Kiki Yésu a nke ni bisu i niiga i Yudéa, a mpôdôl ngim jam i baemble nye ba nla hégda loñge, a mpôdôl mintômba ni mapénd. Ndi a ngwélél hihéga. Lôk Yuda i nla bigda bibañga bi David nu a bi kal le: “Yéhôva a yé Ntééda wem, m’a ee bé me yom yo ki yo. A mboñ me le me nañal homa bayôôma ba yé.” (Tjémbi 23:1, 2) Ikété hiémbi hipe, David a nkal litén le: “Di ôm maboñ isi bisu bi Yéhôva, Nhek wés! Inyule a yé Nyambe wés, yak bés di yé bôt ba bémba yé.” (Tjémbi 95:6, 7) Ibôdôl nu ba yé isi mbén, ba nhégha Lôk Israel ni bémba i mintômba.

Di nla kal le “mintômba” mini mi yé ikété “lipénd” inyule mi bi gwéé isi malômbla ma mbén Môsi. Mbén i bi gwéélana kiki lipénd, i bi tat bo ni maboñok mabe ma matén ma ma bé bé isi mbén i. Ndi bon ba Israel bahogi ba bi tét bémba i Djob. Yésu a nkal ni le: “Me nkal yaga bé maliga le: I mut a ntagbene bé i nwemel inyu jôp ikété lipénd li mintômba, ndi a yoñ njel ipe inyu bet lipénd, a yé mut wip lôñni ntonba. Ndi i mut a njubul i nwemel nyen a yé ntééda mintômba.”​—Yôhanes 10:1, 2.

Baemble Yésu ba nla hoñol le Yésu a yé pôdôl ngim bôt i i bé kadba le i yé Mésia tole Kristô. Bana bôt ba yé kiki bôt ba wip tole bôt ba ngadla. Litén li nlama bé noñ bôt ba bihéñba ba. Ndi ba nlama noñ “ntééda mintômba,” nu Yésu a yé kal le:

“Ntat nwemel a nyible i mut nu, yak mintômba mi ñemble kiñ yé. A nsébél mintômba nwé ni môl map, a mpamna ki nwo i mbégdé. I ngéda a mal kena mintômba nwé nwominsôna i mbégdé, a mbôk nwo i bisu, yak mintômba mi noñ nye inyule mi nyi kiñ yé. Mi yé mbén i noñ nkén mut, ndi mi ga ke ndik nye ngwéé inyule mi nyi bé kiñ i bakén ba bôt.”​—Yôhanes 10:3-5.

Ndék ngéda bisu, kiki ntat nwemel, Yôhanes Nsôble a bi kal le Yésu a yé mut nu mintômba mi mi yé isi Mbén mi nlama noñ. Ngim mintômba i bi yimbe kiñ yé nyoo i Galiléa, mimpe mi yé yimbe kiñ yé i Yudéa het a yé nano. Hee a nlama kena nwo? Mu kiki mi noñ nye, lisuk l’a ba le kii? Bahogi, inyule ba nok bé hihéga hi Yésu ba nlo bat nye mambadga.’​—Yôhanes 10:6.

Yésu a ntoñol le: “Me nkal yaga bé maliga le: Men me yé nwemel u mintômba. I bôt bobasôna ba bi kadba le ba yé me, ba yé bôt ba wip ni mintonba; ndi mintômba mi bi emble bé bo. Men me yé nwemel; nu ni nu a njubul i meeni a’ kôhna tohi, nyen a’ ba a njôp, a pamak, nye ki nyen a’ léba bijek.”​—Yôhanes 10:7-9.

I pot maliga, Yésu a yé niiga jam li mondo. Baemble nye ba nyi le a ta bé nwemel u bi yibil malômbla ma Mbén Môsi i i bi tina hala a yé ntandaa ngéda. Jon, Yésu a yé kal le mintômba a nlama pamna i mbégdé mi nlôl i bémba ipe. Kii ba ga kôhna ni?

Yésu a ntoñol yom a ga boñ: “Ndi me me bi lo le mi bana niñ, mi bana ki yo ngandak. Men me yé loñge ntééda mintômba; loñge ntééda mintômba i nti niñ yé inyu mintômba.” (Yôhanes 10:10, 11) Ndék ngéda i mbus, Yésu a bi hôgbaha banigil bé i ngéda a bi kal le: “Ni kon bañ woñi, a bémba titigi, inyule i nlémél Isoñ nan i ti bé Ane.” (Lukas 12:32) Ba ba yé “bémba titigi” bon Yésu a ga yilha bémba i mondo kayéle ba laa ‘bana niñ, ba bana ki yo ngandak.’ Kinje bisai i ba wada mu bémba i!

Ndi Yésu a nsugul bé ha. A nkal le: “Me gwé ki mintômba mimpe, mi mi ta bé munu bémba ini; me nlama jôpna yak nwo, nw’a emble kiñ yem, mi yila ki bémba yada isi  ntééda mintômba wada.” (Yôhanes 10:16) Mini “mintômba mimpe” mi “ta bé munu bémba ini.” Jon mi nlama ba bémba ipe i i yé maselna ni “bémba titigi” i i nlama kôdôl Ane ngii. Bibémba bi gwo biba, bi gwé le bi niñ bahoma iba. To hala, mintômba mi bémba i yo iba mi ga kôhna bisai ni njel sesema i Yésu. A nkal le: “Inyu hala nyen Tata a ngwés me, inyule me nti niñ yem.”​—Yôhanes 10:17.

Ngandak mu limut li bôt i ntimbhe le: “A gwé mbuu mbe, a nkônd yak njék.” Ndi bape ba ñunda le ba ñemble loñge ni le ba gwé ngôñ i noñ Loñge ntééda mintômba. Ba nkal le: “I bibañga bini bi ta bé bi mut nu a gwé mbuu mbe. Mbuu mbe u nla bé yibil mis ma ndim bôt, hala bé?” (Yôhanes 10:20, 21) Ibabé pééna, ba yé pôdôl ngéda Yésu a bi mbuubaha i mut a bi gwéé ndim.