Ni ngandak manjel, Yésu a noode hôla litén i wan maada mé ni Djob. Ngim pôla ipe i nene i mbus nkwel wé ni bôt bisu bi ndap Farisai yada.

Ngim bôt ipôla yap i nsima béba jam yada i bi tagbe. Ba mpôdôl inyu ‘Pilatô [Ngomin Rôma le Pontiô Pilatô] nu a bi nol i bôt ba Galiléa ba bé ti bisesema.’ (Lukas 13:1) Kii bôt bana ba nsômbôl kal?

Bebek bôt ba Galiléa bana ba nhoñol jam li bi tagbe ngéda Pilatô a bi nol dikôô di bôt di Lôk Yuda inyule ba bi neebe bé le Pilatô a gwélél moni mi témpel inyu oñ nyaañga u bé lama lona malép i Yérusalem. I nene le Pilatô a bi ôô jimp ni baéga ba témpel inyu kôhna moni mi. I bôt ba ñañle Yésu ñañ unu, ba nhoñol le i bôt ba Galiléa bana ba bi kôhna bikuu bini inyule ba bi boñ bibéba bi mam. Ndi Yésu a nhoñol bé hala.

Yésu a mbat le: “Baa ni nhoñol le bana bôt ba Galiléa, kiki ba nkôhna ndutu ini, wee ba yé bibéba bi bôt iloo bôt ba Galiléa bape?” Ndimbhe i yé le to. Ndi a ngwélél jam li inyu béhe Lôk Yuda, a nkal bo le: “Ibale ni ntam bé bibéba binan, yak bé bobasôna n’a kôhna nlélém tjiba.” (Lukas 13:2, 3) Nano Yésu a mpôdôl béba jam ipe i bi tip tagbe, bebek li gwé maada ni maoñ ma nyaañga u, a nkal le:

“Ini jôm li bôt ni juem nkum ndap u bi kwél, u nol bo; baa ni nhoñol le ba yé béba iloo bana bôt bape bobasôna ba niñ i Yérusalem?” (Lukas 13:4) Limut li nla hoñol le i bôt ba ba bi nwo inyu bibéba ba bi boñ. Kiki ngéda bisu, Yésu a nhoñol bé hala. A nyi le “ngéda ni mpuhge ngéda” bi nla ba, ni le ibabé pééna inyu hala nyen bôt bana ba bi wo. (Ñañal 9:11) Ndi, bôt bana ba nlama ôt biniigana munu jam li ntagbe. Yésu a nkal bo le: “Ibale ni ntam bé bibéba binan, yak bé bobasôna n’a tjiba kiki bo.” (Lukas 13:5) Ndi inyuki a nyigye i jam lini nano?

Inyule hala a mbéñge nson wé u likalô u a ma kena jôga hana isi. Jon a nti hihéga hini: “Mut wada a bééna mbelek e faigé i wom wé u minkôô mi wai, ndi ngéda a bi ke i yéñ matam mu, a koba bé to jada. Ha nyen a bi kal nsalwom u minkôô mi wai le: ‘Hala a yé nwii maa le me nlo i yéñ matam munu e faigé ini, ndi me nkoba bé to jada. Kit yo! Inyuki m’a nwas yo le i ôbôs hisi yañga?’ A timbhe, a kal nye le: ‘A isañ mbai, di bem ki to nwii wada. M’a tém yo i mapañ mé, i mbus, me jés hisi. Ibale i num matam i dilo di nlo, hala a’ ba loñge jam; ndi ibale i num bé matam, ha nyen w’a kit yo.’”​—Lukas 13:6-9.

Hala a yé iloo nwii maa le Yésu a noode hôlôs hémle i Lôk Yuda. Ndi nson wé u num bé ngandak matam, ndék bôt yon i nyila banigil bé. Nano le a yé tégbaha nwii mi-na mu nson wé u likalô, a nke ni bisu i boñ biliya bi ngui. Ni njel likalô a yé téé i Yudéa ni i Péréa, i yé wengoñle a yé tém mapañ ma e faigé  hala wee Lôk Yuda, a jéhék yo. Ni bimbe bikwél? Ndék bôt i Lôk Yuda yon i neebe. Bebee le litén jolisôna li ntjél hielba, inyu hala nyen tjiba i yé bo bebee.

I mbus ngéda i kel Sabat, béba libak i bôt bana i ntémb i nene. Yésu a yé niiga i ndap bibégés. A ntehe muda wada a bé bé le a telep loñge inyule mbuu mbe u bé kônôs nye hala a yé 18 nwii nano. Ni ñem ngôô, Yésu a nkal nye le: “A muda, u nkobla ni kon woñ.” (Lukas 13:12) Yésu a nkés moo i ngii yé, ha nlélém ngéda muda a ntelep loñge a bôdôl ti Djob lipém.

I jam li, li ñunbaha ñane ndap bibégés, a nkal limut le: “Dilo disamal di yé le mut a nlama sal; jon lona le ba mélés makon manan mu dilo di, ndi ha i kel Sabat bé.” (Lukas 13:14) Mut nunu a ta bé pééna le Yésu a gwé ngui i mbuubaha; ndi a yé kéés ba ba nlo i kôhna hogbe i kel Sabat! Ndimbhe Yésu i kôli, a nkal le: “A bôt ba bihéñba, i kel Sabat, baa hiki wada nan a ntiñil bé nyaga yé tole jakas jé i homa ba ntéñ yo inyu kena yo i nyo malép?”​—Lukas 13:15, 16.

Baoo ba Yésu ba nwo nyuu, ndi mamut ma nkon maséé ni bihélha bi mam ba ntehe Yésu a mboñ. I mbus Yésu a ntiimba ti dihéga diba inyu Ane, dihéga a ma ti i ngii môñgô i tuye Galiléa.​—Matéô 13:31-33; Lukas 13:18-21.