Jesusajj Judean yatichaskakïnwa. Ukanjja ovejanakatwa jaqenakarojj parläna, uk taqeniw amuyapjjpachäna. Judionakajj Davidan arunakapwa amtapjjpachäna, jupajj sänwa: “[Jehová Diosaw] awatirejjajja, janiw kunats tʼaqheskäti: suma chʼojjña pastonakaruw samartʼayitu” sasa (Salmo 23:1, 2). Yaqha qellqatanjja Davidajj akham sasaw markpachar säna: “Tatitun nayraqatapar killtʼasipjjañäni, jupaw jiwasanakarojj irnoqestu. Jupaw Diosasajja, jiwasanakasti jupan awatit markapäpjjtanwa” sasa (Salmo 95:6, 7). Diosajj Moisesar churkäna uka Leyirjamajja, israelitanakajj ovejanakar uñtasitäpjjänwa.

Niyakejjay uka ‘ovejanakajj’ Leyirjam mä pactor mantata markan nasïpjjchïnjja, mä uyunkapkäspas ukhamänwa. Israelitanakarojja jan wali luräwinakatwa Leyejj mä uyur uñtata jarkʼaqäna. Ukampis yaqhepanakajj Diosan markapar janiw sum uñjapkänti. Jesusajj sänwa: “Cheqpachapuniw sapjjsma, khititejj ovej uyuru punknam jan mantki, jan ukasti yaqha cheqnam mantki ukajja, lunthatawa, yaqhankir qʼepsuriwa. Khititejj punknam mantki ukajja, ovejanakan awatiripawa” sasa (Juan 10:1, 2).

Nayaw Mesiasätjja jan ukajj Cristötjja sasin sapkäna uka chachanakatwa jaqenakajj amtapjjpachäna, uka chachanakajj lunthatanakaru jan ukajj yaqhankir qʼepsur jaqenakar uñtatäpjjänwa. Ukhamasti janiw jupanakarojj arkapjjañapäkänti. Antisas ‘ovejanakan awatiriparuw’ arkapjjañapäna. Jesusajj sänwa:

“Juparuw punku uñjir jaqejj llawiri, ovejanakajj awatirin arupwa istʼapjjaraki. Jupajj sutitkamwa ovejanakapar jawsi, ukatjja anqaruw ansuraki. Taqpach ovejanakap ansjje ukhajja, jupajj ovejanakan nayraqatap sari, ovejanakas jupar arkapjjarakiwa, awatirin arup uñtʼapjjatap layku. Mä jan uñtʼatarojj janiw ovejanakajj kunjamatsa arkapkaniti, jan ukasti antisakiw jupat chhuktapjjani, mä jan uñtʼatan arup jan uñtʼapjjatap layku” sasa (Juan 10:3-5).

Bautisir Juanajj punku uñjir jaqeru uñtatänwa. Leyirjam sarnaqapkäna uka “ovejanakarojja”, Juanajj Jesusar arkapjjañapatakiw yanaptʼäna. Cheqansa Galileankiri, Judeankir yaqhep ovejanakajj Jesusan arup uñtʼapjjänwa. Ukampis yatichäwinakap janiw sum amuyapkänti. Inas akham jisktʼasipjjchïna: ¿Kawkirus ovejanak irppachäni? ¿Kunsa arkapjjatapat katoqapjjpachäni? sasa (Juan 10:6).

Jesusajj sänwa: “Cheqpachapuniw sapjjsma, kawknamtejj ovejanakajj mantapki uka punkojj nayätwa. Taqe khitinakatï naya lanti jutapki ukanakajja, lunthatäpjjewa, yaqhankir qʼepsurïpjjewa, ukampis ovejanakajj janiw jupanakar istʼapkiti. Punkojj nayätwa, khititejj naya cheq mantki ukajja salvatäniwa. Jupajj mantaniwa, misturakiniwa, pastonaksa jikjjatarakiniwa” sasa (Juan 10:7-9).

Jesusajja janiw Leyirjam uttʼayat markaru mantañat parlkänti, uka markajj walja maranak nayraw utj-jjäna, judionakajj uk sum yatipjjäna. Ukhamasti Jesusajj ‘anskani’ uka ovejanakajj yaqha tamaruw mantapjjañapäna, uka toqetwa Jesusajj parlaskäna. Ukatjja, ¿kuna bendicionsa katoqapjjañapäna?

Kunjamsa yanaptʼani uka toqet Jesusajj sänwa: “Nayajj ovejanakan jakapjjañapatakiw jutta, ukhamat walja tiempo jakapjjañapataki. Suma awatirejj nayätwa. Suma awatirejj ovejanak laykuw jakañap churaraki” sasa (Juan 10:10, 11). Jesusajj discipulonakaparojj akham sasaw nayrajj chuymachtʼäna: “Jan ajjsarapjjamti jiskʼa tama. Alajjpachankir Awkimajj jumanakaruw Reino churañ amtawayi”  sasa (Lucas 12:32). Cheqpachansa ‘jiskʼa tamat’ uñtʼatäpki ukanakarojj yaqha tamaruw irpañapäna, ukhamat “walja tiempo jakapjjañapataki”. Uka tamankañajj mä bendicionawa.

Jesusajj saskakïnwa: “Yaqha ovejanakaw nayan utjarakitu, janiw aka uyunkirïpkiti, ukhamarus uka ovejanakarojj anakiniñajarakiwa. Uka ovejanakasti arunakaj istʼapjjaniwa, mä sapa tamakïpjjaniwa, mä sapa awatirikiw utjarakini” sasa (Juan 10:16). Uka yaqha ovejanakajja, alajjpach Reinor sarapkani uka ‘jiskʼa tamampejj’ yaqha yaqhapjjänwa. Ukhamajj jiskʼa tamasa yaqha ovejanakas janiw mä cheqaruk sarapkaniti, ukampis taqe jupanakaruw Jesusajj yanaptʼani. Jupajj sänwa: “Ukatwa alajjpachankir Awkejj nayar munasitu, nayajj jakañaj churta” sasa (Juan 10:17).

Jaqenakatjja waljaniw Jesusat parlasajj akham sapjjäna: “Jupajj demonioniwa, loqheratawa” sasa. Yaqhepanakasti Suma Awatiri Jesusarojj sum istʼapjjäna, jupar arkañwa munapjjarakïna. Jupanakasti sapjjänwa: “Demonion mantat jaqejj janiw ukanak parlkaspati. Mä demoniojj janiw juykhunakar nayrat qollkaspati” sasa (Juan 10:20, 21). Ukham sasinjja, nasïwitpach juykhu jaqer Jesusajj qollkäna uka toqetwa parlasipkäna.