Bayat a mangisursuro ni Jesus idiay Judea, inusarna ti banag a nalaka a mailadawan dagiti dumdumngeg​—dagiti karnero ken ti pagaponanda. Ngem mangibagbaga laeng iti ilustrasion. Mabalin a malagip dagiti Judio ti sasao ni David: “Ni Jehova ti Pastorko. Saanak nga agkurang iti aniaman. Kadagiti naraber a karuotan paginanaennak.” (Salmo 23:​1, 2) Iti sabali pay a salmo, inyawis ni David iti nasion: “Agparintumengtayo ken Jehova a Nangaramid kadatayo. Ta isu ti Diostayo, ken datayo ti tattao nga ipaspastoranna.” (Salmo 95:​6, 7) Wen, dagiti Israelita nga adda iti sidong ti Linteg ket nabayagen a nayarigda kas arban dagiti karnero.

Adda dagitoy a “karnero” iti “pagaponan” ta nayanakda iti sidong ti Linteg a naited ken Moises. Ti Linteg ti nagserbi nga alad, tapno mailasinda kadagiti makadadael nga ar-aramid dagiti tattao nga awan iti sidong daytoy nga urnos. Ngem saan a nasayaat ti panangtrato ti dadduma nga Israelita iti arban ti Dios. Kinuna ni Jesus: “Ibagak kadakayo, ti sumrek iti pagaponan ti karnero a saan a magna iti ruangan no di ket kumalay-at iti alad, dayta ket mannanakaw. Ngem ti sumrek iti ruangan ket ti pastor dagiti karnero.”​—Juan 10:​1, 2.

Mabalin a pampanunoten dagiti tattao dagidiay agkunkuna a Mesias, wenno Kristo. Mayarig dagitoy kadagiti mannanakaw. Masapul a saan a suroten dagiti tattao dagita nga impostor. Imbes ketdi, masapul a surotenda “ti pastor dagiti karnero,” a kinuna ni Jesus maipapan kenkuana:

“Isu ket ilukatan ti parabantay iti ruangan, ken denggen dagiti karnero ti timekna. Awaganna dagiti karnerona iti naganda ken iruarna ida iti pagaponan. No mairuarna aminen a karnerona, mapan iti sanguananda, ket sumurotda kenkuana, ta mailasinda ti timekna. Pulos a saanda a sumurot iti estranghero no di ket itarayanda, ta saanda a mailasin ti timekna.”​—Juan 10:​3-5.

Sakbayna, ni Juan a Mammautisar, kas ti parabantay ti ruangan, impakaammona ni Jesus kas daydiay masapul a suroten dagiti simboliko a karnero nga adda iti sidong ti Linteg. Dadduma a karnero, iti Galilea ken kasta met iti Judea, ti nakailasin iti timek ni Jesus. Sadino ti ‘pangiruaranna’ kadakuada? Ania ti resulta ti panangsurotda kenkuana? Mabalin nga agpanunot ti dadduma a dumdumngeg gapu iti daytoy nga ilustrasion, ta ‘saanda a maawatan ti ibagbagana kadakuada.’​—Juan 10:6.

Inlawlawag ni Jesus: “Ibagak kadakayo, siak ti ruangan a pagserkan dagiti karnero. Mannanakaw ti amin a mangibaga nga isuda ti pudno a pastor; ngem saan nga ipangag ida dagiti karnero. Siak ti ruangan. Asinoman a sumrek babaen kaniak maisalakanto; mabalin a sumrek ken rummuar ket makabirokto iti pagaraban.”​—Juan 10:​7-9.

Nalawag nga adda baro nga ibagbaga ni Jesus. Ammo dagiti dumdumngeg a saan nga isu ti ruangan ti Linteg ti tulag, nga addan ginasut a tawenen ti napalabas. Gapuna, ti ibagbagana nga “iruarna” a karnero ket masapul a sumrek iti sabali a pagaponan. Ania ti pagbanaganna?

Inlawlawag pay ni Jesus ti akemna: “Immayak tapno agbiag dagiti karnero ken maaddaanda iti agnanayon a biag. Siak ti nasayaat a pastor; ti nasayaat a pastor itedna ti biagna maipaay kadagiti karnero.” (Juan 10:​10, 11) Sakbay dayta, liniwliwa ni Jesus dagiti adalanna a kunkunana: “Dikay agbuteng, bassit nga ipastoran, ta pagragsakan ni Amayo nga ited kadakayo ti Pagarian.” (Lucas 12:32) Kinapudnona, dagiti mangbukel iti “bassit nga ipastoran” ti ipan ni Jesus iti baro a pagaponan, tapno “maaddaanda iti agnanayon a biag.” Talaga a bendision ti agbalin a paset dayta nga arban!

Ngem saan nga impatingga ni Jesus ti ibagbagana iti dayta. Kinunana: “Adda pay sabsabali a karnerok, nga awan iti daytoy a pagaponan; masapul  nga iyaponko met ida, ket denggendanto ti timekko. Agbalindanto a maymaysa nga arban nga aywanan ti maymaysa a pastor.” (Juan 10:16) Dagitoy a “sabsabali a karnero” ket “awan iti daytoy a pagaponan.” Addada ngarud iti sabali a pagaponan, a naiduma iti “bassit nga ipastoran” a makipagtawidto iti Pagarian. Agduma ti pagtungpalan dagitoy dua a pagaponan. Kaskasdi, agpada a magunggonaan dagiti karnero iti dua a pagaponan iti akem ni Jesus. Kinunana: “Ay-ayatennak ti Ama gapu ta itedko ti biagko.”​—Juan 10:17.

Adu kadagiti tattao ti nagkuna: “Adda demonio ken agmauyong dayta a tao!” Ngem dadduma ti dimngeg a naimbag ken kayatda a suroten ti Nasayaat a Pastor. Kinunada: “Saan a kasta ti panagsasao ti naluganan iti demonio. Kabaelan aya ti demonio a paimbagen ti bulsek a tao?” (Juan 10:​20, 21) Nalawag a tuktukoyenda ti inaramid ni Jesus idi pinaimbagna ti lalaki a nayanak a bulsek.