Yesu esekele kukafwa vatu mujijila jajivulu mangana vashinganyeke hausoko wavo naKalunga. Omu akumishile kushimutwila navatu haweluka wazuvo yakaFwaliseu umwe, kwepukile chihande chikwavo.

Vatu vamwe vahanjikile haponde yimwe yasolokele. Vahanjikile hachihande “chavaka-Ngalileya vamwe vaze vakwechi manyinga avo aze [Nguvulu wavaLoma Pondeu] Pilatu afutwile nawawa avimuna javo vakuvatula.” (Luka 13:1) Uno mazu kana alumbunwine ika?

Pamo ava vaka-Ngalileya vapwile hamakombakaji avatu vaze vajihile omu vaYuleya valikangile kuli Pilatu uze azachishile jimbongo jamuchikasha chatembele hakufula kapila wakuneha meya muYelusalema. Pilatu pamo atambwile jimbongo kana hakulivwasana navaze vazachilenga kutembele. Ngocho vatu vaze vahanjikile vyaponde kana vashinganyekele ngwavo vaka-Ngalileya vamwene vyuma kana mwomwo yavilinga vyavo vyavipi. Oloze Yesu ketavilile vishinganyeka kanako.

Ngocho avahulishile ngwenyi: “Enu munashinganyeka ngwenu vaze vaka-Ngalileya hakuyanda ngachize vapwile vaka-shili chikuma kuhambakana vakwavo vaka-Ngalileya vosena tahi?” Kaha ambile ngwenyi, nduma. Oloze ahuhumwine vaYuleya ngwenyi: “Kuvanga mupihilile nakwalumuka, mokomoko nayenu nawa navakaminongesa muvosena.” (Luka 13:2, 3) Yesu ahanjikile nawa haponde yikwavo yize pamo yasolokele mwomwo yakufula uze kapila kameya, kaha ambile ngwenyi:

“Vatu 18 vaze kashiukilile kaposhi kakuShilowame nakuvajiha, munashinganyeka ngwenu, vakiko vapwile vaka-shili chikuma kuhambakana vakwavo vosena vatwama muYelusalema tahi?” (Luka 13:4) Liyongomena lyavatu vashinganyekele ngwavo vatu kana vafwile mwomwo yavilinga vyavo vyavipi. Oloze Yesu nawa ketavilile vishinganyeka vyavoko. Atachikijile ngwenyi “lwola navyuma vyakwiza mukukasumuna” vikiko vyalingishile kupwenga ponde kana. (Muka-kwambulula 9:11) Vatu vatelelele kulinangula vyuma vimwe kuponde kaneyi yasolokele. Yesu ambile ngwenyi: “Kuvanga mupihilile nakwalumuka, mokomoko muvosena navakaminongesa nge omu vanongele vakiko.” (Luka 13:5) Uno mwomwo ika ashindakanyine chihande kana halwola kanelu?

Mwomwo yakuchihela apwile nakwambulwila mujimbu, kaha avalwezele chifwanyisa ngwenyi: “Mutu umwe apwile namukuyu uze atumbile muwande wenyi wamivinyo. Kaha ayile nakutondako mihako, oloze kayiwanyineko. Jino ambile kuli muka-kuzata muwande wamivinyo ngwenyi, ‘Tala, ngunezanga nakutondatonda mihako kumukuyu uno hamyaka yitatu, oloze kuyiwananga nduma. Upakule! Ikaze nauzezekela mavu?’ Ikiye amukumbulwile ngwenyi, ‘Ove mwata, achiweche nawa mwaka umwe mangana nguchipululeko nakuhakako wilo. Kachi nge kulutwe naukema mihako, kaha chamwaza. Oloze nge pimbi, kaha naukaupakula.’”—Luka 13:6-9.

Hamyaka yakuzomboka yitatu, Yesu esekele kukafwa vaYuleya vasolole lufwelelo lwavo. Kaha vamwe nawa vapwile tumbaji twenyi, ngocho vapwile mihako yakumilimo yenyi. Omu ahetele mumwaka wamuchiwana mumulimo wenyi wakwambulula, azachile chikuma nangolo. Mulimo wakwambulula nakunangula uze azachile Yesu muYuleya namuPeleya wafwanyine nge apwile nakuchipulula kumutondo wamukuyu wavaYuleya nakuhakako wilo. Vyuma muka vyafuminemo? VaYuleya vavandende kaha vakiko vakwileko kanawa. Oloze vaYuleya vavavulu  vakanyine kupihilila nakwalumuka, ngocho vapwile mujila yakuya kukunonga.

Kufumaho, vaYuleya vavavulu vakanyine cheka kwitavila Yesu haSambata. Omu Yesu apwile musunangonga nakunangula, amwene pwevo uze azembamine chikuma hamyaka 18 mwomwo yakumuyanjisa kuli ndemone wamupi. Ngocho evwilile keke uze pwevo, kaha amulwezele ngwenyi: “Ove pwevo, unasokoka kukuviza chove.” (Luka 13:12) Yesu anangikile mavoko enyi hali uze pwevo, kaha hahaze vene uze pwevo olokele nakwimana kanawa nakuputuka kutohwesa Kalunga.

Chuma kana chevwishile muka-kutwaminyina sunangonga kupihya, kaha ambile ngwenyi: “Kuli makumbi 6 aze vatu vatela kuzata milimo, shikaho twayenu vamyuke hamakumbi kana awa, keshi halikumbi lyaSambatako.” (Luka 13:14) Uze muka-kutwaminyina sunangonga kambile ngwenyi Yesu kapwile nangolo jakuka vatuko, oloze apwile nakutenukila vatu nge kavatela kwiza nakuvoka halikumbi lyaSambatako. Yesu amukumbulwile mujila yamangana ngwenyi: “Enu vaka-kulyonga, uno iya hali enu keshi kukasununa ngombe yenyi chipwe chimbulu chenyi muchipato nakumutwala akanwe meya haSambatako? Kutala ou pwevo mwanaApalahama, ou vakashile kuli Satana hamyaka 18, katelele kumukasununa mukuli kaneyi halikumbi lyaSambatako numba?”—Luka 13:15, 16.

Vaka-kole jaYesu vevwile sonyi, oloze mayongomena avatu vosena awahililile havyuma vyamwaza alingilenga Yesu. Jino Yesu omu apwile muYuleya ahanjikile cheka havifwanyisa vivali vyamuupolofweto vyakutalisa kuWangana vize ahanjikile hakavanga omu apwile muwato haKalungalwiji waNgalileya.—Mateu 13:31-33; Luka 13:18-21.