Nte Jesus osụk ekpepde n̄kpọ ke Judea, enye etịn̄ idahaemi aban̄a n̄kpọ emi mbon emi ẹkpan̄de utọn̄ ẹnọ enye ẹkemede ndisọp ndiọn̄ọ, oro edi, erọn̄ ye otuerọn̄. Edi enye ada emi ọnọ mmọ uwụtn̄kpọ. Uwụtn̄kpọ emi ekeme ndinam mme Jew oro ẹti ikọ David emi: “Jehovah edi Andibọk mi. Ndinanake n̄kpọ. Enye anam mi nsụhọde nna ke awawa mbiet.” (Psalm 23:1, 2) Ke psalm en̄wen, David ama ọdọhọ idụt Israel ete: “Ẹyak nnyịn itọn̄ọ edọn̄ ke iso Jehovah Andinam nnyịn. Koro enye edide Abasi nnyịn, ndien nnyịn idi ikọt emi enye ọbọkde.” (Psalm 95:6, 7) Ke akpanikọ, ebịghi ẹkesimen nditọ Israel emi ẹkedude ke idak Ibet ẹdomo ye erọn̄ ke ufọkerọn̄.

Sia nditọ Israel ẹkemanade-mana ẹdidụk ediomi Ibet Moses, oro anam ẹdọhọ ke mmọ ẹsịne ke “ufọkerọn̄” Abasi. Ibet akanam mmọ ẹdi isio ye mbon emi mîkodụhe ke ediomi emi, ikonyụn̄ iyakke mmọ ẹtiene utọ mbon oro ẹnam mme oburobụt n̄kpọ emi mmọ ẹkesinamde. Edi ndusụk nditọ Israel ẹma ẹsifiomo mme erọn̄ Abasi. Jesus ọdọhọ ete: “Ke ata akpanikọ ke ndọhọ mbufo, Owo eke mîsan̄ake enyịnusụn̄ ibe idụk ufọkerọn̄, edi otode ebiet efen ọdọk odụk, edi inọ ye owo n̄wo. Edi owo eke asan̄ade enyịnusụn̄ ebe odụk edi ekpemerọn̄.”—John 10:1, 2.

Mbon emi ẹkopde ikọ Jesus ẹkeme ndikere ke enye etịn̄ aban̄a mbon nsu emi ẹkesidọhọde ke mmimọ idi Messiah m̀mê Christ. Mbon nsu emi ẹtie nte inọ ye mbon n̄wo emi Jesus etịn̄de aban̄a. Inaha mme owo ẹtiene mmọ. Utu ke oro, mmọ ẹkpetiene “ekpemerọn̄.” Jesus afiak etịn̄ ikọ aban̄a ekpemerọn̄ emi ete:

“Ekpeme-usụn̄ eberede usụn̄ ọnọ enye, erọn̄ ẹnyụn̄ ẹkop uyo esie, ndien enye okot erọn̄ esiemmọ ke enyịn̄ onyụn̄ ada mmọ ọwọrọ. Ke enye ama akatan̄ kpukpru se inyenede enye ọwọrọ, enye ebem mmọ iso, mme erọn̄ ẹnyụn̄ ẹtiene enye, koro mmọ ẹfiọkde uyo esie. Mmọ iditieneke esenowo tutu amama, utu ke oro ẹdifefehe enye, koro mmọ mîfiọkke uyo isenowo.”—John 10:3-5.

Mbemiso Jesus ọtọn̄ọde utom ukwọrọikọ esie, John Andinịm Owo Baptism akanam utom nte ekpeme-usụn̄. Enye akanam mme owo ẹdiọn̄ọ ke Jesus edi enye emi mme erọn̄ Abasi ẹkpetienede. Ndusụk mbon oro Jesus ọkwọrọde ikọ ọnọ ke Galilee ye idem mi ke Judea ẹkop uyo esie. M̀mọ̀n̄ ke enye ‘edida mmọ ọwọrọ’ aka? Nso ufọn ke mmọ ẹdibọ ke nditiene enye? Anaedi idem akpa ndusụk mbon emi ẹkopde ikọ emi sia ‘mmọ ifiọkke se mme n̄kpọ emi enye etịn̄de ọnọ mmọ ẹwọrọde.’—John 10:6.

