Pandan ki Zezi i ankor pe ansennyen Zide, i koz lo en keksoz ki bann dimoun i kapab fasilman konpran. Sa i mouton ek berkay, me i koz lo la dan en fason senbolik. Petet bann Zwif i rapel parol David kot i ti dir: “[“Zeova,” NWT] i mon berze. Mon pa pou mank nanryen. I fer mwan repoz dan laplenn zerb ver.” (Psonm 23:1, 2) Dan en lot psonm, David ti donn nasyon Izrael sa lenvitasyon: “Annou azenou devan Zeova nou Kreater. Parski i nou Bondye e nou son troupo.” (Psonm 95:6, 7, NWT) Parey nou vwar, depi lontan bann Izraelit ki ti anba Lalwa ti ganny konpare avek en troupo mouton.

Sa bann “mouton” i dan en “berkay” akoz depi zot nesans, zot ti anba lalyans Lalwa Moiz. Lalwa ti parey en baraz ki ti protez zot kont bann move pratik ki bann dimoun ki pa ti swiv Lalwa ti fer. Me serten Izraelit pa ti tret troupo Bondye byen. Zezi i dir: “Vreman mon dir zot laverite, sa enn ki pa antre dan berkay par laport me ki grenp par en lot bor, sa dimoun i en voler e en bandi. Me sa enn ki antre par laport i berze bann mouton.”​—Zan 10:1, 2.

Ler Zezi i dir sa, bann dimoun i kapab mazin bann zonm ki ti dir ki zot Mesi oubyen Kris. Zot parey bann voler ek bandi. Bann dimoun pa devret swiv sa bann anbeter. O kontrer, zot devret swiv “berze bann mouton.” La sa ki Zezi i dir konsernan sa berze:

“Gardyen i ouver laport pour li e bann mouton i ekout son lavwa. I apel son bann mouton par zot non e i anmenn zot an deor berkay. Ler i’n fer tou son mouton sorti, i pas par devan zot e son bann mouton i swiv li akoz zot konn son lavwa. Zot pa pou zanmen swiv en etranze, me zot pou tay lwen avek li akoz zot pa konn lavwa bann etranze.”​—Zan 10:3-5.

Avan sa, Zan ki batize ti parey sa gardyen e i ti fer dimoun konnen ki Zezi i sa enn ki sa bann mouton senbolik ki anba Lalwa i devret swiv. Serten dimoun in rekonnet lavwa Zezi dan rezyon Galile ek Zide. Kote i pou “anmenn zot”? Ki pou arive si zot swiv li? Petet serten ki pe ekout sa legzanp i annan bann kestyon parski ‘zot pa konpran sa ki i pe dir zot.’​—Zan 10:6.

Zezi i eksplike: “Vreman mon dir zot laverite, mwan menm laport pour bann mouton. Tou bann ki’n dir ki zot sa bon berze i bann voler ek bandi, me bann mouton pa’n ekout zot. Mwan menm sa laport, sa ki antre par mwan pou ganny sove, i pou antre sorti e i pou ganny zerb pour manze.”​—Zan 10:7-9.

I kler ki Zezi pe entrodwi en keksoz nouvo la. Bann dimoun ki pe ekout li i konnen ki i pa laport pour lalyans Lalwa ki’n egziste pour plizyer syek. Alor i bezwen ki sa bann mouton ki Zezi i ‘anmenn an deor’ berkay pou antre dan en lot berkay. Ki pou arive apre?

Zezi i donn plis detay lo son rol: “Mon’n vini pour ki zot ganny lavi e zot pou ganny lavi eternel. Mwan mon sa bon berze, sa bon berze i donn son lavi pour son bann mouton.” (Zan 10:10, 11) Avan sa, Zezi ti’n rekonfort son bann disip ler i ti dir zot: “Pa bezwen per pti troupo parski zot Papa in deside pour donn zot Rwayonm.” (Lik 12:32) Byensir, bann ki form parti sa “pti troupo” i sa bann ki Zezi pou anmenn dan en nouvo berkay pour ki zot kapab “ganny lavi e zot pou ganny lavi eternel.” Pa i en benediksyon pour bann ki form parti sa troupo!

Me Zezi pa fini la. I dir: “Mon annan lezot mouton ki pa dan sa berkay, sa bann osi mon  bezwen rasanble zot. Zot pou ekout mon lavwa e i pou annan en sel troupo ek en sel berze.” (Zan 10:16) Sa bann “lezot mouton . . . pa dan sa berkay.” Alor, i bezwen ki zot dan en lot berkay, enn ki diferan avek berkay sa “pti troupo” ki pou dan Rwayonm. Bann mouton dan sa de berkay pa pou ganny menm rekonpans. Kantmenm sa, bann mouton dan tou le de berkay pou benefisye avek sa ki Zezi pou fer. I dir: “Sanmenm rezon ki mon Papa i kontan mwan, parski mon pare pour donn mon lavi.”​—Zan 10:17.

En kantite dimoun dan lafoul i dir: “I posede par en demon e i’n perdi latet.” Par kont, lezot pe byen ekoute e zot anvi swiv sa Bon Berze. Zot dir: “Pa koumsa ki en zonm posede par demon i koze. En demon pa kapab fer dimoun aveg vwar kler, non?” (Zan 10:20, 21) I paret ki zot pe koz lo sa zonm ki ti ne aveg ki Zezi ti’n geri.