Diospa rikëninchö imanö këkäyanqanta rikäkuyänampaqmi, Jesusqa nunakunata mëtsika kuti yanapëta tïrashqa karqan. Mikoq convidanqan fariseupa wayimpita yarqurirmi mëtsika nunakunata parlaparqan, jina yapëmi tsë asuntupaq tsëchö nunakunata parlaparqan.

Wakinkunam Jesusta willayarqan pishtashqa ofrendata qoykaq “Galilëa nunakunapa yawarninta Pilätu ramashqa kanqanta” (Lücas 13:1). ¿Pikunapaqtaq parlëkäyarqan?

Itsachi Jerusalenman yakuta chätsinampaq templu qellëta Pilätu utilizashqa kaptin, mëtsika waranqa judïukuna contran sharkuyanqanchö tsë Galilëa nunakunataqa wanutsiyarqan. Itsachi Pilätuqa templuchö mandakoqkunapa yanapakïninkunawan tsë qellëta chaskishqa karqan. Tsë desgraciapita Jesusta willaqkunaqa, itsachi pensayarqan tsë Galilëa nunakunaqa mana allita rurayanqanrëkur castigashqa kayanqanta. Peru Jesusqa manam tsënötsu pensarqan.

Tsëmi pëkunata kënö tapurqan: “¿Tsë Galilëa nunakunaqa wakin kaq Galilëa nunakunapitapis mas jutsasapa karnin tsëkunapa pasayanqantaku qamkuna pensayanki?”. Manam, nirqanmi Jesusqa. Peru tsëpaq parlarmi judïukunata kënö atikarqan: “Sitsun arrepentikuyankitsu, tsëqa qamkunapis llapëkim pëkunanö ushakäyanki” (Lücas 13:2, 3). Tsëpitanam, tsëllaraq juk desgracia pasakunqampaq pëkunata Jesus parlaparqan, itsachi tsëqa, Jerusalenman yakuta apayanqanrëkur pasakushqa karqan.

Jesusqa kënömi nirqan: “Siloam törri janankunaman juchur wanutsinqan chunka puwaq (18) nunakunapis, ¿Jerusalenchö täraq wakin nunakunapita mas jutsasapa kashqa kayanqantaku qamkuna pensayanki?” (Lücas 13:4). Jutsata rurashqa kayanqanrëkur wanushqa kayanqantachi tsë nunakunaqa pensayarqan. Peru Jesusqa manam tsënötsu pensarqan. Sinöqa, llapankunata imapis “mana pensayanqan hörachö” pasanqantam musyaq, y itsachi tsë kutichöpis tsënö pasakushqa karqan (Eclesiastes 9:11). Y Jesusqa tsë pasakunqampaq parlarmi nunakunata kënö atikarqan: “Sitsun arrepentikuyankitsu, tsëqa qamkunapis pëkunanömi llapëki ushakäyanki” (Lücas 13:5). ¿Imanirtaq Jesusqa pëkunata tsënö atikarqan?

Porqui sagrädu rurëninmi usharinanna karqan. Tsëmi juk igualatsikïwan kënö nirqan: “Juk nunapam üvas chakranchö hïgus montin kapurqan, y wayunqanta asheqmi shamurqan, peru manam ni imatapis tarirqantsu. Tsëpitanam üvas chakranchö trabajaqta kënö nirqan: ‘Rikë, kima watanam kë hïgus montipa wayïninta asheq shamurqö, peru manam imatapis tarirqötsu. ¡Wallurïkï! ¿Imapaqraq mana wayïkaptinqa chakrata perditsir katsishun?’. Tsëta contestarnam pëqa kënö nirqan: ‘Teytë, juk wata masllana jaqiri jiruroqnimpa oqtïkur wanun jicharkunäpaq. Tsëwan wayuptinqa, allim kanqa, peru mana wayuptinqa, tsënam sïqa wallurinki’” (Lücas 13:6-9).

Jesusqa kima watapitapis masnam, judïukuna markäkuyänampaq yanapëta tïrashqa karqan. Tsënö kaptimpis, wallkaqllam qateqninkunaqa tikrashqa kayarqan. Y sagrädu rurëninchö  chusku watata qallëkarqa, masran tsëta ruranampaq kallpachakurqan. Imëka “hïgus montipa” jiruroqninman patsata uchkurir wanuta jichëkaq cuentam, Judëachö y Perëachö judïu nunakunata willar y yachatsir këkarqan. Tsënö rurëkaptimpis, wallkaq judïukunallam pëman creikuyarqan. Tsënö mana arrepentikuyanqanrëkurmi entëru nacion ushakänan karqan.

Tsënö mana creikoq kayanqanqa yapëmi rikakärirqan. Säbadu junaqchö Diosta adorayänan wayichö yachatsikïkarmi, 18 watapana supë qorukätsishqa warmita rikärirqan. Tsëmi kuyëpa tsë warmita Jesus kënö nirqan: “Warmi, kananmi qeshyëkipita libri tikrarinki” (Lücas 13:12). Y yatariptinmi, tsë warmiqa jinan höra derechakärirqan y Diosta alabar qallëkurqan.

Diosta adorayänan wayita rikaq nuna tsëta rikëkurmi, alläpa piñakur kënö nirqan: “Joqta junaqmi kan imëka trabäjuta ruranapaq; tsëqa, tsë junaqkunachö shayämï y kachakätsishqa kayë, peru ama Säbadu junaqchöqa” (Lücas 13:14). Tsë nunaqa manam Jesus poderyoq kanqantaqa negarqantsu. Sinöqa Säbaduchö kachakëta munar ëwaqkunatam piñaparqan. Tsënam Jesusqa kënö nirqan: “¡Ishkë qaqllakuna! ¿Manaku qamkunaqa Säbaduchö törïkikunata o ashnïkikunata wataränampita paskayanki y yakütseq apayanki? Tsëqa, ¿manatsuraq kë warmiqa, Abrahanpa wamran këkar, y chunka puwaq (18) watapana Satanas sufritsishqa këkaptinqa, Säbadu junaqchö librakashqa kanman?” (Lücas 13:15, 16).

Tsë höram contranchö këkaqkunaqa penqakur qallëkuyarqan, peru wakinqa tsë warmi kachakanqampitam kushikuyarqan. Tsëpitanam, Galilëa qochachö juk barcupita patsë Diospa Gobiernumpita ishkë igualatsikïkunawan yachatsikunqanta yapë yachatsikurqan, tsëqa shamoq tiempuchömi cumplikänan karqan (Mateu 13:31-33; Lücas 13:18-21).