Yesu utimo tego ceke kara dhanu gibed ku winjiri ma ceng’ni ku Mungu. Kinde m’edaru niweco ku dhanu i lela pa Jafarisayo moko, jutundo i bang’e ku lembe mange.

Jumoko m’ikindgi ubeweco iwi lemcan moko m’utimere. Gibeyero ire “pi Jugalilaya ma Pilato [Pontio Pilato ma Jabim mi Roma] ribo rimbgi ku lam migi.” (Luka 13:1) Gimito yero ire ang’o?

Ecicopere nia Jugalilaya maeno junegogi kinde ma Juyahudi elufu ma lee gijai ni Pilato nia kud etii ku sente mir hakalu pi nigiero tarasi m’ukelo pi i Yerusalem. Ve nia judongo mir hekalu re m’umio ire kaka mi wodho sente kud i hekalu. Jum’ukoro pi lembcan m’unwang’u Jugalilayane giparu nia lembuno uwok i wigi pilembe gidubo aduba. Re Yesu uyio ngo lembe migine.

Ewacu kumae: “Wuwacu nyo Jugalilaya maeni gijudubo ma sagu Jugalilaya ceke?” Dwoko wang’ lembe maeno utie ungo. Ento Yesu utio ku lembe maeno m’utimere pi nicimo wang’ Juyahudi kumae: “Tek wuloko cwinywu ngo, wun ceke wubirwinyo kumeno.” (Luka 13:2, 3) I ng’eye Yesu udok iwi lemcan moko mange m’utimere ceng’ini i saa maeca ma ve lembene udok bende iwi giedo mi tarasi maeca. Epenjogi kumae:

“Ju apar wi abora maeno, ma ot ma wiu m’i Siloam upodho i wigi, enegogi de, wuwacu nyo gi judubo ma sagu dhanu ceke m’ubedo i Yerusalemi?” (Luka 13:4) Udul dhanu maeno giparu nia dhanu maeno githo nikum dubo migi moko ma gitimo. Kendo Yesu ukwero. Eng’eyo nia ‘saa man lembe ma wok rek’ timere man lembe maeno re ma romo kelo peko iwi jugino. (Eklizia 9:11) Pieno, dhanu gicikiri ninwang’u ponji ikum lembe maeno m’utimere. Yesu uyero kumae: “Tek wuloko cwinywu ngo, wun ceke wubirwinyo kumeno.” (Luka 13:5) Pirang’o ebeketho peko iwi lembe maeno?

Eng’eyo nia tic pare mi rweyo lembanyong’a udhingo thum, pieno emaku lapor ma e: ‘Ng’atu moko bedo kud ulam m’epidho i podho pare mir ulok; ebin eyenyo nyinge i wie, enwang’u ngo. Man ewacu ni jatipodho mir ulok kumae, nen, rundi adek maeni abin ayenyo nying ulam iwi yend ulam maeni, re anwang’u ngo; ng’ole piny; ecamu ng’om ma nanu. Man eloko lembe ewacu ire kumae, Rwoth, weke i rundi maeni bende, fodi abikofuro ng’om i there, abiketho uweyo de: man tek ecego nyinge macen, ber; ento tek ecego ngo, ibing’ole piny.’​—Luka 13:6-9.

Pi oro ma romo adek, Yesu ubino nitimo kero ceke kara Juyahudi gibed ku yioyic. Re, jumanok kende re m’udoko julub pare man ginwang’u bero ikum tic m’etimo ku kero. Kawoni, i oro mir ang’wende mi tic pare, ebeii asu nimedo tic nisagu m’elar etimo i wang’e. Tic pare m’etimo i Yahudi kud i Perea, udog ubedo ve ebecoko ng’om man ebeketho mor ng’om ikum Juyahudi ma tie yend ulok. Tic pare m’etimone ubedo kud adwogi makani? Juyahudi manok re ma gijolo lembene. Pieno, nyoth ubebino iwi thek maeno pilembe gikwero niloko cwinygi.

 Koso yioyic migi udok unen kendo i ng’eye nyanok i ceng’ Sabatu. Kinde ma Yesu ubeponjo i kacokiri, eneno dhaku moko ma pajogi ubino nisendo man ma dong’ kore ugungo pi oro ma romo 18. Kisa unege lee ikume, uketho eyero ire kumae: “Dhaku, ibedo agonya ni mulima peri.” (Luka 13:12) Yesu uketho cinge iwie, e kore urieyere man ecaku niyungo Mungu.

Lembuno uopo kwinyo i jadit mi kacokiri, pieno eyero kumae: ‘Ceng’ abusiel unuti m’ukwayu dhanu utim ie tic: ka kumeno wubin i ceng’ maeno man jukei kumwu, i ceng’ Sabatu re ngo.’ (Luka 13:14) Jadit mi kacokiri maeno ubejai ungo pilembe nia Yesu umbe ku tego mi keyokum dhanu, ento ebekwero dhanu nia kud gibed gibin jukei kumgi i ceng’ Sabatu! Yesu udwoko ire lembe terere kumae: ‘Wu weg ambili, wun kubeng’wu kubeng’wu ng’atuman gonyo dhiang’ pare kadi kana pare kud i dwol, epeye etere ba pi de ngo? Man ukwayu ngo nia dhaku maeni ma tie nyar Abraham, ma Jok utwie pi rundi apar wi abora, ugonyere kud i twic maeni i ceng’ Sabatu?’​—Luka 13:15, 16.

Lewic umaku judegi pa Yesu, ento anyong’a unego udul dhanu ikum lembe ma wang’u ijo ma gineno Yesu utimo. I ng’eye, i ng’om mi Yahudi keni, Yesu udok kendo i wi lapor ario m’uweco iwi lembila mi Ker, m’elar eweco pigi nindo moko kinde m’ebeponjo dhanu kud i yei i dhu nam mi Galilaya.​—Matayo 13:31-33; Luka 13:18-21.