Kinde ma Yesu ubino nimedere niponjo i Yahudi, eweco pi lembe moko ma julubne romo ninyang’ i ie maber. Eweco pi rombe ku dwol. Rombe maeni ku dwolne utie mi lapor. Ecicopere nia Juyahudi gipoi ikum wec ma Daudi uyero nia, “Yehova en e jakwac para; can gin moko binega ngo. Eketho avuto i ka ma arusi loth i ie.” (Zaburi 23:1, 2) I giragora mange mi zaburi, Daudi ukwayu thek kumae: “Wek warumu iwang’ Yehova ma jacwic mwa: Kum en e Mungu mwa, man wan wa dhanu mi kwac pare.” (Zaburi 95:6, 7) Yang’ con juporo nyithindho mir Israel m’ubino i the Cik pa Mungu kud udul rombe.

“Rombe” maeni ubino i “dwol” pilembe junyologi i the Cik mi lembariba pa Musa. Cikne ubino igi ve gang’, m’upoko kindgi ku dhanu mange ma reco ma gibino ngo i the cik. Re Juisrael moko, gibino nitimo udul dhanu pa Mungu rac. Yesu yero kumae: ‘Andhandha, ayero iwu kumae, ng’atu ma mondo i dwol mi rombe kud i dhugula ngo, ento eidho ku yo ka mange, ng’atuca en e jakwo man jayeki. Ento ng’atu ma mondo kud i dhugola, en e jakwac mi rombe.’​—Yohana 10:1, 2.

Wec maeno copo ketho juwinjne gipoi ikum dhanu moko ma gibino loko nia gitie Masiya kunoke Kristu. Gitie ve jukwo man weg ayeki. Dhanu pa Mungu gicikiri ngo nilubo tok weg ayeki maeno. Ento gicikiri nilubo tok “jakwac mi rombe,” ma Yesu uwacu pire kumae:

“Jakur dhugola yabu ire; rombe de winjo dwande: man elwong’o rombe pare ma dhe ku nying’gi, etelo wigi de woko. Kan edaru wodho [rombe] pare ma dhe ceke woko, etelo wigi, e rombe de gilubo ng’eye: kum ging’eyo dwande. Man gibilubo ng’ei welo ngo, ento gibipiei ire: kum ging’eyo dwand welo ngo.”​—Yohana 10:3-5.

I wang’e nyanok, calu jakur dhu dwol, Yohana ugam unyutho nia Yesu re ma tie ng’atu ma rombe ceke mi lapor ma gitie i the Cik gicikiri nilubo toke. Rombe moko, mi Galilaya ku mi Yahudi keni, ging’eyo dwand Yesu. ‘Ebitelo wigi’ nitundo kani? Gibinwang’u ang’o ka gilubo toke? Jumoko m’ubino niwinjo lapor maeni igi uwang’ lii, pilembe ‘ginyang’ ungo i lembe m’ebeyero igi.’​—Yohana 10:6.

Yesu ukoro kumae: “Andhandha, awacu iwu, An a dhugola mi rombe. Ju m’ular ubino ira ceke gi jukwo ku juyeki: ento rombe winjogi ngo. An a dhugola; tek ng’atu moko mondo yor i bang’a, ebiboth, man ebimondo ebiwok woko de, ebinwang’u arusi de.”​—Yohana 10:7-9.

Ubenen kamaleng’ nia Yesu ubeweco iwi lembe moko ma nyen. Juwinj pare ging’eyo nia etie ngo dhugola mi Cik mi lembariba m’ular ubedo nuti niai con. Eno ebeweco i wi rombe ‘m’ebetelo wigi,’ ma bimondo i dwol mange. Ebimio igi ang’o?

Pi nikoro pi rwom pare, eyero kumae: “Abino kara gibed ku kwo, gibed kude dit apila. An a jakwac ma ber: jakwac maber mio kwo pare ni rombe.” (Yohana 10:10, 11) Yesu ular ujuko cwiny julubne ku wec mae: “Kud wulwor, wun udul ma nyanok; kum enyayu mutoro i Wegwu nimio iwu ker.” (Luka 12:32) M’umbe jiji, dhanu ma gitie “udul ma nyanok,” gi dhanu ma Yesu biterogi i dwol ma nyen, kara “gibed ku kwo, gibed kude dit apila.” Etie mugisa ma dit nibedo acel m’ikind udul manok maeno!

Re ejik keno kende ngo, lembe mange de nuti m’eyero. Ewacu kumae: “Rombe para mange nuti, ma gi mi dwonduni ngo: gin bende akoakelgi be, man gibiwinjo dwanda; gibidoko udul acel de, ku jakwac acel.” (Yohana 10:16) ‘Rombe mange’ maeni gitie “mi dwonduni ngo.” Pieno  gicikiri nibedo rombe mi dwol mange, m’ukoc ku mir “udul ma nyanok” ma gibilagu Ker pa Mungu. Rombe mi dwol ario maeno gitie ku genogen mi kwo ma tung’ tung’. Re, rombe mi dwol ario eno ceke gibinwang’u bero kud i rwom pa Yesu. Eyero kumae: “Ka kumeno Vwa mara, kum amio kwo para.”​—Yohana 10:17.

Dhanu dupa m’ikind udul giloko lembe kumae: “Pajogi ni i ie, abelu make.” Ento jumange gibino kud ava mi winje man giwodhiri nilubo tok Jakwac ma ber. Giyero kumae: ‘Maeni tie lembe pa ng’atu ma pajogi ni i ie ngo. Pajogi copo yabu wang’ abinga andha?’ (Yohana 10:20, 21) M’umbe jiji, gibino niweco pi ng’atu moko m’abinga ma Yesu ugam uyabu wang’e m’ubino abinga m’anyola.