Na vários manera, Hesus a purba di animá e hendenan pa pensa riba nan relashon ku Dios. Despues di su kòmbersashon ku e multitut ku tabata pafó di e kas di e fariseo, el a haña un otro oportunidat pa animá e hendenan.

Algun di nan a kuminsá kont’é di e tragedia di “e galileonan ku [e gobernador romano Ponsio] Pilato a laga mata” ora e personanan akí tabata ofresé sakrifisio. (Lukas 13:1) Pero kiko nan tabata ke bis’é?

Tabata asina ku Pilato a usa plaka di e tesoreria di e tèmpel, ku kisas el a haña ku yudansa di e personanan ku tabata dirigí na e tèmpel, pa laga konstruí un akuadukto pa suministrá Herúsalèm ku awa. P’esei míles di hudiu a rebeldiá kontra Pilato; durante e rebelion akí, tabatin galileonan ku a ser matá. E hendenan ku tabata konta Hesus di e tragedia akí kisas tabata pensa ku e galileonan a haña nan morto pasobra nan tabata hasi hopi maldat. Pero Hesus no tabata di akuerdo ku nan.

El a puntra nan: “Boso ta kere ku e galileonan ei tabata mas pekadó ku tur otro galileo pasobra esaki a pasa ku nan?” Anto e mes a kontestá su pregunta; el a bisa nan: “Nò!” No opstante, el a usa e mesun kaso ei pa spièrta e hudiunan. El a bisa nan: “A ménos ku boso arepentí, boso tur lo ser destruí meskos ku nan.” (Lukas 13:2, 3) Anto Hesus a kuminsá papia di un otro tragedia ku kisas a kaba di sosodé i ku tambe lo tabatin di haber ku e konstrukshon di e akuadukto. El a puntra nan:

“E 18 hendenan ku a muri ora ku e toren di Siloam a kai riba nan tabata mas kulpabel ku tur otro hende ku ta biba na Herúsalèm?” (Lukas 13:4) Podisé e multitut tabata pensa ku e hendenan ei a muri debí na un òf otro mal echo ku nan a kometé. Atrobe Hesus no tabata di akuerdo ku nan. Hesus tabata sa ku tur hende por haña nan ku “tempu i suseso imprevisto” i ku probablemente esei tabata e kaso ku e tragedia akí tambe. (Eklesiástes 9:11, NW) E pueblo mester a saka un lès for di e suseso ei. Hesus a bisa: “A ménos ku boso arepentí, boso tur lo ser destruí meskos ku nan.” (Lukas 13:5) Pero dikon Hesus a enfatisá e lès akí?

Esaki ta debí ku e tabata den e último etapa di su sirbishi riba tera. I el a ilustrá su punto asin’akí: “Un hòmber tabatin un palu di figu plantá den su kunuku di wendrùif, i el a bin buska fruta na e palu, ma e no a haña nada na dje. I el a bisa e trahadó den e kunuku di wendrùif: ‘Ya ta di tres aña kaba ku mi ta bin buska fruta na e palu di figu akí sin haña nada. Kap e basha abou! Pakiko e mester keda pòrnada den tera?’ E trahadó a kontest’é: ‘Shon, lag’é keda e aña akí tambe, te ora ku mi koba rònt di dje i pone mèst; anto si e pari den futuro, ta bon; ma si e no pari, e ora ei lo bo kap e basha abou.’”—Lukas 13:6-9.

Hesus tabatin mas ku tres aña ta purba di kultivá fe di e hudiunan. Tòg, ta masha poko di nan a bira su disipel i por a ser mirá komo fruta di su trabou. Awor, ku e tabata den e di kuater aña di su sirbishi riba tera, el a intensifiká su aktividat. Tabata komo si fuera el a koba i pone fertilisante rònt di e palu di figu simbóliko ku a representá e  nashon hudiu. Sí, e tabata predikando i siñando hende na Hudea i Perea. Kiko tabata e resultado? Atrobe, ta un grupo chikitu di hudiu so a pone fe den dje. E hudiunan en general a nenga di arepentí, p’esei awor destrukshon tabata spera nan.

Loke a sosodé un poko despues riba un sabat tambe a mustra e falta di fe di e hudiunan. Wèl, ora Hesus tabata siña e hendenan den un snoa, el a mira un señora ku tabatin 18 aña ta kana doblá debí na un spiritu impuru ku tabata afligié. Hesus a mustra kompashon pa e señora i a bis’é: “Bo ta librá di bo malesa.” (Lukas 13:12) Hesus a pone man riba dje i mesora e señora a stret su kurpa i kuminsá duna gloria na Dios.

Ora e presidente di e snoa a mira loke a pasa, el a rabia mashá. El a bira bisa e multitut: “Tin seis dia pa hende traha; p’esei, bini riba un di e dianan ei i haña kurashon, i no riba dia di sabat.” (Lukas 13:14) E presidente no a nenga ku Hesus tin poder pa kura hende; mas bien, e tabata kontra ku e hendenan tabata bai serka Hesus pa ser kurá riba sabat! Hesus a bis’é: “Hipókritanan, akaso kada un di boso no ta lòs su toro òf su buriku for di stal riba sabat i hib’é bai bebe awa? No tabata na su lugá anto pa libra e muhé akí ku ta yu di Abraham riba dia di sabat, un muhé ku Satanas tabatin 18 aña mará?”—Lukas 13:15, 16.

Hesus su opositornan a haña bèrgwensa, pero e multitut tabata kontentu ku e obranan maravioso ku Hesus tabata efektuá. Anto Hesus a konta nan dos ilustrashon tokante e Reino ku el a yega di konta un tempu mas promé for di un boto na Laman di Galilea.—Mateo 13:31-33; Lukas 13:18-21.