Yesu alitwalilile ukusambilisha abantu mu Yudea. E ico alandile pa mpaanga na pa macinka ya mpaanga ifya mampalanya ifyo abo alesambilisha baishibe. AbaYuda bafwile balibukishe amashiwi ayo Davidi alandile aya kuti: “Yehova e Mucemi wandi. Tapali ico nkabulisha. Mu mulemfwe uuteku e mo anenga ukulambalala.” (Amalumbo 23:1, 2) Uwaimbile amalumbo umbi, na o atile: “Natufukame pa ntanshi ya kwa Yehova Uwatupangile. Pantu ena ni Lesa wesu, na ifwe tuli bantu bakwe abo acema.” (Amalumbo 95:6, 7) Apo abena Israele balipangene na Lesa ukuti bakulakonka Amafunde, bali kwati mukuni wa mpaanga.

Abena Israele baali ni “mpaanga” sha mwi “cinka” pantu bafyalilwe mu luko ulwapangene na Lesa ukuti lwakulakonka Amafunde ayo Lesa abapeele ukupitila muli Mose. Amafunde yali nge linga ilyabapatukeenye ku fyabipa ifyo abashali muli ici cipangano balecita. Na lyo line, abena Israele bamo balecusha umukuni wa kwa Lesa. Yesu atile: “Ndemweba icine cine, nati, uushingilila pa mwinshi we cinka lya mpaanga lelo aninina pambi, ninshi mupuupu kabili cipondo. Lelo uwingilila pa mwinshi e kacema wa mpaanga.”—Yohane 10:1, 2.

Ilyo abantu baumfwile aya mashiwi, nalimo batontonkenye ukuti alelanda pa baleti ni ba Mesia nelyo ba Kristu abaali nga bapuupu nelyo ifipondo. Abantu tabaalingile kukonka abantu ba musango yu. Lelo baalingile ukukonka “kacema wa mpaanga” uo Yesu alelandapo ilyo atile:

“Uwa pa mwinshi alamwiswila, ne mpaanga shilomfwa ishiwi lyakwe, kabili eta impaanga shakwe mu mashina no kushitungulwila pa nse. Ilyo afumya ishakwe shonse pa nse, alashitangilila, ne mpaanga shilamukonka, pantu shalishiba ishiwi lyakwe. Umuntu umbi tashimukonka lelo kuti shamufulumuka, pantu tashaishiba ishiwi lya bantu bambi.”—Yohane 10:3-5.

Yohane Kabatisha uwali nga uwa pa mwinshi, alyafwile impaanga sha mampalanya, ishapangene na Lesa ukulakonka Amafunde, ukwishiba ukuti Yesu e o shalingile ukulakonka. Kabili impaanga shimbi ishali mu Galili na mu Yudea mwine, shalishibe ishiwi lya kwa Yesu. Ilyo ashifumishe mwi cinka, ni kwi ‘ashitungulwile’? Kabili cinshi cafuminemo ilyo shatendeke ukumukonka? Bamo abaumfwile ici icilangililo nalimo balipapile pantu “tabaishibe umwalolele ifyo alebeba.”—Yohane 10:6.

Yesu atile: “Ndemweba icine cine, nati, nine mwinshi wa mpaanga. Bonse abaitunga ukwishila mwi shina lyandi, bapuupu kabili fipondo; lelo impaanga tashibomfwa. Nine mwinshi; uwaingilila pali ine akapusuka, kabili akengila no kufuma, no kusanga umulemfwe.”—Yohane 10:7-9.

Nga fintu twamona, Yesu alebasambilisha icintu icipya. Aba bantu balishibe ukuti Yesu taali iciibi ca kwingililapo mu cipangano ce Funde, icaliko pa myaka iingi sana. Kanshi afwile alelanda ukuti impaanga isho ‘atungulwile pa nse,’ ashitwele mwi cinka limbi. Cinshi cafuminemo?

Yesu alandile na fimbi pa mulimo wakwe ilyo atile: “Ico naishila ni pa kuti impaanga shibe no bumi kabili shikwatishe ubumi. Nine kacema musuma; kacema umusuma atuulila impaanga umweo wakwe.” (Yohane 10:10, 11) Yesu pa kubalilapo alyebele abasambi bakwe ukuti: “Mwilatiina, mwe mukuni unono, pantu Shinwe afwaya ukumupeela Ubufumu.” (Luka 12:32) Ca cine ababa mwi bumba lya “mukuni unono” e bo Yesu akatungulula mwi cinka lya mpaanga, pa kuti ‘bakabe no bumi kabili bakakwatishe ubumi.’ Ala lipaalo sana ukuba muli ili icinka!

Lelo Yesu alilandile na fimbi. Atile: “Ndi ne mpaanga shimbi, ishishili sha mwi cinka ili; na sho ndi no kushileta, kabili shikomfwa ishiwi lyandi, e lyo kukaba umukuni umo, na kacema umo.”  (Yohane 10:16) Ishi “impaanga shimbi” te sha “mwi cinka ili” ilya “mukuni unono” uukateka mu Bufumu. Kanshi shifwile ukuba isha mwi cinka limbi. Impaanga shaba muli aya amacinka yabili shikekala ukwapusana. Na lyo line, impaanga sha muli aya amacinka shikapaalwa pa mulandu wa kwa Yesu. Yesu atile: “E mulandu wine Tata antemenwa, pantu ndetuula umweo wandi.”—Yohane 10:17.

Abengi mwi bumba batile: “Aba ne cibanda kabili alipena?” Lelo bambi balibikile amano ku fyo alelanda kabili balefwaya ukulakonka uyu Kacema Musuma. E ico batile: “Ifi te filanda umuntu uwakwata icibanda. Bushe icibanda kuti cashibula amenso ya mpofu?” (Yohane 10:20, 21) Bafwile balelanda pali filya Yesu aundepe umwaume uwafyelwe impofu.