Benɛ Yesu ngɛ Yudea a, e ngɔ nɔ́ hetomi nɔ́ ko nɛ kɔɔ tohi kɛ to tsu he ɔ kɛ tsɔɔ ní. Akɛnɛ nihi nɛ a ngɛ lɛ tue bue ɔ lɛɛ tohi he je ɔ, a nu nɔ́ hetomi nɔ́ ɔ sisi. Eko ɔ, Yuda bi ɔmɛ ma kai kaa David de ke: ‘Yehowa ji ye Hyɛlɔ; nɔ́ ko nɔ́ ko he hia we mi. E haa nɛ i jɔɔ ye he ngɛ nga mumu nɔ, nɛ e ngɔɔ mi kɛ yaa takuhi kɛ a mi nyu jɔjɔɛ he.’ (La 23:1, 2) Ngɛ la kpa ko hu mi ɔ, David de e nyɛmimɛ Israel bi ɔmɛ ke: ‘Nyɛ ha nɛ wa kpla si ngɛ Yehowa, wa Bɔlɔ ɔ nane nya. Ejakaa wa Mawu ji lɛ! Wɔ ji e ma a nɛ; lɛ nɛ e hyɛɛ wa nɔ.’ (La 95:6, 7) Behi fuu ɔ, a ngɔɔ Israel bi nɛ a ngɛ Mose Mlaa a sisi ɔ kɛ toɔ tohi a he.

Ngɛ Mose Mlaa a nya a, Israel bi ɔmɛ ngɛ kaa “tohi” nɛ a ngɛ “to tsu” mi. Mlaa a ngɛ kaa gbogbo nɛ po Israel bi ɔmɛ a he piɛ ngɛ ma jeli ɔmɛ a ní yaya amɛ a he. Se Israel mlaa tsɔɔli ɔmɛ a hyɛ we Mawu to ɔmɛ a nɔ saminya. Enɛ ɔ he ɔ, Yesu de mɛ ke: “I ngɛ nyɛ dee anɔkuale mi ke, ke to tsu ngɛ, nɛ nɔ ko ya kuɔ kɛ gu he kpa kɛ sɛ mi, se e gui to tsu ɔ nya a, jamɛatsɛ ɔ, julɔ kɛ ojo fialɔ ji lɛ. To hyɛlɔ ɔ, to tsu ɔ nya e guu kɛ sɛɛ mi.”​​—Yohane 10:1, 2.

Eko ɔ, Yuda bi ɔmɛ ma susu kaa ni komɛ nɛ a pee a he kaa mɛ ji Mesia a, aloo Kristo ɔ a he munyu nɛ Yesu ngɛ tue ɔ nɛ. Nihi nɛ a peeɔ a he jã a ngɛ kaa juli loo ojo fiali. E sɛ nɛ Israel bi ɔmɛ nɛ a nyɛɛ nimli nɛ ɔmɛ a se. Mohu ɔ, e sa nɛ a nyɛɛ “to hyɛlɔ ɔ” nɛ Yesu ngɛ e he munyu tue ɔ se.

Yesu de ngɛ to hyɛlɔ ɔ he ke: “Agbo ɔ nya bulɔ ɔ bliɔ haa lɛ. To ɔmɛ le e gbi, ejakaa e kɛ a biɛ tsɛɔ mɛ, nɛ e tsɔ́ɔ́ mɛ kɛ jeɔ kpo. Ke e je to ɔmɛ kpo ɔ, lɛ nitsɛ e nyɛɛɔ hɛ mi, nɛ to ɔmɛ nyɛɛɔ e se, ejakaa a le e gbi. Ke nɔ kpa ko tsɛ to ɔmɛ ɔ, a nyɛɛ we e se, se a tuu fo kɛ jeɔ e he, ejakaa a li nɔ kpa gbi.”​​—Yohane 10:3-5.

Be ko nɛ be ɔ, Yohane Nɔ Baptisilɔ ɔ tsu ní kaa agbo nya bulɔ, nɛ e tsɔɔ nihi nɛ a ngɛ kaa tohi ngɛ Mlaa a nya a kaa Yesu ji nɔ nɛ e sa nɛ a nyɛɛ e se. Ngɛ anɔkuale mi ɔ, Galilea bi komɛ kɛ Yudea bi komɛ nu Yesu gbi. Jije Yesu ma ‘tsɔ́ mɛ’ kɛ ya? Ke a nyɛɛ e se ɔ, kɛ a ma ná he se ha kɛɛ? Nihi nɛ a ngɛ lɛ tue bue ɔ a ti ni komɛ li se nami nɛ a ma ná, ejakaa ‘a nui nɔ́ nɛ Yesu de ɔ sisi.’​​—Yohane 10:6.

