Na furu difrenti fasi Yesus pruberi fu meki den sma prakseri fa Gado e denki fu den. Baka te Yesus taki nanga den sma na a oso fu wan Fariseiman, a e kisi wan tra okasi fu sori den a sani disi.

Sonwan fu den sma e taki fu wan ogri sani di pasa. Den e fruteri Yesus „a tori fu den Galileasma”. Den taki dati ’Granman Pontius Pilatus fu Rome ben kiri den Galileasma di ben tyari ofrandi’ (Lukas 13:1). San ben pasa?

Kande den kiri den Galileasma disi di dusundusun Dyu opo densrefi teige Pilatus. A tiriman disi ben gebroiki a moni fu a tempel fu seti kokro fu tyari watra kon na ini Yerusalem. A kan taki den sma di ben e teki fesi na ini a tempel sorgu taki Pilatus feni a moni disi. Kande den sma di fruteri a tori disi feni taki den Galileasma dede fu di den ben du wan lo ogri. Ma Yesus no e agri nanga disi.

Yesus e aksi den: „Unu denki taki fu di den sani disi pasa nanga den Galileasma disi, dan dati wani taki dati den ben de moro bigi sondari leki ala den tra Galileasma?” Yesus srefi e piki: „Nôno”. Ma a e gebroiki a tori disi fu warskow den Dyu. A e taki: „Efu unu no abi berow, dan un alamala o dede neleki den” (Lukas 13:2, 3). Baka dati Yesus e taki fu wan tra sari sani di pasa. A kan taki a sani disi pasa no so langa pasa, na a ten di den ben e seti den kokro fu tyari watra kon na ini Yerusalem.

Yesus e taki: „Prakseri sosrefi den tina-aiti sma di a toren fu Silowam ben fadon na den tapu èn kiri den. Unu denki taki den ben de moro bigi sondari leki ala den tra sma di e libi na ini Yerusalem?” (Lukas 13:4) Kande den sma feni taki den tina-aiti sma disi dede fu di den du wan sondu. Yesus e sori den baka taki disi no tru. A sabi taki ’ogri ten nanga sani di sma no e fruwakti kan miti ala sma’ (Preikiman 9:11). Soleki fa a sori, dan na dati pasa nanga den sma disi. Ma a pipel musu leri wan sani fu a tori disi. Yesus e taki: „Efu unu no abi berow, un alamala o dede neleki den” (Lukas 13:5). Ma fu san ede Yesus feni en so prenspari fu leri den sma a sani disi now?

Yesus e du disi fu di a diniwroko fu en o kon na wan kaba heri esi. Fu tyari disi kon na krin, a e fruteri wan agersitori. A e taki: „Wan man ben prani wan figabon na ini en droifidyari èn a ben kon suku froktu na a bon, ma a no feni nowan. Ne a taigi a sma di ben wroko na ini a droifidyari: ’Luku, dri yari kaba mi e kon suku froktu na a figabon disi, ma mi no feni nowan. Koti en trowe! Fu san ede a musu tan fu soso dyaso na ini a dyari?’ A man piki en: ’Mi Masra, meki a bon tan a yari disi ete, dan mi o diki wan olo lontu en èn mi o poti mèst gi en. Efu a o gi froktu na ini a ten di e kon, dan dati bun. Ma efu a no gi froktu, dan yu kan koti en trowe.’”​—Lukas 13:6-9.

Moro leki dri yari Yesus pruberi fu meki a bribi fu den Dyu gro. Ma wan tu nomo tron disipel fu en. Den disipel disi de leki den froktu di a piki. Ma now a e preiki sowan fo yari kaba èn a e du moro muiti fu yepi den Dyu. Yesus e preiki na ini Yudea nanga Perea èn a e gi furu Dyu leri drape. Na agersi fasi a e diki wan olo lontu wan figabon fu poti mest gi en meki a gi nyanyan. San na a bakapisi? Wan tu Dyu nomo e gi yesi na a boskopu fu en. Ma moro furu fu den Dyu e weigri fu sori berow. Dati meki den o kisi pori.

Heri esi a o kon na krin baka na Sabat-dei  taki den Dyu no e gi yesi na Yesus. Te a e gi leri na ini wan snoga, a e si wan uma di abi wan ogri yeye na en tapu. Tina-aiti yari kaba na ogri yeye e meki na uma siki. Na uma en skin kron so te, taki a no man tanapu leti-opo. Fu di Yesus e sari na uma, meki a e taigi en: „Uma, yu musu kon betre fu a siki fu yu” (Lukas 13:12). Yesus e poti en anu na uma tapu èn wantewante a e tanapu leti-opo, dan a e gi Gado glori.

A sani disi e meki taki a fesiman fu a snoga ati bron. A e taki: „Unu abi siksi dei fu du wroko. Fu dati ede, na den dei dati un musu kon efu unu wani kon betre, ma no kon na Sabat-dei” (Lukas 13:14). Disi no wani taki dati a man no e si taki Yesus abi a makti fu dresi sma. Ma na krutu a e krutu a pipel fu di den kon na a snoga na Sabat-dei fu meki Yesus dresi den! Yesus e taigi en wan sani di ala sma man frustan krin: „Hoigriman, na Sabat-dei ibriwan fu unu e lusu en mankaw noso en buriki fu puru den na ini a pen èn tyari en go dringi, a no so? A no fiti dan taki na uma disi di de wan bakapikin fu Abraham èn di Satan ben tai tina-aiti yari langa, kon fri fu a sani disi na Sabat-dei?”​—Lukas 13:15, 16.

Den gensman firi syen, ma den tra sma prisiri di den si den kefalek moi sani di Yesus du. Dyaso na ini Yudea, Yesus e taki baka fu tu agersitori fu a Kownukondre. Di a ben de na ini wan boto na a Se fu Galilea, a ben fruteri den sma di ben e tanapu na a sesyoro den agersitori disi tu.​—Mateyus 13:31-33; Lukas 13:18-21.