Anyimua xatuane Iesu la itre atr troa mekune la aqane imelekeu i angatr me Akötresie. Ame hna traqa la ketre ewekë ka aijijë nyidrëti troa xatua angatre hmaca. Nyidrëti a ithanata me itre atr e tröne la hnalapa ne la ketre Faresaio.

Itre xan a ithanatane koi Iesu la ketre jol. Angatr a qaja la “itre xa angetre Galilaia” laka, ‘hnei Pilato [Ponotio Gavena i Angetre Roma] hna humuth lo angatr a tro fë huuj.’ (Luka 13:1) Nemene la aliene la itre trengewekë i angatr?

Ma angatre jë a qaja lo angetre Galilaia ka mec lo kola icilekeu me Pilato. Hnei angeic hna xomi mani qa ngöne la trengene mani ne la uma ne hmi, nyine xupi jë i tim e Ierusalema. Nge ma hna nyi xölei angeice hnei itre hene ne hmi. Haawe, itre atr a mekune laka, meci hë angetre Galilaia pine angatr kuca la ngazo. Ngo tha mekuna i Iesu kö.

Hnyinge jë hi nyidrë ka hape: “Tune kaa la mekuna i nyipunie, tru kö la ngazo ne la angetre Galilaia cili hune la itre xa atre Galilaia matre akötrë angatre jë tune lai?” Waea. Ngo nyidrëti a xome la hna melëne celë nyine hmekë angetre Iudra, öni nyidrë: “Ngo maine tha ketre ietra kö nyipunie, tro fe a hane apatrenyi nyipunie tune lai.” (Luka 13:2, 3) Thupene lai, Iesu a qaja jë la ketre akesida ka traqa eue hi lo, hmekune lo kola xupi jë i tim. Nyidrëti a hnyinge ka hape:

“Tune kaa fe lo ala 18 ka mec hna trotro tran hnene lo ita ka draië e Siloama, ame la mekuna i nyipunie, tre ka tru catre kö la ngazo i angatr hune la itre xa atre Ierusalema?” (Luka 13:4) Maine jë, itre atr a mekune laka, hnei angatr hna mec pine la itre ngazo i angatr. Ngo tha mekuna i Iesu kö. Atre hi nyidrë laka, kola traqa la itre jol ke “tha ’te kö la ate la ijine i nyën,” ene “la ijine ngazo ka canga xulu koi angat.” (Ate Cainöj 9:11) Ngo hetre ini, öni Iesu: “Maine tha ietra kö nyipunie, tro fe a hane apatrenyi nyipunie tui angatr.” (Luka 13:5) Hnauëne la nyidrëti a qaja hmaca la ini celë?

Ekö hë nyidrë cainöj e celë, matre nyidrëti a hamëne jë la ketre ceitun. Öni nyidrë: “Hetre ketre iwacua hna traane ngöne la vine ne la ketre trahmany, matre traqa pi hi angeice troa huji wen, ngo pëkö hna öhn. Öni angeice jë hi kowe la atre eënyi vin ka hape, ‘Köni macatre hë ne traqa ni troa hu wene wacua, ngo pëkö ca hnenge hna öhn. Matre, sa pi pe! Ke kola troa angazone fë nemene la dro?’ Önine jë hi la atre eëny ka hape, ‘Maseta, pane nue pi eje koi ca macatre, nge tro ni a sine xötreith me ami a i feja. Matre, e traqa ju wa, haawe ka loi, ngo e pëkö, sa trije pi hë.’ ”—Luka 13:6-9.

Sasaithe hë la köni macatre ne thele Iesu troa aciane la lapaun thei angetre Iudra. Ngazo pe, xalaithe hi la itretre dreng, nge angatre hi la thangane la itre huliwa i nyidrë. Enehila, ngöne la hnaafoane macatre i nyidrë, nyidrëti a nu asë troa cainöj. Matre ame la nyidrë a hamë ini me cainöj e Iudra me Perea, kösë nyidrëti lai a ami a i feja ngöne la sinöe i angetre Iudra. Nemene la thangan? Xalaithe hi la angetre Iudra ka kapa. Matre xele kö la nöj troa ietra, nge angatr a tro kowe la mec.

 Tha qea ju kö e thupen, nge mama hmaca pi la aqane pë lapaune i angatr. Iesu a hamë ini hnine la sunago e Sabath. Öhne ju hi nyidrë la ketre föe ka sakup, ke hna löth hnei dremoni a traqa koi 18 lao macatre. Iesu a utipi angeice jë me hape: “Föe fe, mele hë nyipoti qa ngöne la meci nyipo.” (Luka 13:12) Iesu a ati ime ju hui angeic, matre angeic a canga cile meköt, me atrunyi Akötresie.

Ame hna elëhni la tane la sunago, matre öni angeic: “Sikisi lao drai hna nue troa isa kuci huliwan; haawe, traqa pi ngöne la itre drai cili troa nyinyine la itre mec, ngo tha e Sabathi kö.” (Luka 13:14) Tha angeice kö a qaja ka hape, thatreine kö Iesu aloinyi atr; ngo kolo pe a jelengazo itre atr pine angatr thele mel e Sabath! Iesu a sa mekötine jë ka hape: “Itretre thoi, drei e nyipunie la ka tha feja kau me boliko la drai Sabath me eatrongëne la si nyën troa ij? Nga ka ue pe kö la föe celë matre tha tro kö a nuamele angeic la drai Sabath nge ketre nekö i Aberahama hi, nge hna othe hnei Satana koi 18 lao macatre?”—Luka 13:15, 16.

Hmahma ju hi la itre ka icilekeu, ngo itre atr a madrine la nöjei lolo hna kuca hnei Iesu. Thupene lai, Iesu a qaja hmaca jë la lue ceitun göne la Baselaia, lue ceitun hnei nyidrëti hna hamën qa hune la he, ngöne la Hnagejë Ne Galilaia.—Mataio 13:31-33; Luka 13:18-21.