Yesu ya nɔ nɛ e de ke: “I ngɛ nyɛ dee anɔkuale mi ke imi ji to tsu ɔ nya agbo ɔ nɛ. Nihi tsuo nɛ sɛ ye hlami kɛ ba a, juli, kɛ ojo fiali ji mɛ; nɛ to ɔmɛ bui mɛ tue. Imi ji agbo ɔ nɛ; nɔ tsuaa nɔ nɛ ba guu agbo ɔ mi kɛ sɛɔ mi ɔ, e yi ma ná wami. E maa sɛ mi, nɛ e maa kpale je kpo ya na niye ní.”​​—Yohane 10:7-9.

E ngɛ heii kaa nɔ́ ehe kulaa nɛ Yesu ngɛ mɛ tsɔɔe ɔ nɛ. E tue buli ɔmɛ le kaa pi lɛ nɛ e nyɛɛ Mlaa somi nɛ ngɛ kɛ je blema lokoo ɔ hɛ mi. Lɔ ɔ he ɔ, Yesu ngɛ tsɔɔe kaa e kɛ tohi nɛ e ma ‘tsɔ́’ ɔ maa sɛ to tsu kpa ko mi. Mɛni e maa pee ha mɛ?

Yesu tsɔɔ nɔ́ nɛ e maa pee ha mɛ ɔ. E de mɛ ke: “Imi lɛɛ i ba, konɛ nyɛ ná wami, nɛ nyɛ ná kɛ be nɔ. Imi ji to hyɛlɔ kpakpa a nɛ. I suɔ kaa ma gbo ngɛ to ɔmɛ a he.” (Yohane 10:10, 11) Yesu sɛ hlami nɛ e wo e kaseli ɔmɛ a bua ke: “Kuu nyafii, nyɛ ko ye gbeye; ejakaa nyɛ Tsɛ ɔ ngɛ he tsui kaa e maa ngɔ matsɛ yemi ɔ ngɔ ha nyɛ.” (Luka 12:32) Nihi nɛ a ngɛ “kuu nyafii” ɔ mi ɔ ji nihi nɛ Yesu ma tsɔ́ kɛ wo to tsu ehe ɔ mi, konɛ a ‘ná wami, nɛ a ná kɛ be nɔ’ ɔ nɛ. Moo hyɛ bɔ nɛ a maa jɔɔ nihi nɛ a ngɛ jamɛ a kuu ɔ mi ɔ ha!

Yesu gbi e munyu ɔ nya lolo. E tsa nɔ ke: “I ngɛ to kpa komɛ hulɔ, se mɛɛ a piɛɛ we kuu nɛ ɔ he. Ma ngɔ mɛ hu kɛ ba; a maa nu ye gbi, nɛ a maa pee to kuu kake, kɛ hyɛlɔ kake.” (Yohane  10:16) Yesu ngɛ tsɔɔe kaa “to kpa” komɛ hu ngɛ nɛ a piɛɛ we “kuu nɛ ɔ he.” Enɛ ɔ tsɔɔ kaa a ngɛ kuu kpa ko mi, nɛ a piɛɛ we “kuu nyafii” nɛ kɛ Yesu maa ye matsɛ ngɛ hiɔwe ɔ he. Tohi nɛ a ngɛ piɛ slɔɔtohi enyɔ nɛ ɔmɛ a mi ɔ ngɛ hɛ nɔ kami ekpaekpa. Se mɛ tsuo a ma ná Yesu kpɔmi afɔle sami ɔ he se. Yesu de ke: “Tsɛ ɔ suɔ mi, ejakaa i suɔ kaa ma ngɔ ye wami kɛ fɔ si, konɛ ma kpale ngɔ.”​​—Yohane 10:17.

Nihi ɔmɛ a de ke: “Mumi yayami ngɛ e mi.” Se kɛ̃ ɔ, ni komɛ hu de nɔ́ ko nɛ tsɔɔ kaa a ngɛ ní nɛ Yesu ngɛ tsɔɔe ɔ tue bue nɛ a suɔ nɛ a maa nyɛɛ To Hyɛlɔ Kpakpa a se. A de ke: “Nɔmlɔ nɛ mumi yayami ngɛ e mi be nyɛe maa tu munyu kikɛ nɛ ɔ. Kɛ mumi yayami ma nyɛ bli hɛ yuyuili a hɛngmɛ kɛɛ?” (Yohane 10:20, 21) Nyumu ko nɛ a fɔ lɛ hɛ yuyuilɔ nɛ Yesu tsa lɛ be ko nɛ be ɔ he munyu lɛ a ngɛ tue ɔ nɛ.