Iesu pala kö a hamë ini e Iudra, nge nyidrëti a hamë ceitun hna canga trotrohnin—mamoe me hnë axö mamoe. Ngo ka hetre aliene la ceitun. Ma angetre Iudra jë a mekune lo trengewekë i Dravita, lo öni angeic: “Iehova la atre thupë ni, tha tro kö patre la ketre ewekë theng. Nyidëti a ameköle ni ngöne la itre haö ka cia hnyawa.” (Salamo 23:1, 2, MN) Ngöne la ketre Salamo, hnei Dravita hna hëne la nöj me hape: ‘Tro sa sa iwatingöneca qëmeke i Iehova atre xupi së. Ke nyidëti la Akötesi së; nge easë la nöjei atre ne la zi nyidë.’ (Salamo 95:6, 7) Eje hi, Trenge Wathebo a cil kösë hag, xötreithe la nöje Isaraela.

Itre “mamoe” cili a mel ngöne la “hnë axö mamoe,” ke hna hnaho angatr fene la Trenge Wathebo i Mose. Hna aceitunëne la Trenge Wathebo me ketre hag, ke ej a ananyine la nöj me itre huliwa ka ngazo hna kuca hnei itre xan e trön. Ngo hnene hmaca kö la itre xa angetre Isaraela hna qanangazone la itre mamoe i Akötresie. Öni Iesu: “Nyipici eni a qaja hnyawa koi nyipunie, ame la atre tha lö qa ngöne la qëhnelö ne la hnë axö mamoe, nge ka eli hag, atrekënö angeic. Ngo ame la atre lö qa ngöne la qëhnelö, tre atre thupë mamoe lai.”—Ioane 10:1, 2.

Maine jë, itre atr a mekune lo itre ka selëne menun ka hape, angatr la Mesia maine Keriso. Ceitu i angatr me itre atrekënö. Nge tha tro kö la itre atr a hane xötrethenge angatr. Ngo tro pe a xötrethenge la “atre thupë mamoe,” lo hnei Iesu hna qaja ka hape:

“Kola thawa koi angeic hnene la atre fe qëhnelö, nge itre mamoe a drenge la nine ithanata i angeic. Matre angeic a hë nyudren hnene la isa ëje i nyudren, me troxomi nyudreni tröne la hnë axö mamoe. Nge e lö pi la itre si angeic, angeic a weje mekei nyudreni jë, nge itre mamoe a xötrethenge angeic, ke wangatrehmekune hi nyudreni la nine ithanata i angeic. Ngo eje hi laka, tha tro jë pi kö nyudreni a xötrethenge la trenyiwa, ngo tro pe a kötren, ke tha wangatrehmekune kö nyudreni la nine ithanata ne la trenyiwa.”—Ioane 10:3-5.

Itre macatre qëmeken, hnei Ioane Bapataiso hna tune la atre fe qëhnelö, lo angeic a upe la itre mamoe troa xötrethenge Iesu. Nge hetre mamoe e Galilaia me e Iudra ka wangatrehmekune la nine ithanata i Iesu. Matre nyidrëti a ‘troxomi’ angatr a tro ië? Nge nemene la thangan? Maine jë, hetre ka luelu, ‘ke tha trotrohnine kö angatr la hnei nyidrëti hna qaja.’—Ioane 10:6.

Öni Iesu hmaca: “Nyipici, eni a qaja hnyawa koi nyipunie, eni hi la qëhnelö ne la itre mamoe. Nge ame la itre ka traqa troa xome la hnëqang, tre itre atrekënö lai, ngo tha drei angatre kö hnei itre mamoe. Haawe, eni hi la qëhnelö, matre ame la atre lö qaatheng, tre tro hë angeic a mel, nge tro angeic a traqa me tro, me öhnyi xen.”—Ioane 10:7-9.

Iesu hi lai a qaja la ketre ini ka hnyipixe. Atre hi itre ka dreng ka hape, tha nyidrëti kö la qëhnelö ne la Trenge Wathebo, ke ekö hë acil. Haawe, nyidrëti a amamane laka, ame la itre mamoe hnei nyidrë hna ‘troxom,’ angatr a lö hnine la ketre hnë axö mamoe. Nemene la thangan?

Iesu a qejepengöne jë la hnëqa i nyidrë me hape: ‘Eni pe a traqa troa iamele, me hamëne la mel ka pë pun. Nge eni la atre thup ka lolo; nge ame la atre thup ka lolo, angeic a nue la mele i angeic thatraqane la itre mamoe.’ (Ioane  10:10, 11) Nge hnei Iesu hë hna akeukawane la itretre dreng ka hape: “The xou kö, itre mamoe ka xalaith, ke aja i Keme i nyipunie troa hamë nyipunie la Baselaia.” (Luka 12:32) Tro Iesu a troxome la “itre mamoe ka xalaith” kowe la ketre hnë axö mamoe, nge tro nyidrë a ‘iamele, me hamë angatr la mel ka pë pun.’ Drei la ketre manathithi ka tru troa sine la lapa cili!

Iesu a nyixane jë me hape: “Hetre itre xa mamoenge kö, ngo tha sine kö nyudreni la hnë axö mamoe celë; ngo loi e tro fe ni a alö nyudren, nge tro nyudreni a drenge la aqane ewekëng, nge tro hë nyudren a ca hna axö mamoe, nge tro hi a ca atre thup.” (Ioane 10:16) Ame la ‘itre xa mamoe’ cili, “tha sine kö nyudreni la hnë axö mamoe celë.” Matre hna isa ami nyudreni memine la “itre mamoe ka xalaith,” itre ka troa kepe edröne la Baselaia. Tro la lue lapa cili a isa hetre mejiun. Ngo tro lue ej a kepe manathithi qa ngöne la hnëqa i Iesu. Öni nyidrë: “Nge hane hi la kepin matre hnimi ni jë hnei Kaka, ke tro ni a nue la meleng.”—Ioane 10:17.

Ala nyimu la ka qaja ka hape: “Hna löthi angeice la hnei dremoni, nge ka menu hë lai.” Ngo hetre itre xan ka amamane laka, angatr a drenge hnyawa, nge aja i angatr troa xötrethenge la Atre Thup Ka Lolo. Öni angatr: “Tha itre trengewekë ne atre hna adremonine kö la, ke thatreine kö la dremoni troa fe la luemeke ne la timek, eje hi?” (Ioane 10:20, 21) Angatre a qaja lo Iesu a aloine lo trahmany hna hnahon a timek.