Iesu be Iudea ai ia do haroro lalonai, kamonai taudia ese do idia laloparara gauna ia herevalaia—mamoe bona mamoe magudia. To laulau dalanai ia herevalaidia. Iuda taudia be reana Davida ena hereva idia laloa lou, ia gwau: “Iehova be lau ia naria, iena mamoe bamona. Lau be gau ta dekenai do lau dabu lasi. Rei gabuna namona dekenai lau ia hakaua lao, lau laga-ani totona.” (Salamo 23:1, 2) Siri ma ta ai, Davida ese Iuda besena ia boiria, ia gwau: “Iseda Havaraia Tauna Iehova vairanai ita tui diho. . . . Badina ia be iseda Dirava, bona ita be iena rei gabuna ena mamoe.” (Salamo 95:6, 7) Oibe, Taravatu henunai idia noho Israela taudia be mamoe serina bamona.

Mose ena Taravatu henunai idia noho Israela taudia be “mamoe ena magu” lalonai idia noho “mamoe” bamona. Unai Taravatu be magu bamona, Taravatu henunai idia noho lasi besedia edia kara dikadia amo idia ia gimaia. To Israela taudia haida ese Dirava ena mamoe idia kara auka henia. Iesu ia gwau: “Umui lau hamaoroa momokani, mamoe edia magu ena iduara amo ia vareai lasi, to magu ia daekau bona ia vareai tauna be henaohenao tauna. To iduara amo ia vareai tauna, ia be mamoe naria tauna.”​—Ioane 10:1, 2.

Reana taunimanima idia laloatao guna haida be sibodia idia gwauraia Mesia, eiava Keriso. Idia be henaohenao bona dadidadi taudia bamona. Taunimanima be unai bamona taudia murinai do idia lao lasi. To, Iesu ese ia herevalaia “mamoe naria tauna” murinai idia raka be namo.

Ia gwau: “Iduara naria tauna ese unai tauna totona iduara ia kehoa, bona mamoe be ena gadona idia kamonai. Ena mamoe edia ladana ia boiria bena murimuri dekenai ia hakaudia lao. Ena mamoe ibounai ia abia raka-lasi murinai, edia vairanai ia raka lao, bona mamoe be ia murinai idia raka, badina ena gadona idia diba. Mamoe be idau tauna murinai do idia raka lasi, to ia amo do idia heau siri, badina idau taudia edia gadona idia diba lasi.”​—Ioane 10:3-5.

Ioane Bapatiso be iduara naria tauna bamona, ia hahedinaraia Taravatu henunai idia noho mamoe bamona taudia be Iesu murinai idia raka be namo. Bona Galilea bona Iudea ai, mamoe haida be Iesu ena gadona idia diba. Edeseni do ia “hakaudia lao”? Bona ia murinai idia raka dainai dahaka do ia vara? Unai parabole idia kamonai taudia haida be idia daradara, badina “ena hereva idia lalopararalaia lasi.”​—Ioane 10:6.

Iesu ia gwau: “Umui lau hamaoroa momokani, lau be mamoe edia iduara. Koikoi dalanai egu ladana idia gaukaralaia bona vareai taudia be henaohenao taudia, to mamoe be edia gadona idia kamonai lasi. Lau be iduara. Lau amo ia raka vareai tauna be do ia mauri, bona unai tauna be do ia vareai bona raka-lasi bona rei namona do ia davaria.”​—Ioane 10:7-9.

Oibe, Iesu be gau matamata ia herevalaia. Iena kamonai taudia idia diba ia be lagani momo lalonai ia noho Taravatu gwaubouna ena iduara lasi. Unai dainai reana ia ura hahedinaraia “murimuri dekenai ia hakaudia lao” mamoe be magu ma ta lalonai do idia vareai. Ena namo be dahaka?

Iesu be ena maduna ia gwauraia hedinarai, ia gwau: “Lau mai, unai amo mauri do idia abia bona do idia noho ela bona hanaihanai. Lau be mamoe naria tauna namona. Mamoe naria tauna namona ese ena mauri be ena mamoe totona do ia henia.” (Ioane 10:10, 11) Matamanai Iesu ese ena hahediba taudia ia hagoadaia, ia gwau: “Orea maragi e, umui gari lasi emui  Tamana be ia moale umui dekenai Basileia do ia henia.” (Luka 12:32) Oibe, “orea maragi” taudia be Iesu ese mamoe magu matamatana lalonai do ia hakaudia vareai, unai amo “mauri do idia abia bona do idia noho ela bona hanaihanai.” Unai mamoe serina lalonai idia noho be hahenamo badana!

To Iesu ena hereva be unuseni ia doko lasi. Ia gwau: “Lau be mai egu mamoe ma haida, idia be inai mamoe maguna lalonai lasi, idia danu do lau mailaia bona egu gadona do idia kamonai, bona idia be mamoe orea tamona ai do idia lao, bona mamoe naria tauna be tamona.” (Ioane 10:16) Unai “mamoe ma haida” be “inai mamoe maguna lalonai lasi.” Unai dainai idia be mamoe magu ma ta lalonai idia noho, bona Basileia lalonai do idia vareai “orea maragi” amo idia idau. Unai magu rua lalonai idia noho taudia edia ahuna be idauidau. To unai magu rua lalonai idia noho mamoe be Iesu ena maduna amo hahenamo do idia abia. Ia gwau: “Unai dainai Tamana ese lau ia lalokau henia, badina lau ese egu mauri lau henia.”​—Ioane 10:17.

Momo idia gwau: “Ia lalonai demoni ta ia noho bona ia kavakava.” To ma haida be idia ura Iesu ena hereva idia kamonai bona Mamoe Naria Tauna Namona murinai idia raka. Idia gwau: “Demoni ese ia biagua tauna be inai bamona do ia hereva lasi. Demoni ese matakepulu taudia edia matana ia kehoa diba, a?” (Ioane 10:20, 21) Idia be matamanai Iesu ese ia hanamoa matakepulu tauna idia herevalaia.