Yesu walumbulwile’mba “kajitanga kacheche” ko kakatambula kifulo mu Bufumu bwa mwiulu. (Luka 12:32) Bino kechi kyapeela kutambula ino mfweto ne. Yesu wakoseshe kishinka kya kuba’mba muntu wafwainwa kwikala na muchima wa kwipana pa kuba’mba akekalemo na lubaji mu Bufumu.

Onkao mambo, Yesu watundaikile baana banji ba bwanga kutengela kubwela kwanji. Waambile’mba: “Vwalai ne kwinengezhezha jimo ne kwambula malampi enu, kabiji mwikale nobe banabalume babena kupembelela nkambo yabo kufuma ku masongola, pa kuba’mba inge wafika ne kukonkonsha, ponkapo bamushinkwileko. Batokwa aba bakalume pa kwiya nkambo yabo bo akataana saka balaba!”—Luka 12:35-37.

Baana ba bwanga kechi kibakatezhe kukwatakanya byubilo byaambilengapo Yesu ne. Bakalume bo aambilepo babena kutengela kubwela kwa nkambo yabo. Yesu walumbulwile’mba: “Umvwe [nkambo] wafika pa kilo kya bubiji [kutendeka pa 9 koloko wa bufuku kufika pakachi ka bufuku] nangwa kya busatu [kufuma pakachi ka bufuku kufika 3 koloko wa kumakya], wibataana saka balaba, batokwa!”—Luka 12:38.

Luno lujimuno lwavwangilemo bintu byavula kechi kwikalatu bakalume nangwa’mba bamingilo bengila na mukoyo ne. Kino kyamwekela mu jishinda Mwana muntu, Yesu byo evwangilemo mu kino kishimpi. Wabuujile baana banji ba bwanga amba: “Ne anweba inengezhezhai jimo, mambo Mwana muntu ukeya pa kimye kyo mwabula kuketekela.” (Luka 12:40) Onkao mambo, kulutwe Yesu ukeya. Ubena kukeba kuba’mba baana banji ba bwanga, kikatakata aba baji mu “kajitanga kacheche” kwikala benengezhezha jimo.

Petelo wakebelenga kuyuka mwatajile byambo byaambile Yesu. Onkao mambo, wamwipwizhe’mba: “Nkambo, nanchi mubena kwambilatu atweba kino kishimpi nyi, inyi ne bantu bonse?” Yesu kechi wakumbwile Petelo mu kushinkamika ne, bino wibelele kishimpi amba: “Ñanyi kalama wa kishinka kabiji wa maana, nkambo yanji ye akatongola kwikala mukulumpe wa jibumba ja ba mingilo banji kuba’mba ebanengezhezhenga kajo kabo kawaina pa kimye kyafwainwa? Ye wa lusekelo awa kalume umvwe nkambo yanji pa kwiya wamutaana na kuba bino! Kine nemwambila namba, ukamutongola kwikala wa kutala pa bintu byanji byonse.”—Luka 12:41-44.

Mu kishimpi kitanshi, “nkambo” watongolwa ke Mwana muntu, aye Yesu. “Kalama wa kishinka” wimenako banabalume baji mu “kajitanga kacheche” kabiji bakebapa Bufumu. (Luka 12:32) Yesu waambilenga’mba bamo ba mu kano kajibumba bakapananga bikebewa ku “jibumba ja bamingilo,” ko kuba’mba kwibanengezhezha “kajo kabo kawaina pa kimye kyafwainwa.” Onkao mambo, Petelo ne baana ba bwanga bakwabo Yesu bo afunjishenga ne kwibapa kajo ka ku mupashi bayukile kuba’mba kukekala kimye Mwana muntu kyo akeya. Pa kyokyo kimye, kukekala lunengezho lwa kupana kajo ka ku mupashi ka baana ba bwanga bwa kwa Yesu, Nkambo ya “jibumba ja bamingilo.”

Yesu waambile pa kishinka kikwabo kimwesha ene mambo baana ba bwanga o bafwainwe kwikala balaba ne kuta muchima ku byubilo byabo. Mambo muntu wakonsha kwikala na byubilo byatama kya kuba watendeka ne kwimena ku ntundwa balongo ne banyenga. Yesu waambile’mba: “Bino umvwe awa kalume watendeka kwamba mu muchima wanji amba, ‘Nkambo yami wabanda kwiya,’ kabiji watendeka kupuma bakalume bakwabo ba balume ne ba bakazhi ne kuja ne kutoma ne kupendwa, nkambo wa yewa kalume ukeya pa juba jo abula kuketekela ne pa kimye kyo abula kuyuka, kabiji ukamumanyika bingi ne kumutaya mu bantu babula bukishinka.”—Luka 12:45, 46.

Kabiji Yesu waambile’mba waishile na “kwambula mujilo pano pa ntanda.” Kya kine, kuji makatazho avula bingi aleta bantu bafunda mafunjisho  a bubela ne bisho bya bantu. Na mambo a kino, bantu babena kwabenamo mu bisemi. Yesu waambile’mba: “Shanji ukalukilamo mwananji wa mulume, mwana wa mulume naye ukalukilamo shanji, inanji ukalukilamo mwananji wa mukazhi, ne mwana wa mukazhi ukalukilamo inanji, bako ba bakazhi bakalukilamo mulokazhi wabo, ne mulokazhi ukalukilamo bako banji ba bakazhi.”—Luka 12:49, 53.

Bino byambo wabuujilenga baana banji ba bwanga. Kepo Yesu aalulukijile ku jibumba ja bantu. Bavula bakaine bishiino byamwesheshenga’mba ye Mesiasa. Onkao mambo, wibambijile’mba: “Umvwe mwamona jikumbi ku muzhika ponkapo mwamba’mba, ‘Mvula mukatampe usakunoka,’ kabiji kikala byonkabyo. Kabiji umvwe mwamona luvula ubena kupupa kufuma ku kabeta ka ku bulenge, mwamba’mba, ‘Kusakuba kyuya,’ kabiji kikala byonkabyo. Anweba bakamfutumfutu, mwayuka kulumbulula bimweka ntanda ne jiulu, pano mambo ka o mukankelwa kuyuka mwatala bibena kumweka pa kino kimye?” (Luka 12:54-56) Kino kyamwesheshetu patoka kuba’mba kechi benengezhezhe ne.