Yesu badi mupatuule shi nka “lombe lupeela” nyi alukapete mbalo mu Bufumu bwa mwiyilu. (Luka 12:32) Anka, kupeta dyadya efuto ta kwikale mwanda ubofule nya. Balesheshe shi bwa kutwela mu bwabwa Bufumu, abitungu kwikala na mwikeelo wibuwa.

Nyi bwakinyi Yesu anyingisha balongi baye bwa kutungunuka na kwilumbuula bwa kwalukiila kwaye. Bambile shi: “Shaalaayi na bilamba bya mufubo, malampi eenu eekale atembe. Ikalaayi bu bantu abaindjila nfumw’abo, bwa’shi pataaluka ku madyo a bulunda, bamushitwile’nka kyaafiki naa kyaakookola. Ba-sha-mwabi mbano bafubi babasangana kwi nfumwabo, pa kufika kwaye, beekale abatala.”—Luka 12:35-37.

Balongi abadi bya kulamiina binangu bibadi abileesha Yesu. Bafubi babadi muleshe abadi belumbuule, bwa kutengyela kwalukiila kwa nfumw’abo. Yesu badi mupatuule shi: “Su [nfumu] mpa kilo kyaakabidi paafiki [ku kyolwa sunga pangi mukantshi mwa bufuku], sunga pa kyaakasatu [kubanga munkatshi mwa bufuku pangi na ku matombole], aye mwibasangane abamutengyela bee na mwabi!”—Luka 12:38.

Dino elango ndjikile dyabapa mwina nshibo sunga mufubi bisumanga. Abipushika kalolo mwanda Mwana a muntu eetwesha aye nabeene mu kileshesho. Balungwile balongi baye shi: “Anwe naamu ikalaayi beelumbuule, mwanda Mwan’amuntu akafiki nguba anushyaanuwuku.” (Luka 12:40) Abilesha shi Yesu akafiki mu mafuku e kumpala. Akumiina shi balongi baye, bikishekishe baba be mu “lombe lupeela”—bekale belumbuule.

Mpyeele badi akyebe kupusha kalolo mayi a Yesu pa kumwipusha shi: “Mwanaana, nnaatwe bwelela luno lukindji’nyi mbantu booso?” Pamutwe padya kutuusha lwaluulo musango umune Yesu batushishe kingi kileshesho amba shi: ‘Byaabya, mpika a bintu sha kishima na mupatulukye nnanyi? Ngyawa abadi bape kwi nfumwaye bushito bwa [beena mufubo ba mu] nshibo yaaye, bwa kwabila bantu, bya-kudya nguba atungiibwa. Ngaa-mwabi uno mufubi aabasangana kwi nfumwa’ye paafiki kwete kukita uno mufubo. Eyendo, neenushikwila’shi, amupa bushito bwa bintu byaaye byooso.’—Luka 12:41-44.

Mu kileshesho kya kumpala, “nfumu” alesha Yesu, Mwana a muntu. Mu kwakula kwa kalolo, ‘mpika sha kishima’ alesha bantu bee mu “lombe lupeela” na abakapebwa Bufumu. (Luka 12:32) Pano Yesu akula shi bangi ba ku bantu ba mu kano kasaka abakebapa mudimo wa “kwabila bantu bya-kudya nguba atungiibwa.” Byabya, Mpyeele na bangi balongi bababadi abalongyesha na kudiisha kwi Yesu mu kikudi be kushinkamisha shi akukeekala kipungo akikafiki Mwana a muntu. Na mu kyakya kipungo, akukekala mpàngo ya kudiisha balongi ba Yesu mu kikudi, “beena mufubo” ba Mukata.

Yesu ashimika kasele bwa ungi mushindo aukekala balongi baye na lukalo lwa kwikala bapasukye na kutala mwikelo wabo. Bi kwikala bibofule bwa muntu kubanga kubepuula bakwabo balume na bakashi bena Kidishitu. Bakwile shi: “Anka su uno mufubi anangusheena mwishimba dyaaye’shi ‘Nfumwami kyaanyengakana na kufika,’ na su abanga kukupila beena-mufubo balume na bakashi, na kudya mpaa na kukwatshika malofu, byaabya nfumwaye akafika efuku dyashyaa indjila, na nguba ashyawuku, amubingi, amunyookye bu byabanyookaa bantu bashii kishima.”—Luka 12:45, 46.

Yesu aamba shi “nkaalo kandji mufikye mu kutwala pa nsenga.” Na bebikitshine pa kwakula myanda ibatushishe kwitshibena kubadi kutushe malongyesha na bipikwa bya madimi patooka. Bino bibadi mpa na bitweshe kwiabuula pankatshi pa bantu abamwenekanga bu be mu buumune muyile bibakwile shi: “Nambutwile  mulume akeetshibeena na mwan’aye mulume, mwana mulume akeetshibeene na nshaaye, nambutwile-mukashi etshibeene na mwan’aye mukashi, na mwana mukashi na nyin’aye mukashi, nyina mulume eetshibeena na mukashy’a-mwana, dingi mukashy’a-mwana na nyina mweno.”—Luka 12:49, 53.

Uno mwanda ubadi utale bikata balongi baye. Akupu Yesu badi mwialuule kwi kibumbu. Bebungi ba ku bantu abadi abapele kukumina bishinkamiisho abilesha shi mmwikale Mesiya, nyi bwakinyi bebalungwile shi: “Paanumono ekumbi adiibo dyaa kupona-nguba, anwamba paapa shi ‘mpeshi taadi peepi,’ na byabya nyi abikitshika. Paanupusha kipapi kya kuushy’a nsenga, anwamba’shi: ‘Akukeekala kibobo kii moo,’ dingi byabya abikitshika. Anwe Bansesa anuwuku kushinguula bitundwilo byaa pa nsenga na bya mwiyilu, anka myanda ya ano mafuku, mbii-kunyi byanushyaanuwuka kwiyitundula?” (Luka 12:54-56) Eyendo, tababadi belumbuule nya.