Jesus ọdọhọ mmọ ete: “Ke ata akpanikọ ke ndọhọ mbufo, Ami ndi enyịnusụn̄ nnọ mme erọn̄. Kpukpru mbon oro ẹdide ẹdidọhọ ke mmimọ idi mi ẹdi mme inọ ye mbon n̄wo; edi mme erọn̄ ikopke uyo mmọ. Ami ndi enyịnusụn̄; ẹyenyan̄a owo ekededi eke edibede ke ami idụk, enye eyebe odụk onyụn̄ ebe ọwọrọ oyonyụn̄ okụt se adiade.”—John 10:7-9.

Jesus etịn̄ aban̄a obufa n̄kpọ idahaemi. Mbon emi ẹkopde ikọ esie ẹdiọn̄ọ ke idịghe enye ke Abasi akada anam ediomi Ibet emi okodude ke ediwak isua ikie. Ntre anaedi ikọ esie ọwọrọ ke imọ idimen mme erọn̄ emi ikesịn ke ufọkerọn̄ en̄wen. Nso ke enye edinam inọ mmọ?

Jesus etịn̄ se imọ idinamde ete: “Ami ndi man mmọ ẹkpenyene nsinsi uwem. Ami ndi eti ekpemerọn̄; eti ekpemerọn̄ ayak ukpọn̄ esie ọnọ kaban̄a mme erọn̄.” (John 10:10, 11) Jesus ama ọdọdọhọ mbet esie ete: “Ẹkûfehe ndịk, ekpri otuerọn̄, koro Ete mbufo emenyịme ndida obio ubọn̄ oro nnọ mbufo.” Enye eketịn̄ emi man ọdọn̄ mmọ esịt. (Luke 12:32) Mbon emi ẹdude ke “ekpri otuerọn̄” ke Jesus oyom ndimen n̄kesịn ke obufa ufọkerọn̄ man mmọ “ẹkpenyene nsinsi uwem.” Ufọn emi “ekpri otuerọn̄” ẹdibọde okpon etieti!

Ikọ Jesus ikụreke ke oro. Enye adian do ete: “Mmonyụn̄ nnyene mme erọn̄ en̄wen, emi mîtoho ke ufọkerọn̄ emi; ana nda mmọ oro n̄ko ndi, ndien  mmọ ẹyekop uyo mi, mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.” (John 10:16) “Mme erọn̄ en̄wen” emi enye etịn̄de mi isịneke ke “ufọkerọn̄ emi.” Anaedi mmọ ẹsịne ke ufọkerọn̄ en̄wen, emi “ekpri otuerọn̄” emi ẹdidade Obio Ubọn̄ inyene mîsịneke. Mme andidu ke ufọkerọn̄ mbiba emi ẹnyene nsio nsio idotenyịn; ndusụk ẹdidu uwem ke heaven, mbon eken ẹdu mi ke isọn̄. Kpa ye oro, mme erọn̄ emi ẹdude ke ufọkerọn̄ mbiba emi ẹyesụk ẹbọ ufọn ẹto se Jesus edinamde. Enye ọdọhọ ete: “Ntak edi oro Ete amade mi, koro nyakde ukpọn̄ mi nnọ.”—John 10:17.

Ediwak owo ke otuowo ẹdọhọ ẹte: “Enye enyene demon onyụn̄ adama idat.” Edi mbon en̄wen ẹtịn̄ n̄kpọ emi owụtde ke mmọ ẹma se Jesus etịn̄de, ke onyụn̄ ọdọn̄ mmọ nditiene Eti Ekpemerọn̄. Mmọ ẹdọhọ ẹte: “Emi idịghe ikọ owo emi enyenede demon. Nte demon ekeme nditat nnan enyịn?” (John 10:20, 21) Mmọ ẹtịn̄ ẹban̄a owo emi akamanade nnan, emi Jesus okonyụn̄ anamde okụt usụn̄.