Lebuh Jesus agi ngajar orang ba Judea, iya nyebut pasal raban bedus enggau kandang bedus. Jaku sempama nya senang dimeretika bala peninga iya. Orang Judah engka ingatka jaku David ke madah: ‘Jehovah pengibun aku. Aku nadai suntuk utai. Iya ngasuh aku belelak ba padang rumput ti galak.’ (Masmur 23:1, 2) Pia mega, David kala mai orang Israel: ‘Aram kitai besugang di mua Jehovah ti udah ngaga kitai! Iya endang Petara kitai. Kitai tu orang ke diibun Iya.’ (Masmur 95:6, 7) Endang amat, bansa Israel udah lama disemaka baka raban bedus.

“Raban bedus” diau dalam siti “kandang bedus.” Nama reti iya? Reti iya, kenyau ari ada, orang Israel dibaruh sempekat Adat Moses. Adat nya baka siti pagar ke nyeraraka sida ari orang bukai ke enda dibaruh Adat sereta ngereja pengawa ti jai. Taja pia, sekeda orang Israel empu, enda ngibun raban bedus Petara enggau manah. Ku Jesus: “Enggau bendar aku madah ngagai kita: Orang ke enda tama ngagai kandang bedus nengah pintu, tang niki nengah jalai bukai, nya penchuri enggau perumpak. Tang orang ke tama nengah pintu nya pengibun bedus.”—John 10:1, 2.

Nama reti penchuri enggau perumpak ke dipadahka Jesus? Nya dituju ngagai orang ke madahka diri Messiah, tauka Kristus. Lalu orang mayuh enda patut nitihka sida ke bepura-pura nya. Tang, sida patut nitihka “pengibun bedus” ti bendar.

Ku Jesus: “Orang ke nyaga pintu muka pintu ke iya, lalu raban bedus ningaka nyawa iya. Iya ngangauka nama bedus iya siku-siku lalu nguluka sida pansut. Pengudah iya mai semua bedus iya pansut, iya bejalai ba mua lalu raban bedus iya nitihka iya, laban sida ngelala munyi nyawa iya. Raban bedus nya enda nitihka orang ke enda dikelala sida. Tang, sida deka rari ari orang nya laban sida enda ngelala munyi nyawa orang nya.”—John 10:3-5.

John Pemaptisa nya, baka orang ke nyaga pintu. Iya madahka orang Israel ke dibaruh Adat patut nitihka Jesus. Lalu sida ke baka bedus, ba Galili sereta Judea, udah ngelala nyawa Jesus. Kini iya “nguluka sida pansut”? Lalu nama penguntung enti sida nitihka iya? Sekeda peninga Jesus engka berundingka tanya nya laban “sida enda meretika utai ku iya.”—John 10:6.

Jesus nerangka: “Enggau bendar aku madah ngagai kita: Aku meh pintu ke raban bedus. Semua orang ke pura-pura nyadi aku nya penchuri enggau perumpak. Tang raban bedus enda ningaka sida. Aku meh pintu. Orang ke tama nengah aku deka diselamatka. Iya deka tama enggau pansut, lalu iya mega deka tetemuka padang rumput.”—John 10:7-9.

Maya nya, Jesus ngajar utai ti baru ngagai sida. Bala peninga Jesus nemu iya ukai pintu ngagai Sempekat Adat, ke udah bisi lebih ari seribu taun. Nya alai reti ku Jesus nya, iya deka “nguluka” raban bedus ngagai siti da agi kandang bedus. Nama asil iya?

Ku Jesus nerang mayuh agi pasal peranan iya: “Aku datai ngambika bedus bulih pengidup lalu bempu pengidup nya belama iya. Aku tu meh pengibun bedus ti manah. Pengibun bedus ti manah nyerahka nyawa diri ke bedus iya.” (John 10:10, 11) Sebedau tu, Jesus kala ngelantangka ati bala murid lebuh iya madahka: “Anang takut, kita ke raban mit, laban Apai kita gaga ati deka meri Perintah Iya ngagai kita.” (Luke 12:32) Nya alai, sida ba “raban mit” deka dibai Jesus ngagai kandang bedus ti baru, ngambika sida “bulih pengidup lalu bempu pengidup  nya belama iya.” Nya berekat ti chukup besai!

Jesus nyambung: “Aku bisi bedus ti bukai ke ukai ari raban tu. Aku mega patut mai raban bedus nya tama. Semua sida deka ningaka nyawa aku, lalu nyadi siti raban ba baruh siku pengibun bedus.” (John 10:16) “Bedus ti bukai” nya “ukai ari raban tu.” Sida enda sama enggau “raban mit” ke deka bempu Perintah serega. Dua iti raban bedus nya bisi harapan ti enda sama. Tang, kedua-dua raban nya sama bulih penguntung ari utai ke digaga Jesus. Ku iya: “Tu meh kebuah Apai rinduka aku, laban aku nyerahka nyawa diri.”—John 10:17.

Mayuh ari bala peninga Jesus madah: “Iya dirasuk melikat ti jai lalu nyau gila.” Tang sida ke bukai rindu ninga utai ke dipadah Jesus lalu deka nitihka iya ke nyadi Pengibun Bedus ti Manah. Ku sida madah: “Tu ukai jaku orang ke dirasuk melikat ti jai. Nadai melikat ti jai ulih ngeraika mata orang buta, enda pia?” (John 10:20, 21) Sida engka munyi nya laban Jesus udah ngeraika siku lelaki ke buta kenyau ari ada.