Imaymanamanta rimaspan Jesusqa runakunata kallpacharan Diospaq jina kausanankupaq. Juj fariseoq wasin punkupi runakunawan rimashaspapas wajmantan chaymanta rimaran.

Chay runakunamanta wakinmi Jesusman willaranku: “Pilaton Galilea ladomanta wakin runakunata wañuchiran sacrificiota jaywashaqtinku”, nispa (Lucas 13:1).

Chay Pilaton Jerusalenman unu jaykunanpaq juj canalta ruwachisqa templopi kaq qolqewan, payqa templomanta encargadokunawan rimanakuspas chay qolqetaqa oqarinman karan. Jinan waranqanpi judío runakuna payman quejakuq jamuqtinku Pilatoqa wakin runakunata wañuchisqa. Chaymantan Jesusman willaq runakunaqa rimashankuman karan. Paykunapaqqa chay wañuchisqa runakunaqa imapas mana allin ruwasqankumantan wañuyta tariranku.

Ichaqa manan chhaynachu karan, chaymi Jesusqa niran: ‘Qankunaqa nishankichispaschá: “Chay runakunaqa llapa Galilea runakunamantapas aswan juchasapachá karanku, chaychá chhaynataqa wañuranku”, nispaykichis’, nispa. Jinaspa niran: “Manachus juchaykichismanta pesapakunkichis chayqa, llapaykichismi qankunapas paykuna jina wañunkichis”, nispa (Lucas 13:2, 3). Chaymantataq juj accidente pasasqanmanta willaran.

Niranmi: ‘Siloam torre urmaykamuspa chunka pusaqniyoq runakunata wañuchisqanmantapas ninkichispaschá: “Paykunaqa Jerusalenpi tiyaq llapa runakunamantapas aswan juchayoqchá karanku”, nispaykichis’, nispa (Lucas 13:4). Chhaynatapaschá chay runakunaqa piensasharanku, Jesusmi ichaqa yacharan lliupas qonqaylla “imaynapipas” tarikusqankuta (Eclesiastés 9:11). Chaywanpas niranmi: “Manachus juchaykichismanta pesapakunkichis chayqa, llapaykichismi qankunapas paykuna jina wañunkichis”, nispa (Lucas 13:5).

Jinaspa chay nisqanta allinta entiendechinanpaq juj ejemplota churaran. Niranmi: “Juj runaq uvas chajranpin higos sach’a plantasqa karan. Chay runan chay sach’amanta higosta pallaq riran, ichaqa manan ima rurutapas tariranchu. Chaymi uvas chajrapi llank’aqta niran: ‘Ñan kinsa wataña jamushani kay sach’amanta higosta pallaq, ichaqa manan imatapas tarinichu, chayrayku wit’urapuy, yanqan allpata usuchishan’, nispa. Paytaq niran: ‘Patrón, jinalla juj watatawan kachun, wanucharusaqraq muyuriqninta jasp’iruspa, sichus chaywan rurunqa chayqa, allinmi kanqa, mana ruruqtintaq wit’uchipunki’”, nispa (Lucas 13:6-9).

Chay higos sach’ata plantaq runa jinan Jesusqa kinsa wata masña judío runakunata yachachisharan, ichaqa pisillan paypi iñiranku. Chaymi Jesusqa tawa kaq watapi astawan predicaran Judeapi Pereapi ima. Chay ruwasqanmi karan higos sach’ata astawan wanuchachiq runaq ruwasqan jina. Chaywanpas pisillan paypiqa iñiranku, chaymi chay Israel nacionqa chinkachisqa kananpaq jina kasharan.

Chay nación chhayna kasqanmi allinta rikukuran juj sábado p’unchaypi sinagogapi Jesús  kashaqtin. Chaypin payqa yachachishaspa rikuran juj onqosqa warmita, chay warmiqa 18 watañan k’umusqalla puriq kasqa juj supaypa causanpi. Chaymi Jesusqa payta khuyapayaspa niran: “Ususíy, onqoyniykimantan kacharichisqa kanki”, nispa (Lucas 13:12). Jinan chay warmiqa Jesús makinta churaykuqtin kaq rato qhaliyapuran, jinaspa Diosta jatunchayta qallariran.

Sinagogapi umalliqmi ichaqa phiñasqa niran: “Soqta p’unchaymi kan imapipas llank’anapaqqa, chhaynaqa chay p’unchaykunayá jamuychis qhaliyachisqa kanaykichispaqqa, amataq sábado p’unchaychu”, nispa (Lucas 13:14). Chay runapaqqa manan allinchu karan sábado p’unchaypi qhaliyachisqa kayqa. Chaymi Jesusqa niran: “Iskay uyakuna, ¿manachu qankunaqa sapankaykichis sábado p’unchaypi toroykichistapas asnoykichistapas kacharinkichis unuta ujachinaykichispaq? ¿Chaychu kay warmiqa Abrahanpa ususin kashaspa, chunka pusaqniyoq wataña Satanaspa watasqan kashaspa sábado p’unchaypi mana kacharichisqa kanman?”, nispa (Lucas 13:15, 16).

Chayta niqtinmi Jesuspa contranpi kaqkunaqa p’enqarikapuranku, llapa runakunataq ichaqa kusikuranku Jesuspa imachus ruwasqanmanta. Jinan Jesusqa Galilea qochapi kashaspa iskay ejemplokuna willasqanta paykunamanpas willaran (Mateo 13:31-33; Lucas 13:18-21).