Tingki mangajari Jesus di Judea, dipaboa ma sada tudosan taringot biru-biru dohot handang. Mura do on diantusi angka na manangihon. Olo do ra gabe diingot nasida hata ni si Daud na mandok, “Jahowa do Siparmahan ahu, ndang tagamon hurangan ahu. Dipatongon do ahu tu jampalan angka na lomak.” (Psalmen 23:1, 2) Didok si Daud do muse, “Beta hita manungkap dohot marsomba, marsinggang ma hita tu jolo ni Jahowa, Sitompa hita. Ai Ibana do Debatanta, jala hita bangso pinarmahanna.” (Psalmen 95:6, 7) Songon biru-biru na di bagasan punguan do halak Israel.

Parjanjian Patik ni si Musa do na manogu-nogu parngoluan ni nasida, dos songon “biru-biru” na di bagasan “handang”. Ala adong Patik i, ndang dohot be nasida mangulahon na jahat songon bangso na asing. Alai adong do deba halak Israel na mangulahon na jahat tu punguan ni biru-biru ni Debata. Jesus mandok, “Tutu do na hudok on tu hamu, manang ise na masuk tu handang ni biru-biru ndang sian pintu, alai manjangkit sian tembok, panangko do i jala pangarampok. Alai manang ise na masuk sian pintu, ibana do parmahan ni biru-biru i.”​—Johannes 10:1, 2.

Olo do ra gabe diingot nasida halak na mandok dirina Messias manang Kristus. Songon panangko jala pangarampok do nasida. Alani i, ndang ihuthonon ni halak Israel nian nasida, songon na nidok ni Jesus:

“Bungkaon ni panjaga ma pintu tu ibana, jala begeon ni biru-biru i ma soarana. Ai jouonna do ganup biru-biruna jala togihononna ma i tu luar. Dung diboan ibana kaluar sude biru-biru i, mardalan ma ibana di jolo ni angka biru-biru i, jala diihuthon ma ibana, ai ditanda do soarana. Ndang olo angka biru-biru i mangihuthon halak na asing, alai lari do angka biru-biru i sian halak na asing, ai ndang ditanda soarana.”​—Johannes 10:3-5.

Dos songon panjaga pintu do si Johannes Pandidi. Songon punguan ni biru-biru do halak Israel jala Jesus do na ingkon ihuthonon ni nasida. Angka halak na di Galilea dohot na di Judea do na songon biru-biru na mananda soara ni Jesus. Alai, tudia do “togihononna” nasida? Jala aha do labana mangihuthon ibana? Sungkun-sungkun do deba na manangihon i, ai “ndang diantusi nasida na nidokna i”.​—Johannes 10:6.

Dung i didok Jesus ma, “Tutu do na hudok on tu hamu, ahu do pintu ni biru-biru i. Sude halak na mandok dirina parmahan na tutu asing ni ahu, panangko do i jala pangarampok, jala ndang ditangihon angka biru-biru i soara ni nasida. Ahu do pintu i, malua do manang ise na masuk marhite ahu. Masuk jala kaluar ma ibana jala dapotna ma panjampalan.”​—Johannes 10:7-9.

Ajaran na baru do na pinaboa ni Jesus. Diboto na manangihon i do ndang ibana pintu ni parjanjian Patik, ai nunga adong i marratus taon na salpu. Alai na laho “togihononna” do biru-biru i tu handang na asing. Aha ma gunana?

Didok Jesus ma muse, “Anggo ahu ro, laho pangoluhon angka biru-biru i do asa dapotan ngolu na saleleng ni lelengna. Ahu do parmahan na burju i. Dilehon parmahan na burju do ngoluna humongkop biru-biruna.” (Johannes 10:10, 11) Jala dipapos ma roha ni angka siseanna, “Unang ma hamu mabiar ale punguan  na metmet, ai lomo do roha ni Amamuna mangalehon Harajaon i tu hamu.” (Lukas 12:32) Sasintongna, “punguan na metmet” ma na laho ditogihon Jesus tu handang na baru, asa dapotan “ngolu na saleleng ni lelengna”. Pasu-pasu na balga do on di nasida!

Alai didok Jesus ma muse, “Adong dope biru-birungku na asing na so sian handang on jala ingkon dohot do angka i boanonku. Tangihonon ni nasida ma soarangku, gabe sada punguan ma nasida jala sada parmahan.” (Johannes 10:16) Ndang sian handang on ‘biru-biru na asing’ i, alai sian handang na asing do. Ndang sarupa handang ni nasida tu handang ni “punguan na metmet” na laho dohot tu Harajaon i jala ndang sarupa na tinuju ni nasida. Alai rap mandapot laba do nasida sian tobusan ni Jesus. Didok Jesus, “Dihaholongi Ama i do ahu ala hulehon do ngolungku asa jaloonku i muse.”​—Johannes 10:17.

Alai godang ma sian nasida na mandok, “Na sinonggopan ni suru-suruan na jahat do ibana jala nunga rintik ibana.” Nang pe songon i adong do na olo manangihon jala mangihuthon Jesus, i ma Parmahan na Burju. Didok nasida ma, “Ndang hatahonon ni na sinonggopan ni suru-suruan na jahat songon i. Ai boi ma bahenon ni suru-suruan na jahat marnida halak na mapitung?” (Johannes 10:20, 21) Maksud ni nasida, i ma tingki dipamalum Jesus na mapitung sian na tubu.