Iesu be dala idauidau ai taunimanima ia durua edia hetura karana Dirava ida idia laloa totona. Farisea tauna ta ena ruma murimuri ai, ia be taunimanima ida ia herevahereva murinai, unai ia herevalaia danu.

Idia haida ese ia vara gau dikana ta idia herevalaia. Idia gwau “Galilea taudia be boubou idia henia noho neganai, Pilato ese ia aladia.” (Luka 13:1) Unai ena anina be dahaka?

Reana Pilato ese unai Galilea taudia ia hamasedia, badina ranu be Ierusalema lalonai ia abia vareai neganai, ia ese dubu ena moni ia gaukaralaia, bona unai kara dainai Iuda taudia tausen momo idia protest. Pilato be reana hahelaga taudia bona taravatu hadibaia taudia edia heduru amo unai moni ia abia. Iesu dekenai unai sivarai idia gwauraia taudia be reana idia laloa, unai Galilea taudia idia mase badina edia kara be dika. To Iesu be ia lalotamona lasi.

Ia nanadaidia: “Umui laloa unai Galilea taudia edia kara dika ese Galilea taudia oredia edia kara dika ia hereaia dainai, unai dika idia davaria, a?” Iena haere be lasi. To ia vara gauna ia gaukaralaia Iuda taudia ia sisiba henia totona, ia hamaorodia: “Bema umui helalo-kerehai lasi, idia bamona umui ibounai do umui mase.” (Luka 13:2, 3) Bena Iesu ese ia vara dika ma ta ia herevalaia, bona reana unai be ranu ena aru dalana idia karaia noho lalonai ia vara.

Ia nanadaidia: “Siloama ai kohoro ta be taunimanima 18 latanai ia moru bona ia hamasedia neganai, umui laloa edia kara dika ese Ierusalema ai idia noho taudia edia kara dika ia hereaia, a?” (Luka 13:4) Reana hutuma idia laloa unai taudia be sibodia edia kerere dainai idia mase. To Iesu ia lalotamona lasi. Ia diba unai bamona dika be “nega idauidau ai idia vara kava.” (Hadibaia Tauna 9:11) To, taunimanima be unai sivarai amo diba idia abia be namo. Iesu ia gwau: “Bema umui helalo-kerehai lasi, idia bamona umui ibounai do umui mase.” (Luka 13:5) To dahaka dainai Iesu be unai ia gwauraia?

Badina iena haroro gaukara be kahirakahira do ia ore, bona unai hahedinaraia totona, inai parabole ia gwauraia: “Tau ta ena vain umana dekenai fig auna ta ia tubu, bona ia mai huahua ia tahua, to ta ia davaria lasi. Bena vain uma naria tauna dekenai ia gwau, ‘Lagani toi lalonai lau mai inai fig auna dekenai huahua lau tahua, to ta lau davaria lasi. Utua diho! Dahaka dainai ia tubu kava bona huahua ta ia havaraia lasi?’ Ia haere ia gwau, ‘Biaguna e, inai au be lagani ma ta ita rakatania, bona ena badina tano do lau geia bona animal ena kukuri do lau atoa. Bema vaira negana ai huahua ia atoa, unai be namo, to bema lasi, vadaeni oi utua diho.’”​—Luka 13:6-9.

Lagani toi mai kahana lalonai, Iesu ia gaukara goada Iuda taudia edia abidadama ia hagoadaia totona. To, haida sibona be iena hahediba taudia ai idia lao, bona ita gwau diba idia be iena gaukara goada karana ena huahua. Iena haroro gaukara ena lagani namba 4 ai, ia ese ena gaukara ia habadaia noho. Iudea bona Perea ai ia haroro bona hadibaia neganai, unai be hegeregere ia be Iuda ena fig au badinai tano ia  geia bona animal ena kukuri ia atoa. Bona dahaka ia vara? Iuda taudia haida sibona idia kamonai. To momo be idia ura lasi idia helalo-kerehai, unai dainai dika do idia davaria.

Momo idia ura lasi kamonai, bona unai be Sabati dinana ta murinai ia hedinarai lou. Iesu be sinagoga ai ia haroro noho. Bona hahine ta ia itaia, demoni ese ia biagua dainai, lagani 18 lalonai ena doruna ia kwaidu. Iesu ese ia hebogahisi henia, bona ia gwau: “Hahine e, emu gorere amo oi lau ruhaia.” (Luka 13:12) Iesu ena imana be hahine latanai ia atoa, bena hahine ia gini maoromaoro bona Dirava ia hanamoa matamaia.

Sinagoga ia naria tauna be ia badu, bona ia gwau: “Dina 6 idia noho gaukara umui karaia totona. Unai dainai unai dinadia ai umui mai bona gorere do ia hanamoa, to Sabati dinana ai lasi.” (Luka 13:14) Unai tauna ia diba Iesu be mai ena siahu gorere hanamoa totona, to ia ese taunimanima ia gwau henia badina Sabati dinana ai idia mai Iesu ese ia hanamodia totona! To Iesu ia gwau: “Koikoi taudia e, umui ta ta be Sabati dinana ai emui boromakau eiava doniki be ena ruma amo umui ruhaia bona umui hakaua lao ranu ia inua totona, ani? Inai hahine be Aberahamo ena bese amo, bona Satani ese lagani 18 lalonai ia guia. Vadaeni Sabati dinana ai ia lau ruhaia be maoro lasi, a?”​—Luka 13:15, 16.

Iesu ena inai taudia idia hemarai, to hutuma be Iesu ena kara namodia dainai idia moale. Bena Iesu ese Iudea taudia dekenai Basileia ena parabole rua ia herevalaia lou, unai parabole be guna Galilea Gohuna ai bouti dekenai ia helai neganai, ia herevalaia.​—Mataio 13:31-33; Luka 13:18-21.