Mantang si Jesus padagos na nagtutukdo sa Judea, may sinambit siya na madaling masabutan kan mga nagdadangog—an mga karnero asin mga turil. Pero saro ining ilustrasyon. Tibaad nagirumduman kan mga Judio an mga tataramon ni David: “Si Jehova an sakuyang Pastor. Dai ako magkukulang nin ano man. Sa maduot na mga sabsaban pinapahigda niya ako.” (Salmo 23:1, 2) Sa saro pang salmo, inagda ni David an nasyon: “Lumuhod kita sa atubangan ni Jehova na Kaggibo sa sato. Huli ta siya iyo an satong Diyos, asin kita an mga tawo sa saiyang pasabsaban.” (Salmo 95:6, 7) Iyo, an mga Israelita sa irarom kan Katugunan haloy nang iinagid sa sarong aripumpon nin mga karnero.

An mga Israelitang ini na iinagid sa “mga karnero” masasabing nasa laog nin sarong “turil” huling ipinangaki sinda sa irarom kan tipan na Katugunan ni Moises. An Katugunan nagserbing kudal, na nagtatao sa sainda nin proteksiyon sa nakakaraot na mga gibo kan mga tawo na bakong sakop kan Katugunan. Pero may mga Israelita na minaltrato an aripumpon nin Diyos. Sinabi ni Jesus: “Sinisigurado ko nanggad sa saindo, an saro na bako sa pinto minaagi sa paglaog sa turil nin mga karnero kundi minasakat sa ibang parte tanganing makalaog, an sarong iyan parahabon asin tulisan. Alagad an saro na sa pinto minaagi sa paglaog iyo an pastor kan mga karnero.”—Juan 10:1, 2.

Puwedeng naisip kan mga tawo an dapit sa mga naghingakong Mesiyas, o Cristo. An mga ini garo mga parahabon asin tulisan. Dai dapat sunudon kan mga tawo an mga impostor na ini. Imbes, an dapat nindang sunudon iyo “an pastor kan mga karnero,” na manungod sa saiya nagsabi si Jesus:

“Binubuksan siya kan parabantay sa pinto, asin an mga karnero nagdadangog sa boses niya. Inaapod niya sa pangaran an saiyang mga karnero asin ginigiyahan sinda paluwas. Pag napaluwas na niya an gabos na saiya, minalakaw siyang nasa inutan ninda, asin an mga karnero nagsusunod sa saiya, huli ta midbid ninda an saiyang boses. Siguradong dai sinda masunod sa sarong estranghero kundi madulag sa saiya, huli ta dai ninda midbid an boses nin mga estranghero.”—Juan 10:3-5.

Sa kapinunan kan ministeryo ni Jesus, an arog-parabantay sa pinto na si Juan Bautista ipinamidbid siya bilang an saro na dapat sunudon kan simbolikong mga karnero na sakop kan Katugunan. Asin may mga karnero, sa Galilea asin digdi mismo sa Judea, na nakamidbid sa boses ni Jesus. Sain niya sinda “gigiyahan”? Asin ano an magigin resulta kan pagsunod ninda sa saiya? Tibaad nagngalas an nagkapirang nagdadangog sa ilustrasyon na ini, huling ‘dai ninda masabutan an sinasabi niya sa sainda.’—Juan 10:6.

Nagpaliwanag si Jesus: “Sinisigurado ko nanggad sa saindo, ako an pinto para sa mga karnero. An gabos na nag-arabot na nagsasagin-sagin na ako, sinda mga parahabon asin mga tulisan; alagad an mga karnero dai nagdadangog sa sainda. Ako an pinto; an siisay man na mag-agi sa sako sa paglaog maliligtas, asin an sarong iyan malaog saka maluwas asin makakanumpong nin sabsaban.”—Juan 10:7-9.

Malinaw na may sarong bagong bagay na itinutukdo si Jesus. Aram kan mga nagdadangog na bako siya an pinto pasiring sa tipan na Katugunan, na dakul na siglo nang nag-eeksister. Kaya siyertong sinasabi niya na an mga karnero na saiyang ‘ginigiyahan paluwas’ dapat na lumaog sa saro pang turil. Ano an magigin resulta?

Urog pang ipinaliwanag ni Jesus an saiyang papel: “Ako nagdatong tanganing magkaigwa sinda nin buhay asin lubos nindang makamtan iyan. Ako an marahay na pastor; an marahay na pastor itinatao an saiyang buhay para sa mga karnero.” (Juan 10:10, 11) Bago kaini, rinanga ni Jesus an mga disipulo sa pagsabing: “Dai kamo matakot, sadit na aripumpon, huli ta nagdesisyon an saindong Ama na itao sa saindo an Kahadian.” (Lucas 12:32) Iyo, an mga minakompuwesto sa “sadit na aripumpon” an gigiyahan ni Jesus pasiring sa bagong turil, tanganing “magkaigwa sinda nin buhay asin lubos nindang makamtan iyan.” Sarong bendisyon nanggad na mapabilang sa aripumpon na iyan!

 Pero dai digdi nagtapos si Jesus. Nagsabi pa siya: “Igwa pa ako nin ibang mga karnero, na bakong sa turil na ini; an mga iyan man dapat kong ilaog, asin magdadangog sinda sa sakuyang boses, asin magkakaigwa nin sarong aripumpon saka sarong pastor.” (Juan 10:16) An “ibang mga karnero” na ini “bakong sa turil na ini.” Kaya, siguradong yaon sinda sa saro pang turil, na iba sa “sadit na aripumpon” na magmamana kan Kahadian. An duwang turil na ini, o lauman nin mga karnero, may magkaibang padudumanan. Pero, an mga karnero sa duwang turil parehong makikinabang sa papel ni Jesus. Sinabi niya: “Ini an dahilan kaya namumutan ako kan Ama, huli ta itinatao ko an sakuyang buhay.”—Juan 10:17.

Dakul sa mga tawo an nagsarabi: “Igwa siya nin demonyo asin mayo siya sa tultol na isip.” Alagad ipinahiling kan iba na interesado sinda asin na gusto nindang sumunod sa Marahay na Pastor. Nagsarabi sinda: “Bako ining mga tataramon nin tawong may demonyo. Dai magigibo nin demonyo na imuklat an mga mata nin mga buta, bako?” (Juan 10:20, 21) Malinaw na an sinasabi ninda iyo idtong lalaking namundag na buta na pinaumayan ni Jesus bago kaini.