Ni veivakavulici tiko e Jutia o Jisu, e cavuta sara e dua na ka era na kila rawarawa na vakarorogo, qori na sipi kei na bainisipi. Nona vosa vakatautauvata qori era rairai nanuma lesu kina na Jiu na vosa i Tevita: “E noqu iVakatawa o Jiova. Au na sega ni leqataka e dua na ka. E vakadavori au ena vanua veico drokadroka.” (Same 23:1, 2) E veisureti ena dua tale na same o Tevita: “Meda tekiduru e mata i Jiova na Dauveibuli. Ni noda Kalou o koya, eda tamata tale ga ni nona veico.” (Same 95:6, 7) Kena ibalebale sa dede nodra vakatauvatani voli mai ena dua na qelenisipi na Isireli era vakarurugi ena Lawa.

O ira na “sipi” qori era tiko ena “bainisipi” nira vakarurugi ena veiyalayalati ni Lawa a soli vei Mosese ena gauna ga era sucu kina. Na Lawa e vaka na bai, e taqomaki ira na Isireli mai na nodra ivalavala dukadukali na lewenivanua era sega ni vauci ena Lawa. Ia era vakalolomataki ira na qelenisipi ni Kalou eso na Isireli. E kaya o Jisu: “Au tukuna vakadodonu vei kemuni, o koya e sega ni curu ena katuba ni bainisipi, e kaba ga ena duatani tale na vanua, e daubutako e daukocokoco tale ga. Ia na ivakatawanisipi ena curu e katuba.”—Joni 10:1, 2.

De dua era na vakasamataka na lewenivanua nodra kaya eso nira Mesaia se Karisito. O ira qori era vaka na daubutako ra qai daukocokoco. E bibi gona mera kua ni muri ira na dauveidabui va qori na lewenivanua, mera muria ga na “ivakatawanisipi,” ni a tukuna o Jisu:

“Na ivakatawa ni katuba e dolava na katuba vua na ivakatawanisipi, era rogoca na domona na sipi. E kacivi ira nona sipi ena yacadra qai kauti ira i tuba. Ni sa kauti ira kece i tuba na nona sipi, ena liu tiko ra qai muri koya na sipi nira kila na domona. Era na sega sara ni muria na vulagi, era na dro nira sega ni kila na domo ni vulagi.”—Joni 10:3-5.

E vaka na ivakatawa ni katuba o Joni na Dauveipapitaisotaki, qai tukuna ena dua na gauna mera muri Jisu o ira na vakarurugi ena Lawa. Eso na sipi e Kalili kei Jutia era rogoca na domo i Jisu. Ia ena “kauti ira” e vei? Cava ena yaco nira muri koya? Nira rogoca na vosa vakatautauvata qori eso, era lomatarotaro nira “sega ni kila na ka e tukuna tiko vei ira.”—Joni 10:6.

E vakamacalataka o Jisu: “Au tukuna vakadodonu vei kemuni, o yau na katuba ni sipi. O ira kece era vakalecaleca mai era daubutako ra qai daukocokoco, ia o ira na sipi era sega ni rogoci ira. O yau na katuba. O koya e curu kina ena vakabulai, ni curu yani se curu mai ena kunea na kakana.”—Joni 10:7-9.

Macala eke ni tukuna tiko o Jisu e dua na ka vou. Era kila na vakarorogo ni o Jisu e sega ni katuba ni Lawa ni veiyalayalati, sa muri voli mai ena vica na senitiuri. De dua e vakaibalebaletaka tiko o koya ni na “kauti ira” na sipi ena dua tale na bainisipi. Ia cava ena yaco?

E vakamacalataka tale o Jisu me baleta na nona itavi: “Au lako mai mera rawata na bula, mera rawata sara vakalevu. O yau na ivakatawa vinaka. Na ivakatawa vinaka e solia nona bula ena vukudra na sipi.” (Joni 10:10, 11) A vakayaloqaqataki ratou nona tisaipeli ena dua na gauna ni kaya: “Dou kua ni rere na qelenisipi lailai, ni sa vakadonuya na Tamamudou me solia vei kemudou na Matanitu.” (Luke 12:32) Kena ibalebale o Jisu ena kauti ira na “qelenisipi lailai” ena bainisipi vou, mera “rawata na bula, mera rawata sara vakalevu.” Dua dina na ka dokai mera lewe ni qelenisipi qori!

E tomana o Jisu: “Eso tale noqu sipi era sega ni tiko ena bai qo au na kauti ira tale ga mai, era  na rogoca na domoqu, ena qai dua ga na qelenisipi, dua ga na kena ivakatawa.” (Joni 10:16) Ni tukuni nira “sega ni tiko ena bai qo” ‘eso tale na sipi,’ e kena ibalebale nira sega ni tiko ena nodra bainisipi na “qelenisipi lailai” era na veiliutaki ena Matanitu ni Kalou. E duidui na inuinui ni rua na bainisipi, ia ena yaga ruarua ina ilawalawa qori na itavi i Jisu. E kaya o Jisu: “Qo na vuna e lomani au kina o Tamaqu niu solia noqu bula, ena qai solia tale vei au.”—Joni 10:17.

Era tukuna e levu na vakarorogo: “E curumi koya tiko na timoni, sa leqa nona vakasama.” Ia eso tale era taleitaka na ka era rogoca, era via muria na iVakatawanisipi Vinaka. Era kaya: “E sega ni vosa va qo na tamata e curumi koya na timoni. Na timoni e sega ni rawa ni vakavuna me rai na mataboko!” (Joni 10:20, 21) Era vakaibalebaletaka tiko qori ena nona vakabula o Jisu na tagane e sucu mataboko.