Yezu bele be Zude mara la. A be mɔgɔw kalanna. Sisan, a be kuma koo dɔw la a lamɛnbagaw be minw lɔn ka ɲɛ: sagaw ani wɛɛrɛw. Nka a be min fɔ, o ye ntalen kuma lo ye. N’a sɔrɔ Yahutuw hakili be masacɛ Dawuda ka kuma nunu na: “Masaba [Jehova] le ye ne marabaga ye, i ko sagadɛndɛbaga, o la, ne tena dɛsɛ foyi la. A b’a to ne be lafiɲɛ binkɛnɛ yɔrɔ la.” (Zaburuw 23:1, 2). Zaburu dɔ wɛrɛ la, Dawuda y’a fɔ jama ye ko: “An k’an kunbiri gwan Masaba kɔrɔ, ale min y’an dan. Bari, an ka Ala lo. An ye jama ye min b’a ka mara kɔnɔ. An be i ko sagakulu, a be min mara.” (Zaburuw 95:6, 7). Kabi Israɛldenw be Musa ka sariya fanga kɔrɔ, u b’u suma ni sagakulu ye.

O “sagaw” be “wɛɛrɛ” kɔnɔ: o kɔrɔ ko Israɛldenw wolola k’u yɛrɛ sɔrɔ Musa ka sariya fanga kɔrɔ. O sariya tun be i n’a fɔ kogo: a be Israɛldenw dɛmɛ u k’u mabɔ siya wɛrɛw ka koo nɔgɔninw na sabu olu tɛ Musa ka sariya fanga kɔrɔ. Nka Israɛlden dɔw ye Ala ka sagakulu niin tɔɔrɔ. Yezu y’a fɔ ko: “Tiɲɛ tiɲɛ na, ne b’a fɔ aw ye ko ni mɔgɔ min ma don ni wɛɛrɛ daa ye, fɔɔ ka pan ka don ni faan wɛrɛ ye, o tigi ye soon ye, benkannikɛla lo. Nga min be don ni wɛɛrɛ daa ye, ale lo ye saga nunu dɛndɛbaga ye.”—Zan 10:1, 2.

Jama y’o kumaw mɛn minkɛ, n’a sɔrɔ u miirila mɔgɔ dɔw koo la minw b’a fɔ k’olu ye Masiya wala Krista ye. O ɲɔgɔnna mɔgɔw ye soonw ni benkannikɛlaw lo ye. U ye mɔgɔ lafilibagaw lo ye. Jama man kan ka tugu u kɔ. U ka kan ka tugu “saga nunu dɛndɛbaga” le kɔ. Yezu y’a fɔ ale koo la ko:

“Daa kɔlɔsibaga be daa yɛlɛ a ye. Sagaw be mɛnni kɛ a fɛ, minw y’a taw ye, a b’u tɔgɔw wele kelen kelen ka bɔ n’u ye kɛnɛma. N’a bɔra n’a ta nunu bɛɛ ye kɛnɛma ka ban, a be bila u ɲa, u be tugu a kɔ, bari u b’a kaan lɔn. U tena tugu mɔgɔ wɛrɛ kɔ fewu, u bena boli a ɲa yɛrɛ, bari u te ale kaan lɔn.”—Zan 10:3-5.

Zan Batizelikɛla be i ko daa kɔrɔsibaga. A ma mɛɛn, ale tun y’a fɔ ko Ala ka sagaw ka kan ka tugu Yezu lo kɔ. Galile mara la, ani yan Zude mara la, o saga dɔw ye Yezu kaan faranfasi ka lɔn. A bena u ɲɛminɛ ka taga n’u ye min? N’u tugura a kɔ, u bena mun lo sɔrɔ? Minw y’o ntalen kuma mɛn, n’a sɔrɔ u dɔw y’u yɛrɛ ɲininga a kɔrɔ la sabu “u m’a faamu.”—Zan 10:6.

Yezu y’a ɲɛfɔ ko: “Tiɲɛ tiɲɛ na, ne b’a fɔ aw ye ko sagaw be don ni daa min ye wɛɛrɛ kɔnɔ, ne lo. Minw bɛɛ kɔnna ne ɲa, olu bɛɛ ye soonw ni benkannikɛlaw le ye. Nga sagaw ma mɛnni kɛ u fɛ. Ne le ye donda ye. Ni mɔgɔ min donna n’o daa ye, o tigi bena kisi. A bena don, ka bɔ, k’a ka dumuni sɔrɔ.”—Zan 10:7-9.

Yezu be min fɔra ten, a gwɛnin lo k’o ye kalan kura ye. A lamɛnbagaw b’a lɔn ko Ala ye layidu min ta ni Israɛl ye kabi wagatijan, Yezu kɔni tɛ o soronanikɛla ye. N’o lo, n’a sɔrɔ a b’a fɛ k’a fɔ le ko a be saga minw ɲɛminɛna “ka bɔ n’u ye,” u ka ɲi ka don wɛɛrɛ dɔ wɛrɛ kɔnɔ. U bena mun lo sɔrɔ yen?

Yezu lɔyɔrɔ ye min ye, a y’o ɲɛfɔ tugun ko: “Ne nana waasa mɔgɔw ka kisi ani u ka hɛrɛ ka sabati. Ne ye sagaw dɛndɛbagaɲuman ye. Sagaw dɛndɛbaga ɲanaman b’a nii di a ka sagaw kosɔn.” (Zan 10:10, 11). Yezu tun kɔnna k’a ka kalandenw jigi sigi ko: “Aw kɛra i n’a fɔ sagakulufitini. O n’a ta bɛɛ, aw kana siran, bari a diyara aw Faa ye k’a ka masaya d’aw ma.” (Luka 12:32). Tiɲɛn na, Yezu bena o “sagakulufitini” mɔgɔw ɲɛminɛ ka don n’u ye wɛɛrɛ dɔ wɛrɛ kɔnɔ walisa u ka “kisi ani u ka hɛrɛ ka sabati.” Ka kɛ o “sagakulufitini” mɔgɔw ye, o ye nɛɛma ye dɛ!

 Nka Yezu ka kuma ma ban. A y’a fara a kan ko: “Saga dɔ wɛrɛw be ne fɛ minw te wɛɛrɛ nin kɔnɔ. Fɔɔ n ka na n’u ye. U bena na n kaan mɛn. U bɛɛ be kɛ kulu kelen ye, ani dɛndɛbaga kelen u kɔ.” (Zan 10:16). O “saga dɔ wɛrɛw” tɛ “wɛɛrɛ nin kɔnɔ.” O kɔrɔ ko u tɛ wɛɛrɛ kelen kɔnɔ ni “sagakulufitini” ye, o min bena Masaya sɔrɔ cɛɛn ye. O sagakulu fila ka ɲɛnamaya kɛyɔrɔ tɛ kelen ye. Nka Yezu ka saraka bena u fila bɛɛ nafa. A y’a fɔ ko: “N Faa be n kanu, bari, ne be n nii saraka.”—Zan 10:17.

Jama cɛma, mɔgɔ caaman y’a fɔ ko: “Jinatɔ lo, a kuun wilila.” Nka dɔw y’a yira k’u be lamɛnni kɛra koɲuman ani ko u b’a fɛ ka tugu Sagadɛndɛla ɲanaman kɔ. U ko: “A ka kuma nunu te jinatɔ kumaw ye han! Jina be se ka fiɲɛntɔ ɲaa yɛlɛ wa?” (Zan 10:20, 21). Yezu tun ye cɛɛ min kɛnɛya, min fiyentɔman wolola, siga t’a la, u kaan be ale lo ma.