Jesu sabulezi litaba zeñata kuli asusueze batu kuziba mwa baangela Mulimu. Hape ufumana kolo ya kuambola ni batu babali kwande a ndu ya Mufalisi.

Babañwi ku bona babulela za kozi yeezahezi. Babulela za “Magalilea bao [Mubusi wa Roma yena, Ponse] Pilato naakopanyize mali abona ni matabelo abona.” (Luka 13:1) Batalusañi?

Mwendi Magalilea bao nebabulailwe muta Majuda babañata nebacauzi bakeñisa kuli Pilato naaitusisize masheleñi a tempele kuyepa liabwa leliisa mezi mwa Jerusalema. Pilato mwendi naalumelelani ni manduna ba tempele kuli aitusise masheleñi ao. Batu bababulela za kozi ye, mwendi baikutwa kuli Magalilea nebabulailwe bakeñisa likezo zabona zemaswe. Jesu halumeli taba yeo.

Jesu ubuza kuli: “Kana muhupula kuli Magalilea bani nebali baezalibi babamaswe hahulu kufita Magalilea babañwi kaufela kabakala kuli nebatahezwi ki kozi yeo?” Ualaba kuli batili. Kono uama kwa kezahalo yeo kuli alemuse Majuda, uli: “Mukatimezwa kaufelaa mina sina bona konji haiba mubaka.” (Luka 13:2, 3) Jesu kihona abulela za kozi yeñwi yenesazo ezahala mi mwendi ni yona neitahisizwe ki musebezi wa kuyepa liabwa.

Ubuza kuli: “Bani ba 18 bane bawezwi ki tawala kwa Siloe, mi yababulaya—kana munahana kuli bona nebanani mulatu omutuna hahulu kufita batu babañwi kaufela babapila mwa Jerusalema?” (Luka 13:4) Buñata mwendi buikutwa kuli batu bao nebashwile bakeñisa bumaswe bwabona. Jesu hape halumeli taba yeo. Waziba kuli “nako ni likezahalo zesika libelelwa” litahelanga batu mi mwendi ki zona zetisize kozi ye. (Muekelesia 9:11) Nihakulicwalo, batu baswanela kuituta sesiñwi kwa kezahalo yeo. Jesu uli: “Mukatimezwa kaufelaa mina ka nzila yeswana konji haiba mubaka.” (Luka 13:5) Kono ki kabakalañi hakoñomeka za taba ye cwale?

Ki kabakala nako yesiyezi ya bukombwa bwahae, mi ufa swanisezo yeama taba ye, uli: “Mutu yomuñwi naacezi kota ya feiga mwa simu yahae ya veine, mi ato bata miselo kwateñi kono naasika fumana sesiñwi. Kihaa li ku mulimi wa veine: ‘Hakubone, seli lilimo zetaalu ninze nitahanga kuto bata miselo kwa kota ye, kono hanifumani sesiñwi kwateñi. Haku ileme! Ki sika mañi seika sinyeza mubu cwalo?’ Yena amualaba, ali: ‘Mulena, hakuituhele iine silimo silisiñwi hape, kufitela niilimelela ni kuibeya musutelo. Haiba ibeya miselo kwapili, fo ikaba hande; kono haiba isabeyi, kihona uka ilema.’”—Luka 13:6-9.

Ka nako yefitelela lilimo zetaalu, Jesu naanze alika kutusa Majuda kuba ni tumelo. Kono ki basikai feela bababile balutiwa bahae mi baangiwa sina muselo wa musebezi wahae. Cwale mwa silimo sabune sa bukombwa bwahae, usebeza hahulu ka taata. Kuswana feela inge kuli ulimelela ni kubeya musutelo kwa kota ya feiga, bona Majuda, ka kukutaza ni kuluta batu mwa Judea ni mwa Perea. Ki lika mañi zene zwile mwa buikatazo bwahae? Ki Majuda feela basikai bane babile balutiwa bahae. Ka sikwata,  sicaba sihanile kubaka mi cwale silibelezi kutimezwa.

Hamulaho wa fo, ili la Sabata, Majuda hape babonisa moya wabona wakusa lumela. Jesu hanze aluta batu mwa sinagoge, ubona musali yanyandisizwe, ni kukotobaniswa ki mudimona ka lilimo ze 18. Ka mukekecima, Jesu umubulelela kuli: “Musali, ulukuluzwi kwa butuku bwahao.” (Luka 13:12) Jesu umubeya mazoho fahalimu, mi honafo musali yo waotoloha ni kukanyisa Mulimu.

Taba yeo inyemisa hahulu nduna wa sinagoge, mi ubulela kuli: “Kunani mazazi a 6 a kusebeza; cwale mutahange mwa mazazi ao mutofoliswa, isiñi fa lizazi la Sabata.” (Luka 13:14) Nduna yo halatuli kuli Jesu unani maata akufolisa batu, kono unyaza batu babatile kuto foliswa la Sabata! Jesu umualaba ka kuutwahala, uli: “Mina baipi, kana mañi ni mañi wamina halukululangi poho yahae kamba mbongolo yahae mwa mulaka ni kuyo inwisa mezi la Sabata? Kana musali yo, ili mwanaa Abrahama, yanaatamilwe ki Satani lilimo ze 18, haswaneli kulukululwa mwa liwenge le fa lizazi la Sabata?”—Luka 13:15, 16.

Balwanisi ba Jesu baswaba, kono buñata bwataba kabakala kezo yende yaezize. Cwale Jesu hali mwa Judea ukutela liswanisezo zepeli za bupolofita zebulela ka za Mubuso, ili zanaabulezi kale kwamulaho hanaali mwa sisepe mwa Liwate la Galilea.—Mateu 13:31-33; Luka 13:18-21.