ĩyo agooka mũthenya ũrĩa ĩterĩgĩrĩire na ithaa rĩrĩa ĩtaramenya, na nĩ akaamĩherithia mũno na amĩtuĩre hamwe na arĩa matarĩ ehokeku.”​—Luka 12:​45, 46.

Jesu akoiga atĩ okire “gwakia mwaki gũkũ thĩ.” Na nĩ ma, tondũ morutani make nĩ moimĩrĩtie ngarari nyingĩ na magatũma andũ matiganĩrie  ũndũire na morutani ma maheeni. Ũndũ ũcio o na nĩ ũgayũkanagia andũ arĩa mangĩĩrĩgĩrĩrũo makorũo na ũrũmwe, ũkaamũrania “mũthuri na mũrũ wake nake mũriũ akaamũkana na ithe, mũtumia na mwarĩ nake mwarĩ akaamũkana na nyina, nyaciara akaamũkana na mũtumia wa mũrũwe nake mũtumia wa mũrũwe akaamũkana na nyaciarawe.”​—Luka 12:​49, 53.

Ciugo icio cierekeirio makĩria harĩ arutwo ake. Jesu agacoka akahũgũkĩra kĩrĩndĩ. Andũ aingĩ nĩ momĩtie ngoro makaaga gwĩtĩkĩra ũira ũrĩa wonanagia atĩ nĩwe Mesia, kwoguo akameera: “Rĩrĩa muona itu rĩkiumĩra mwena wa ithũĩro-rĩ, o rĩmwe mugaga, ‘Nĩ gũkũgĩa kĩhuhũkanio,’ na noguo gũtuĩkaga. Na rĩrĩa muona rũhuho rwa mwena wa mũhuro rũkĩhurutana, mugaga, ‘Nĩ gũkũgĩa ũrugarĩ,’ na noguo gũtuĩkaga. Inyuĩ hinga ici, nĩ mũmenyaga gũkũũrana ũrĩa thĩ na rĩera itariĩ, no nĩ kĩĩ kĩgiragia mũmenye gũkũũrana ũhoro wa ihinda rĩrĩ?” (Luka 12:​54-56) Hatarĩ nganja matiĩhaarĩirie.